გოგა ნასყიდაშვილი: სერბებთან უფრო რთული მატჩები გველის

"საბურთალო" პირველი ქართული გუნდია, რომელმაც უეფას ახალგაზრდულ ლიგაზე პირველი ეტაპი გადალახა და შემდეგ ეტაპზე თამაშის უფლება მოიპოვა. თურქულ "ბურსასფორთან" ორრაუნდიანი დაპირისპირების შემდეგ თბილისელები 1 და 22 ნოემბერს სერბულ "ბროდარაცს" დაუპირისპირდებიან და ახალგაზრდული ლიგის პლეი ოფში მოხვედრას შეეცდებიან. 

საბურთალოელებმა თურქებთან განმეორებითი შეხვედრა სასურველი შედეგით (1:1) რომ დაასრულეს, ამაში დიდი როლი მეკარე გოგა ნასყიდაშვილმა ითამაშა.

თბილისელებმა მატჩი ცუდად დაიწყეს - პირველივე წუთზე სტუმრები დაწინაურდნენ, მე-8 წუთზე კი თურქებმა თერთმეტმეტრიანის დარტყმის უფლება მოიპოვეს, მაგრამ ნასყიდაშვილმა პენალტი მოიგერია და ქართულ გუნდს გამარჯვების შანსი დაუბრუნა.

მესამე წელია, რაც ნასყიდაშვილი "საბურთალოს" მეკარეა. მანამდე ის ბოლნისის "სიონის" ასაკობრივ გუნდში ასპარეზობდა.

"თურქებთან მეორე მატჩი პირველზე ბევრად რთული გამოდგა. განმეორებითში გოლის გაშვება არ გვინდოდა, მაგრამ დასაწყისშივე გაგვიტანეს, რამაც გუნდში დაბნეულობა შემოიტანა. ამ ბურთის მოგერიება შემეძლო, მაგრამ... ჩემი შეცდომა მალევე გამოვასწორე, როდესაც თერთმეტმეტრიანი მოვიგერიე. სხვაგვარად, გუნდი ძალიან რთულ მდგომარეობაში ჩავარდებოდა.

პენალტის დროს თურქმა ფეხბურთელმა ჯერ მე შემომხედა, მერე - ორი ვე კუთხეს. მე ერთ-ერთი კუთხე ავირჩიე და საბოლოოდ, დარტყმის მიმართულება გამოვიცანი და ბურთი მოვიგერიე. შემდეგ ეტაპზე თამაშის უფლება რომ მოვიპოვეთ, ამის გამო ძალიან დიდი ემოცია გვქონდა", - ამბობს ნასყიდაშვილი.

მან სერბეთის "ბროდარაცთან" მომავალ დაპირისპირებაზეც ილაპარაკა:

"ახალგაზრდული ჩემპიონთა ლიგა პრესტიჟული გათამაშებაა და ყოველწლიურად ძალებს იკრებს. ჩვენ კი "ბურსასთან" მატჩებით დიდი გამოცდილება შევიძინეთ. ევროპულ გუნდებთან თამაში განსხვავებულია.

მომავალი მატჩები სერბეთის "ბროდარაცთან" გველის. სერბები თურქებზე უფრო ძლიერი მეტოქეები არიან და კიდევ უფრო რთული მატჩები გველის. ზოგადად, ბალკანელები ბრძოლისუნარიანობითა და ათლეტურობით გამოირჩევიან, თუმცა ჩვენ თავისუფლად უნდა ვითამაშოთ და ის ფეხბურთი ვაჩვენოთ, რაც გვეხერხება და გამოგვდის.

"საბურთალო 2" ორ ფრონტზე, რეგიონალურ და უეფას ახალგაზრდულ ლიგაზე წარმატებით ვთამაშობთ. მართალია, გადატვირთული გრაფიკი გვაქვს, მაგრამ ჩვენი მწვრთნელები და ხელმძღვანელები ყველაფერს აკეთებენ, ფეხბურთელებმა ძალები თანაბრად რომ გადავანაწილოთ".

ყოველდღიური სპორტული გაზეთი "ლელო"
844
მკითხველის კომენტარები / 0 /
მსგავსი ამბები
რუბრიკის სხვა სიახლეები
;