[VIDEO] გოგა ბითაძის ბენეფისი - 1:30 წუთში "ციბონას" 1/2 ფინალი მოუგო

გოგა ბითაძის "ბუდუჩნოსტმა" ადრიატიკის ლიგის 1/2 ფინალური სერიის მეორე მატჩი შინ პოდგორიცაში გამართა. მონტენეგროელებს პირველი შეხვედრა ხორვატიაში წაგებული ჰქონდათ და ამჯერად "ციბონასთან" გამარჯვება სჭირდებოდათ, რომ სერიაში ანგარიში გაეთანაბრებინათ.

მატჩი თანაბარ ბრძოლაში წარიმართა და გამარჯვებულის ბედი ბოლო წამებზე გადაწყდა. სირენამდე 5 წუთი რჩებოდა, როდესაც ჯეიკობ პულენმა სამქულიანით "ციბონას" ჩამორჩენა 7 ქულამდე შეამცირა (67:74). სწორედ ამის შემდეგ მოიწყო გოგა ბითაძემ ბენეფისი: მან ჯერ 2+1 ჩააგდო, თან მეტოქე არასპორტულად დააჯარიმა და ბურთი ბუდუჩნოსტელებს დაუტოვა.

საპასუხო შეტევაში დაცვაში მყარად დადგა და მეტოქეს მწვავე იერიში ჩაუშალა, რასაც ნიკოლიჩის ზუსტი ორქულიანი მოჰყვა. სირენამდე 4 წუთით ადრე ნორის კოულმა მიზანს ვერ უწია, თუმცა ბითაძემ მოხსნა, დაამატა და "ბუდუჩნოსტი" 81:67 დააწინაურა. ეს უკვე დიდი ნაბიჯი იყო გამარჯებისკენ, თუმცა გოგა ამაზე არ შეჩერდა და წუთნახევრიანი აფეთქება ისეთი დაფარებით დაასრულა, კობსს თამაშის სურვილი გაუქრო...

საბოლოოდ 87:72 მონტენეგროელთა სასარგებლოდ.

მატჩის საუკეთესოდ ბუდუჩნოსტელი ჯექსონი დასახელდა - 15 ქულა, 5 მოხსნა. ბითაძემ 20 წუთში 11 ქულა, 5 მოხსნა და 3 დაფარება მიითვალა. მან 5-დან 3 ორქულიანი და 9-დან 5 საჯარიმო გამოიყენა.

სერიაში ანგარიში თანაბარია - 1:1. მესამე გადამწყვეტი მატჩი 7 აპრილს გაიმართება.

აქვე საინტერესო ამბავს მოგახსენებთ: მატჩის დაწყებამდე გოგა ბითაძეს ადრიატიკის ლიგის საუკეთესო კალათბურთელისთვის განკუთვნილი ჯილდო გადაეცა.

ყოველდღიური სპორტული გაზეთი "ლელო"
6340
მკითხველის კომენტარები / 0 /
მსგავსი ამბები
რუბრიკის სხვა სიახლეები
;