გოგონების პირველი გუნდური ადგილი ევროპის თასზე

რუმინეთის ქალაქ კლუჟ-ნაპოკაში ჩატარდა ევროპის თასი ახალგაზრდა ძიუდოისტთა შორის, სადაც ჩვენგან გოგონების ნაკრები გამოდიოდა, ბიჭებში კი ერთი მონაწილე გვყავდა. გოგონებმა უჩვეულო წარმატებით იჭიდავეს და 7 მონაწილიდან 6-მა მედალი მოიპოვა: 2-2 ოქრო, ვერცხლი და ბრინჯაო. მათ გაიმარჯვეს გუნდურ ჩათვლაშიც. ხელცარიელი არც ბიჭებში ჩვენი მონაწილე დარჩენილა - მეორეზე გავიდა...

გოგონებში ჩემპიონები ეთერ ლიპარტელიანი (57) და სოფიო სომხიშვილი (+78) გახდნენ. მეორეზე ნატალია ყიფშიძე (48) და მარიამ ჭანტურია (70) გავიდნენ, მესამეზე - ნინო გულბანი (70) და სალომე მაყიშვილი (+78). ბიჭებში ვერცხლს გიორგი შერაზადიშვილი (81) დაეუფლა.

ლიპარტელიანმა ბოლო პერიოდში უკვე მეორე მედალი მოიპოვა, ოღონდ პირველს ახლანდელზე გაცილებით ძლიერ ტურნირში დაეუფლა - სამი კვირის წინ ზაგრებში გამართულ "დიდ პრიზზე" (ცხადია, უფროსებში) მესამეზე გავიდა. კლუჟში მან ფინალამდე სამი პაექრობა გამართა და ყველა იპონით მოიგო. პირველ შეხვედრაში მასპინძელ პარაჩივა სინკარის მართლაც "სინკარი" დასცა თავში, ისეთ ბრუნზე აიღო და დააბერტყა ტატამს. ჩერნოგორიელ ელმა ლიკინას იპონამდე კიდევ ერთი გდება ჩაუტარა, ნახევარფინალში კი ბოსნიელი ანჟელა სამარძიჩი დააგდო წმინდად. ლიპარტელიანს ყველაზე მეტად სერბი მარიცა პერიშიჩი გაუძალიანდა ფინალში, თუმცა არც იმდენად, რაიმე სერიოზული საფრთხე შეექმნა მისთვის. ერთი ეგ იყო, იპონზე ვერ დააგდო ქართველმა, გდება კი დასრულებამდე 9 წამით ადრე გაუკეთა, როცა შიგნიდან კარგად ჩაუხვია ფეხი და გამოცერა.

სომხიშვილს ჯგუფში მხოლოდ რუმინელი პაულა პასტიუ ჰყავდა დასამარცხებელი და მას იოლადაც გაუსწორდა - იპონით მოუგო. ნახევარფინალში მეორე მასპინძელს - ბიანკა პროდანსაც ასევე წმინდად მოუგო, ფინალში კი უკრაინელი რუსლანა ბულავინა დააიპონა. სომხიშვილმა პირველივე წამებიდან მიიტანა მასზე მასირებული შეტევა და პირველივე წუთზე რამდენჯერმე ჩააგდო დაბლა, მესამე მცდელობისას კი დათვივით დაახტა, გადმოაბრუნა და ცოტა დააკლდა შებოჭვამდე. თუმცა მოგება დიდხანსაც არ უძებნია და მალევე ისეთ მოგვერდზე წამოიღო, უკრაინელი ჰაერში ავარდა და პირდაპირ ბეჭებით დაებერტყა ტატამს.

ყიფშიძემ ასაკობრივებში მეოთხე მედალი მოიპოვა, ამ ტურნირზე კი შარშანდელი შედეგი გააუმჯობესა - მაშინ ბრინჯაოს დაეუფლა. ფინალში ისიც უპრობლემოდ გავიდა - ჯერ რუმინელი იასმინა კოვაჩიუ დააგდო ბეჭებზე, შემდეგ კი ჭაბუკებში ჩერნოგორიელი მსოფლიოს ვიცე-ჩემპიონი და ევროპის მესამე პრიზიორი ივანა ნიკოლიჩი გაფრთხილებებით მოახსნევინა. ნახევარფინალში სერბი ანდრეა სტოიადინოვიც წმინდად დაამარცხა, ფინალში კი თავად წააგო რუს ირენა ხუბულოვასთან.

ჭანტურიამ ფინალი შვედ მატილდა ნილსონთან დათმო იმის მიუხედავად, რომ ვაზარს უგებდა, მაგრამ თავისივე შეცდომას ემსხვერპლა. მანამდე მან რუმინელი დენისა მარინი და გერმანელი კორინა ბაიერი დააიპონა.

ამავე წონაში კარგად იასპარეზა გულბანმაც, ვინც წლეულს ერთხელ უკვე გაიმარჯვა კლუჟში - მაისში იქ ჭაბუკთა ევროპის თასი მოიგო. ის თითქოს ახლაც ახლოს იყო იმ შედეგის გამეორებასთან, რადგან ნახევარფინალში გავიდა - ბერძენ ტელეტ ბრესლერს წმინდად, ხოლო გერმანელ ლეონიე ბაიერსდროფს ვაზარით მოუგო. ნახევარფნალში ის შვედთა ზემოხსენებულ მომავალ ჩემპიონ ნილსონთან დამარცხდა -გაფრთხილებებით მოხსნეს, ბრინჯაოსთვის პაექრობაში კი უკრაინელი ირინა ხრიაშჩევსკა დააიპონა. 15 წლის გოგოსთვის ახალგაზრდებში მოპოვებული მედალი კარგი შედეგია.

მაყიშვილი ჯგუფში რუმინელ ალინა ჯოროვეასთან დამარცხა პირველივე პაექრობაში, დამამშვიდებელში კი მის თანამემამულეებზე იყარა ჯავრი: ჯერ ჯორჯიანა მილერს აუღო რევანში ვაზარ-იპონით, ხოლო გადამწყვეტ შეხვედრაში სომხიშვილის მიერ ძლეული ბიანკა პროდანიც დააიპონა.

შერაზადიშვილმა პირველ პაექრობაში გაფრთხილებებით მოახსნევინა უკრაინელი სტანისლავ გუნჩენკო. ბულგარელ ტაბაშკი თეოდორს დასრულებამდე 7 წამით ადრე გაუკეთა წმინდა გდება, ბოსნიელ ვუკ ელეზს კი ვაზარით მოუგო. ნახევარფინალში ბელგიელ კარელ ფუბერტსაც წმინდად აჯობა, ფინალში კი იტალიელ ჯაკომო გამბასთან დამარცხდა, ვინც ოლიმპიური ჩემპიონისა და რუსთა ნაკრების თავკაც ეციო გაბას ვაჟია და 2015 წელს თბილისშიც იყო ჩამოსული ევროპის ახალგაზრდულ ოლიმპიურ ფესტივალზე.

რუმინეთში ჩვენი ნაკრებიდან უმედლოდ მხოლოდ ერთადერთი მონაწილე დარჩა - მარიამ მაზანაშვილი 57 კილოგრამში. მან რუმინელ ფლორენტინა ივანესკუსთან წმინდა მოგებას რუს ქსენია სოლოვევასთან წაგება მიაყოლა და ვეღარც სანუგეშოში გადავიდა.

781
მკითხველის კომენტარები / 0 /
მსგავსი ამბები
რუბრიკის სხვა სიახლეები
;