გოდების ტურნირი - გავიხიშტეთ!

* საქართველოს ისტორიაში პირველად, საქართველოს ნაკრები ევროპის ჩემპიონატზე უმედლოდ დარჩა.
* რა იყო ასეთი ჩავარდნის მიზეზი?

სამწუხაროდ, საქართველოს ძიუდოისტ ვაჟთა ნაკრებმა უმედლოდ დაასრულა გამოსვლა თელ-ავივში, ევროპის ჩემპიონატში, რაც დამოუკიდებელი ქართული ძიუდოს ისტორიაში პირველად მოხდა.

1993 წლიდან მოყოლებული, როცა ჩვენმა ნაკრებმა ათენში პირველად იასპარეზა დამოუკიდებელ გუნდად, ყველაზე უარესი გამოსვლა 2004-2005 წლებზე მოდის, როცა თითო ბრინჯაოთი ვბრუნდებოდით კონტინენტის პირველობიდან (სხვათა შორის, ორივე ის მედალი ფედერაციის ახლანდელმა პრეზიდენტმა დავით ქევხიშვილმა მოიპოვა). თითომედლიანი ევროპირველობები სხვაც ყოფილა, თუმცა მაშინ ხარისხი ბევრად უკეთესი იყო - ოქრო ან ვერცხლი.

დაგვეთანხმებით, ვერავინ იფიქრებდა იმ ნაკრების უმედლოდ დარჩენას, რომელიც მსოფლიოს რეიტინგის ლიდერებით და მსხვილი კალიბრის ვარსკვლავებით ჩავიდა ისრაელში. ამდენი წელიწადია, ოლიმპიადიდან არ ვბრუნდებით უმედლოდ, მომხდარს კი კოშმარულ სიზმარშიც ვერ წარმოვიდგენდით.

ცოტა არ იყოს, ჩვენგან ძნელია საუბარი ჩავარდნის მიზეზებზე, თუმცა არ გამოვრიცხავ, შესაძლოა, ერთ-ერთი მიზეზი ბოლო შეკრების ზღვისპირეთში გავლაც იყოს. მოგეხსენებათ,

ნაკრებმა ჯერ ანთალიაში ივარჯიშა ერთობლივ შეკრებაზე, იქიდან დაბრუნებულები კი საქართველოს შავიზღვისპირეთშიც გაჩერდნენ რამდენიმე დღით. ბოლო წლებში ძიუდოდანაც და სხვა ოლიმპიური საჭიდაო სახეობებიდანაც ბევრი მაგალითი გვაქვს, როცა პირველხარისხოვანი ტურნირის წინ ბოლო შეკრების ზღვაზე გავლამ გუნდი, თითქოს, "მოხარშა", ბიჭებს მოძრაობა უჭირდათ, შებოჭილები იყვნენ.

ვფიქრობთ, ეს ცუდი თვისებები ამ გუნდმაც გამოავლინა თელ-ავივში. აბა, როდის გინახავთ ასე უმწეო ვალერი ლიპარტელიანი (100)? არც ოლიმპიური ჩემპიონი ლაშა შავდათუაშვილი (73) ჰგავდა საკუთარ თავს, არც - მსოფლიოს პრიზიორი უშანგი მარგიანი (90), ევროპის ჩემპიონი გურამ თუშიშვილიც (+100) კარგა დამძიმებული ჩანდა, თავისუფლად ვერც ის მოძრაობდა. თან ისრაელშიც თავისებური კლიმატია, ცხელი და ჩახუთული...

პირველ დღეს ვაჟა მარგველაშვილის (66) მარცხი პირველივე წრეში გვემცხეთა, მაგრამ რა ვიცოდით, რომ თურმე მომდევნო დღეებში ჯერ შავდათუაშვილი გაგვაოცებდა ასეთივე წაგებით გერმანელ იგორ ვანდტკესთან, მერე კი ლიპარტელიანიც - ბელარუს დანიელ მუკეტესთან!

ჩვენი ნაკრების მონაგარი მხოლოდ ორი მეხუთე ადგილია, რაც ამირან პაპინაშვილმა (60) და თუშიშვილმა შეძლეს, თუმცა ამაში თავმოსაწონებელი ბევრი არაფერია.

ქართული ფიასკოს ქრონიკა

ნუგზარ ტატალაშვილმა (81) სერბთა მსოფლიოს ფინალისტ სრდან მრვალიევიჩთან იპონი კი მიითვალა, მაგრამ ბულგარელ ივაილო ივანოვთან ვერაფერს გახდა.

მარგიანმა დამატებით დროში ვაზარით დაამარცხა ბელგიელი ევროპის პრიზიორი იოახიმ ბოტიუ, მაგრამ კინაღამ მსაჯმა დაიდო მისი ცოდვა, როცა სრულიად დაუმსახურებლად მისცა მეორე გაფრთხილება. არადა, იმ ეპიზოდში ბელგიელი რამდენჯერმე ჩავარდა კიდეც, უკანაც გადიოდა და პასიურად ჭიდაობდა.

თავიდან მსაჯმა ორივე გააფრთხილა, რაც ბოტიუსთვის მესამე იყო და ხსნიდნენ კიდეც, მაგრამ კომისრებმა ბელგიელს გაფრთხილება მოუხსნეს და რატომღაც, მხოლოდ ჩვენსას დაუტოვეს. კიდევ კარგი, მარგიანმა დამატებით დროში ვაზარი მაინც მოახერხა, თუმცა ბერძენ თეოდოროს ცელიდისთან ვერაფერს გახდა - ვაზარი გაუშვა, რომლის გაქვითვაც ვეღარ მოახერხა.

ვფიქრობთ, ამ შეჯიბრებაზე ბექა ღვინიაშვილს (90) ყველაზე მეტად რაც აკლდა, ეს სატურნირო პრაქტიკა იყო - მოგეხსენებათ, პარიზში მიღებულმა ტრავმამ მას ბევრი გააცდენინა და ევროპამდე არც უჭიდავია არსად. შესაძლოა, მისი ერთგვარი შებოჭილობის მიზეზი სხვა რამეც იყოს, მაგრამ ძველებურად სწრაფი რომ ვერ იყო, ფაქტია. თითქოს "გახსნა" აკლდა.

არადა, ჩემპიონატი მშვენივრად დაიწყო და პირველი შეხვედრა ბრიტანელ ჯამალ პეტრგრეივთან ქრესტომათიული ბრუნით მოიგო: დასრულებამდე 1.10 წუთით ადრე მაღალი ტრაექტორიით ისეთი დააწყვიტა, თელ-ავივის ტატამი ახლაც შველას ითხოვს! პირველი საგანგაშო სიგნალი მეორე შეხვედრაში გაისმა ჩეხ იური პეტრთან, რომელმაც შეხვედრის მიწურულს გარედან გამოკვრით ვაზარი მიითვალა.

კიდევ კარგი, ღვინიაშვილისთვის ჩამორჩენა, როგორც წესი, "წითელი ნაჭერია" და ჩეხიც მალევე გადააგდო ბრუნით ვაზარიზე. შეხვედრა განახლდა თუ არა, პეტრი ზედ მიახტა ჩვენებურს, რომელმაც მყარად ჩაიგდო ხელთ და მორიგი ბრუნით პირდაპირ დააწყვიტა ტატამს. აი, აქედან დადგა ქართველისთვის საბედისწერო ეტაპი:

ჯერ მეოთხედფინალში ვაზარით წააგო რუს მიხაილ იგოლნიკოვთან, მერე კი დამამშვიდებელშიც პირველივე შეხვედრა დათმო ჰოლანდიელ ნოელ ვან ტ ენდთან. ჰოლანდიელთან საკმაოდ სანახაობრივი შეხვედრა იყო, რომელშიც ჩვენებური დაწინაურდა: მკლავიდან დაითრია და ვაზარიზე გადააგორა, თუმცა მერე ზედიზედ ორჯერ გაუშვა კისრული.

გადაულახავი ბარიერი

ღვინიაშვილს იგოლნიკოვი მეტისმეტად საშიშ მეტოქედ ექცა, ვისთანაც ხშირად აგებს. თავის დროზე, ჭაბუკებსა და ახალგაზრდებში ღვინიაშვილი, იმხანად 81-ში მოჭიდავე იგოლნიკოვი და რუსი ირინა დოლგოვა (44) შედიოდნენ იმ დაუმარცხებელ სამეულში, რომელიც ასაკობრივ ნაკრებებში ყველა მნიშვნელოვან ტურნირს იგებდა.

უფროსებში ბექასა და იგოლნიკოვის გზები გადაიკვეთა და რუსი ვარსკვლავის სიშორით წავიდა წინ. სამწუხაროდ, დღევანდელ ღვინიაშვილს მასთან შანსი არ აქვს, რაღაც მკვეთრად თუ არ შეცვალა. რუსი ძალიან ჭკვიანი მოჭიდავეა, შესანიშნავად იყენებს ფეხებს და ჭიდაობისას საოცარ კომბინაციებს აკეთებს, ღვინიაშვილი კი გაცილებით ერთფეროვანია.

თუშიშვილსაც ლამის გადაულახავ ბარიერად ექცა რუსი ტამერლან ბაშაევი, თუმცა თელ-ავივში მასთან ნახევარფინალში მარცხი მაინც მსაჯების შეცდომა მგონია:

გამეორებაზე რამდენჯერმე ვნახე ის ეპიზოდი და როცა რუსი მოძრაობას იწყებს, დრო უკვე ამოწურულია, ტაბლოზე ნულები ანთია ანუ გდება არ უნდა ჩათვლილიყო.

თუმცა იმ ეპიზოდში თუშიშვილმაც დაუშვა დიდი და უპატიებელი შეცდომა - უკვე დროის გასვლაზე ფიქრობდა, ტაბლოსაც კი გახედა და აღარც წინააღმდეგობას უწევდა.

არადა, მარტივი ჭეშმარიტებაა, რომ შეხვედრა მსაჯის სასტვენამდე გრძელდება და ვიდრე ის არ გაისმის, მანამ უნდა იბრძოლო, იომო და შენი ეცადო. მასაც თავი რომ დაეცვა, არ დავარდებოდა. კაცმა არ იცის, დამატებით დროში რა მოხდებოდა, თუმცა სიმართლე უნდა ითქვას და ძირითადში ჩვენებური ილეთის გამკეთებელი არ ჩანდა. მან ვერაფრით აუწყო ჭიდაობა ბაშაევს, ვერ მოარგო მას გასაღები.

თუშიშვილი წაგებას დიდხანს და ენერგიულად აპროტესტებდა, რაც, ცოტა არ იყოს და ბოლო ხანებში დასჩემდა კიდეც. ეს აუცილებლად უნდა მოიშალოს და ისწავლოს ემოციების გაკონტროლება, თორემ სხვა დროს დისკვალიფიკაციას ვერ გადაურჩება.

თუმცა, თქვენი არ ვიცი და მე საეჭვოდ მეჩვენება, მსაჯებმა იმხელა დემარში რომ გაუტარეს და აპატიეს: ეტყობა, სინდისის ქენჯნას ისინიც გრძნობენ ბოლო წამის ეპიზოდის გამო. საეჭვოა ისიც, რომ კომისრებმა ვიდეოზეც კი არ განიხილეს ის საკამათო მომენტი.

ზოგადად, თუშიშვილს არც თავისი საფირმო ჩახტომითი კისრულები გამოსდიოდა ადრინდელივით იოლად, ვერც ფიზიკურად ჩაგრავდა მეტოქეებს, რომ ქვეჭიდში ჩაყვანით მაინც მოეგო.

ეგ კი არა, ისლანდიელ ტორმოდურ იონსონთან გდებაც კი გაუშვა. მართალია, მერე კისრულით იპონზე გადმოიღო, მაგრამ ასეთ მეტოქესთან ქულის დაკარგვა ნამეტანი გვგონია.

მეოთხედფინალში უკრაინელ ალექსანდრ გორდიენკოსაც ჩახტომითი კისრულით აართვა ვაზარი. სამწუხაროდ, ჩვენებური ბრინჯაოსთვის პაექრობაში გაფრთხილებებით მოხსნეს ჰოლანდიელ ხენკ ხროლთან შეხვედრაში.

ესეც სიმპტომურად ხომ არ იქცა ამ უნიჭიერესი სპორტსმენისთვის? უკვე მერამდენედ, ნახევარფინალში თუ წააგო, მორჩა, მერე აგებს ყველაფერს. ზოგადადაც, მისი ბოლოდროინდელი ჭიდაობა აშკარად უკეთესის სურვილს იწვევს.

გავიხსენოთ, როგორ გაუჭირდა მოგება თბილისში ირანელ ჯავად მაჰჯუბთან, რაც ადრე გამორიცხული იყო. თითქოს ისე ჩანს, რომ მსოფლიოს ჩემპიონატზე ტედი რინერისთან იმ წაგებას შეალია ყველაფერი და მას შემდეგ ძალა ვერ მოიკრიბა.

ერთი სიტყვით, აღთქმული მიწა ქართული ძიუდოსთვის სულაც ვერ გამოდგა აღთქმული და იქ გამართული ევროპის ჩემპიონატი გოდებისა და ვაების ტურნირად უფრო გვექცა. თუმცა იქნებ კიდეც ჯობდეს, ჩავარდნა ახლა რომ მოხდა და ნაკლოვანებები გამომზეურდა - სალიცენზიო ტურნირები ჯერ კიდევ არ დაწყებულა და მსოფლიოს ჩემპიონატამდეც რჩება დრო შეცდომების გამოსასწორებლად.
ირაკლი თავაძე


73 კგ.
1. ფერდინანდ კარაპეტიანი (სომხეთი); 2. ჰიდაიეტ ჰეიდაროვი (აზერბაიჯანი); 3. ბილალ ჯილოღლუ (თურქეთი), ტომი მაკიასი (შვედეთი).

81 კგ.
1. საგი მუკი (ისრაელი); 2. სამი ჩოუჩი (ბელგია); 3. ანტონიო ესპოზიტო (იტალია), ასლან ლაპინაგოვი (რუსეთი).

90 კგ.
1. მიხაილ იგოლნიკოვი (რუსეთი); 2. ნემანია მაიდოვი (სერბეთი); 3. ნიკოლოს შერაზადიშვილი (ესპანეთი), თეოდოროს ცელიდისი (საბერძნეთი); 7. ბექა ღვინიაშვილი (საქართველო).

100 კგ.
1. ტომა ნიკიფოროვი (ბელგია); 2. სირილ მარე (საფრანგეთი); 3. ზელიმ კოცოევი (აზერბაიჯანი), პეტერ პალჩიკი (ისრაელი).

+100 კგ.
1. ლუკაშ კრპალეკი (ჩეხეთი); 2. ტამერლან ბაშაევი (რუსეთი); 3. ხენკ ხროლი (ჰოლანდია), სტეფან ჰეგი (ავსტრია); 5. გურამ თუშიშვილი (საქართველო).

ყოველდღიური სპორტული გაზეთი "ლელო"
1256
მკითხველის კომენტარები / 0 /
მსგავსი ამბები
რუბრიკის სხვა სიახლეები