გოგის ბლოგი: პასი, პასი!

მინაწერი ფოტოზე: "დათვმა ისწავლა ცირკში ველოსიპედზე კატაობა და ამათმა მოედანზე ვერ ისწავლეს ამ დროს პასი რომ უნდა მიცე".

კომენტარები
რობერტი: ალბათ, ვაისს თავს აწონებდა, არადა პასის შემთხვევაში უფრო მოაწონებდა. სამომავლოდ მე არ გამოვიძახებდი ნაკრებში ყოველ შემთხვევაში:)
ილარიონი: ბუჯო, 2:0 ხდება და მოთავებულია ფაქტობრივად თამაში, ერთი არასწორი გადაწყვეტილებით საფრთხეშია ყველაფერი... ნუ, 8:0 როცა არის და მაინც სწორად რომ უნდა ითამაშო, ეგ კიდე ცალკე თემაა...
ესტატე: 7:0-ს იგებდა ერთხელ "ბაიერნი", პენალტი დაიდო, იმაიმუნეს და კანს დაარტყმევინეს. ვერ გაიტანა და მატჩის მერე ბეკენბაუერმა გადაუარა მთელ გუნდს, რას "ბაცნობთ"... პენალტია გასატანი, დაარტყი გაიტანეო!
სამსონი: 10 ასეთი სიტუაციიდან მინიმუმ 8-ჯერ პასს არ აკეთებს.
რობერტი: ვაისის ბრალია ძმაო!!! არ ასწავლა პასი რო კეთდება მანდ)))))))))))
სამსონი: გავუშვათ ნაკრებიდან ვლადიმირ ვაისი. პასი როგორ არ ასწავლა, ტო.
ესტატე: დათვები პროფესიონალები არიან ძმაო.
ილარიონი: შენ რაგბიზე მოდი დროულად, სულ რომ აგვიანებ...
ესტატე: რაგბიზე დაგვიანებული როდის გინახივარ?
ილარიონი: სულ... 10 წუთი რომ აკლია დამთავრებას, მაშინ მოდიხარ...
ენგელბერტი: დათვი ტალანტია.

ეს ფოტო ჩემმა მეგობარმა ჟურნალისტმა "დააპრინტსკრინა" და თავის "ფეისბუქზე" გამოაქვეყნა. მინაწერიც საინტერესო გაუკეთა: "დათვმა ისწავლა ცირკში ველოსიპედზე კატაობა და ამათმა მოედანზე ვერ ისწავლეს ამ დროს პასი რომ უნდა მიცე..."

ეს პოსტი შეიძლება საქართველოს ნაკრების ფეხბურთელებმაც ნახეს, ამ ბლოგს თუ წაიკითხავენ, ეგებ ეწყინოთ კიდეც, მაგრამ იმაზე მეტად მაინც ვერ გაბრაზდებიან, რაც ფოტოზე ნაჩვენებ მომენტში გულშემატკივარი გააბრაზეს.

     - საქართველო-კვიპროსი 1:0 - მარცხიანი სერია გადავაგორეთ [VIDEO]

ვინც არ იცის, რა გაგრძელება მოჰყვა ამ ეპიზოდს, შეიძლება ვერც მიხვდეს, რომელ წყენასა და გაბრაზებაზე ვლაპარაკობთ. ამიტომ, ვიდრე შინ მშვიდობით მივალთ, სჯობს შორიდან მოვუაროთ.

ვიკითხოთ:

როგორ მოიქცეოდა ამ მომენტში, ვთქვათ, ლიონელ მესი?
პასუხისთვის ორი ვარიანტია:
1. მარცხნივ, თავისუფალ პარტნიორს ისეთ პასს გაუკეთებდა, კანფეტს რომ უწოდებენ.
2. კარიერის დასაწყისში მესი ალბათ, კარისკენ სვლას ამჯობინებდა, ორ კაცს მეკარიანად მოატყუებდა და გაიტანდა. დიდმა იოჰან კრუიფმა ათი წლის წინათ თქვა - ლეო გუნდზე თამაშს როცა ისწავლის, მაშინ გახდება დიდი ფეხბურთელიო.

როგორ მოიქცეოდა ამ მომენტში დავით ყიფიანი?
შეკითხვაზე სწორი პასუხის გაცემა მეტოქეებსაც გაუჭირდებოდათ. მხოლოდ დავით ყიფიანი და რამაზ შენგელია მიხვდებოდნენ, რომ ბურთი მარჯვნივ მე-11 ნომერზე უნდა დაკიდებულიყო და თავურით მეტოქეთათვის მოულოდნელად გადაგზავნილიყო კარის მიმართულებით.

როგორ მოიქცეოდა ამ მომენტში გერმანელი ფეხბურთელი (მიულერი, გნებავთ, მიოლერი თუ ფიოლერი)?
პასუხი ორსიტყვიანი და ერთმნიშვნელოვანია: პასი მარცხნივ.

როგორ მოიქცეოდა ამ მომენტში ზლატან იბრაჰიმოვიჩი?
პას(უხ)ზე არც ის იფიქრებდა, ბურთს აიგდებდა: ან პირდაპირ დაარტყამდა, ან "მაკრატელას". როცა ამას იბრა აკეთებს, შეიძლება გაიტანოს კიდეც.

როგორ მოიქცეოდა NBA-ს ვარსკვლავი სტეფ კარი?
რა თქმა უნდა, ისროდა. ჩააგდებდა კიდეც. რკალთან მისი მარტო დატოვება ხომ წამითაც არ შეიძლება, ისევე, როგორც დე ბრუინისა...

როგორ მოიქცეოდა ქართველი მორაგბე?
თავს დახრიდა, ორ კვიპროსელს შეასკდებოდა და მეკარიანად შეიტანდა ლელოში. მაგრამ, თუ ფრანგი, ან ინგლისელი დახვდებოდა... ვერ შეიტანდა...

როგორ მოიქცეოდა ზელანდიელი მორაგბე?
ორი ნაბიჯი წინ (პარტნიორი ოფსაიდში რომ არ აღმოჩნდეს), პასი მარცხნივ და ლელო ფლანგიდან.

როგორ მოიქცა მე-19 ნომერი გიორგი პაპუნაშვილი?
იბრასეულად - კარში დაარტყა.

როდესაც საქმე ზლატანთან, ლეოსთან ან კარისთან გვაქვს, პასის არგაკეთება, შესაძლოა, არასწორ თამაშში არც ჩავუთვალოთ. ზაზა ფაჩულიასთან მაქვს ეგ საკითხი პირადად გარკვეული:

ვკითხე - ხშირია შემთხვევა, როდესაც ფართან მარტო დგახარ, მაგრამ პასის შესრულების ნაცვლად სტეფ კარი ან კევინ დურანტი ტყორცნას ამჯობინებენ-მეთქი.

ზაზას პასუხი ასეთი იყო: "ბევრ გუნდში მითამაშია და ასეთ სიტუაციაში პასი რომ არ მომსვლია, გავბრაზებულვარ, მაგრამ "გოლდენ სტეიტში" ამაზე ნამდვილად არ ვღელავ. იმიტომ, რომ საქმე მსოფლიოს სუპერვარსკვლავებს ეხება, პასის ნაცვლად მოედნის ცენტრიდან რომ სტყორცნიან და ჩააგდებენ, გახარების მეტი რა დაგრჩენია?!"

კარი მსოფლიო დონის მოთამაშე იცით, რატომაა? ცხოვრების ნახევარს დარბაზში ატარებს, ამიტომაცაა მისი დარტყმისა... უფრო სწორად, სროლისა ყველას რომ ეშინია.

რეალობას დავუბრუნდეთ. ამ ფოტოზე ჩემი ბლოგის აწყობა იცით, რატომ გადავწყვიტე? - სახელმძღვანელოდ უნდა იქცეს დამწყები მოთამაშეებისთვის. ბავშვობაში ხომ ქარ თველი სპორტსმენების უმეტესობას თავში აქვს ჩაბეჭდილი: შენთვის სამი კაცის მოტყუება პრობლემა არ არის, მიდი, შეუბერე!..

კაცის მოტყუების წინააღმდეგი არ ვარ, დიეგო მარადონას ბავშვობაში თანაგუნდელები და მეტოქეები სლალომებით რომ არ ებითურებინა, 1986 წელს ინგლისს სუპერგოლს ვერც გაუტანდა. მაგრამ დაფიქრებულხართ, როგორ მოიქცეოდა დიეგო, ინგლისთან დრიბლინგისას თავისუფალი პარტნიორი რომ დაენახა? - დარწმუნებული ვარ, პასს არ დააყოვნებდა!

დაფიქრებულხართ, როგორ მოიქცეოდა მარადონა, ინგლისთან დრიბლინგისას თავისუფალი პარტნიორი რომ დაენახა?

ფინალში ხორხე ბურუჩაგას რა გადაცემა გაუკეთა, გახსოვთ? ასეთ პასს ის ფეხბურთელი, ვისაც პატარაობაში პასზე არ უფიქრია, ვერასოდეს გააკეთებს. მარადონამ კაცის მოტყუებაც იცოდა, პასიც, ხელით თამაშიც, ქიციცა და ქიცმაცურიც. კარგი პასი კაცის მოტყუებაზე რთული საქმეა.

საქართველოში კი, არავის ეწყინოს, მაგრამ თამაშისას პასზე იშვიათად თუ რომელიმე ბავშვი ფიქრობს. ამას ვინმეს მონათხრობით კი არა, საკუთარი თვალით ნანახის საფუძველზე ვამბობ. გასულ კვირაშიც ვიყავი 16-წლამდელთა საქართველოს ჩემპიონატის ერთ-ერთ მატჩზე. თამაშის შემდეგ მითხრეს - მხოლოდ შენი ხმა ისმოდა - პასი-პასიო!

რა ვქნა, ვბრაზდები, როდესაც ბავშვობიდანვე არასწორ თამაშს ეჩვევიან, რადგან ვიაზრებ, რომ რამდენიმე წლის შემდეგ, საქართველოს ნაკრებში მოხვედრის შემთხვევაში, წამით დაგვიანებულმა პასმა შეიძლება თამაში წაგაგებინოს, ათიათასობით გულშემატკივარი გაწბილებული გააბრუნოს შინ, როგორც ეს სერბეთთან საფეხბურთო ან ბოსნიასთან საკალათბურთო მატჩისას მოხდა...

იცით, რა არის ყველაზე დამაფიქრებელი? - თამაში მხოლოდ პასი და დრიბლინგი არ არის. ერთმა ესპანელმა მწვრთნელმა მითხრა:
"თამაში უამრავი ნიუანსისგან შედგება, პროცენტებში რომ გადავიყვანოთ, ასეთი მაგალითის მოყვანა შეიძლება: "რეალისა" და "ბარსელონას" მოთამაშეებმა 100-დან 95 ნიუანსი იციან და ამას მოედანზე იყენებენ კიდეც. საქართველოს ჩემპიონატში მოთამაშეებმა კი მხოლოდ 55-60 ნიუანსი იციან. ამას მხოლოდ მოედანზე ვერ ისწავლი, აზროვნება სჭირდება, აზროვნებას - განათლება, განათლებას - სწავლა.

ყოველდღიური სპორტული გაზეთი "ლელო"
1602
მკითხველის კომენტარები / 0 /
მსგავსი ამბები
რუბრიკის სხვა სიახლეები