"გოლდენ გორი" - გორში ძიუდოს კლუბი დაფუძნდა

გორში ძიუდოს კლუბი "გოლდენ გორი" დაფუძნდა. ტიტულოვანი სპორტსმენებით ცნობილ ამ ქალაქში ძიუდოს ისეთი კლუბი, რომელიც ევროპისა და მსოფლიოს უმთავრეს საკლუბო შეჯიბრებებზე მიიღებდა მონაწილეობას აქამდე არასოდეს ყოფილა. მართალია სახელოვანი გორელი ძიუდოისტები იღებდნენ მონაწილეობას ევროპის და მსოფლიოს საკლუბო ჩემპიონატებზე, მაგრამ მხოლოდ სხვა კლუბების სახელით. ამიერიდან ისინი საქართველოს ნაკრების წევრობასთან ერთად მშობლიური ქალაქის ღირსებას დაიცავენ.

"გოლდენ გორის" შემადგენლობაში შევიდნენ ვაჟა მარგველაშვილი (66 კგ), ლაშა შავდათუაშვილი (73), ლუკა მაისურაძე (81), ბექა ღვინიაშვილი (90) და უშანგი კოკაური (+90).

კლუბის დამფუძნებელი გორის მუნიციპალიტეტის მერიაა და იგი გორის მუნიციპალიტეტის სპორტის განვითარების და ხელშეწყობის სააგენტოს შემადგენობაში შევა. პრეზენტაციაც დღეს სწორედ ამ სააგენტოში გაიმართა.

პრეზენტაციაზე მედიასთან და გულშემატკივრებთან ისაუბრეს შიდა ქართლის სამხარეო ადმინისტრაციის ხელმძღვანელმა გიორგი ხოჯევანიშვილმა, რომელი ამ კლუბის დაარსების ერთ-ერთი ინიციატორი გახლდათ, ქალაქის მერმა კონსტანტინე თავზარაშვილმა, საქართველოს ძიუდოს ფედერაციის პრეზიდენტმა გიორგი ათაბეგაშვილმა და გორის სპორტის სააგენტოს დირექტორმა გიორგი პურიჭამიაშვილმა.

პრეზენტაციას ძიუდოისტები ბექა ღვინიაშვილი და ლუკა მაისურაძეც ესწრებოდნენ. (სხვა წევრებიდან მარგველაშვილი და შავდათუაშვილი ამჟამად ჰააგაში ასპარეზობენ, კოკაური კი აზერბაიჯანის ნაკრების წევრია და "გოლდენ გორს" უშუალოდ საკლუბო შეჯიბრებაზე შეუერთება).


"ჩვენ არაერთხელ მიგვიღია მონაწილეობა სხვადასხვა საკლუბო შეჯიბრებებში, ოღონდ არა ჩვენი ქალაქის სახელით და ხშირად გვინატრია რომ იგივე ჩვენი ქალაქის სახელითაც შეგვძლებოდა. ძალიან მიხარია, რომ ახლა უკვე დიდ საკლუბო შეჯიბრებებზე "გოლდენ გორის" სახელით გამოვალთ და რა თქმა უნდა ყველაფერს გავაკეთებთ წარმატების მოპოვებლად" - აღნიშნა ბექა ღვინიაშვილმა.

"მივესალმებით გორში ძიუდოს კლუბის დაარსებას. კარგია, რომ გორის ძიუდოს სკოლის აღზრდილი სპორტსმენები თავისი ქალაქის ღირსებას დაიცავენ. ყველა მათგანი უძლიერესი და ტიტულოვანი ძიუდოისტია და მათგან როგორც გორი, ისევე საქართველო ცხადია მხოლოდ წარმატებებს ელის" - თქვა გიორგი ათაბეგაშვილმა.

"ჩვენი ქალაქი ამაყობს თავისი ძიუდოისტებით. ისინი მოგეხსენებათ მხოლოდ სანაკრებო შეჯიბრებებზე არ გამოდიან და საკლუბო შეჯიბრებებშიც ასპარეზობენ. თუმცა საკლუბო შეჯიბრებებზე აქამდე მუდამ სხვა ქალაქის (საქართველოს, თუ უცხოეთის) ღირსებას იცავდნენ, ამიტომ სურვილი გვქონდა გორშივე დაგვეარსებინა კლუბი, რომელიც მაღალი რანგის საკლუბო ჩემპიონატებზე მიიღებდა მონაწილეობას. ახლა "გოლდენ გორი" დაფუძნდა და ჩვენი ძიუდოისტები ჩვენს ნაკრებთან ერთად თავისი ქალაქის სახელსაც აიტანენ სპორტულ მწვერვალებზე" - თქვა კონსტანტინე თავზარაშვილმა.

"გოლდენ გორი" უახლოეს მომავალში უკვე პირველივე შეჯიბრებაში მიიღებს მონაწილეობას. 8-9 დეკემბერს ბუქარესტში გაიმართება ევროპის საკლუბო ლიგის გათამაშება. გორელი ფალავნები ახალი კლუბის სახელით პირველად სწორედ იქ იასპარეზებენ.

1312
მკითხველის კომენტარები / 0 /
მსგავსი ამბები
რუბრიკის სხვა სიახლეები
;