გორგოძისა და ჩილაჩავას წყვილი ლელო ჩემპიონთა თასის გათამაშებაში

ჩემპიონთა თასის გათამაშებაში მეოთხე ტურის შეხვედრები გაიმართა. ჯგუფური ტურნირის დასრულებამდე ორი ტურით ადრე პლეი ოფში გასვლის რეალური შანსი ქართველ მორაგბეთა მხოლოდ ორ გუნდს აქვს. ესენია: "რასინგი" და "მონპელიე".

ვასილ კაკოვინისა და გურამ გოგიჩაშვილის "რასინგი" ერთადერთი ქართული გუნდია, რომელმაც ოთხი თამაშიდან ოთხივე მოიგო და თავისი ჯგუფის ლიდერია. პარიზელებმა მე-4 ტურში სტუმრად ითამაშეს ინგლისურ "ლესტერთან" და 34:11 მოიგეს. გოგიჩაშვილი ძირითად შემადგენლობაში იყო და 49-ე წუთზე ის კაკოვინმა შეცვალა.

D ჯგუფს "რასინგი" 19 ქულით ლიდერობს. მას ექვსი ქულით ჩამორჩება ირლანდიური "ალსტერი", რომელმაც შინ შეძლო უელსური "ჰლანეჰლის" დამარცხება - 30:15. მომდევნო ტურში, "რასინგი" სწორედ "ალსტერთან" სტუმრობს.

E ჯგუფში მოასპარეზე მიხეილ ნარიაშვილის, კონსტანტინე მიქაუტაძის, ლევან ჩილაჩავასა და გელა აფრასიძის "მონპელიემ" ოთხი თამაშიდან ორი მოიგო და მე-2 ადგილზეა. მონპელიელებმა ამჯერად მამუკა გორგოძისა და ბადრი ალხაზაშვილის "ტულონს" უმასპინძლეს და მეტოქე 34:13 დაამარცხეს.

აღსანიშნავია, რომ გორგოძემ, რომელმაც სრულად ითამაშა, 55-ე წუთზე ლელო გაიტანა. ეს ტულონელთა ერთადერთი ლელო იყო ამ მატჩში. მას არც "მონპელიეს" შერკინების ქართველი ბურჯი, ლევან ჩილაჩავა ჩამორჩა. ის მოედანზე 57-ე წუთზე გამოჩნდა და მატჩის დასრულებამდე ორი წუთით ადრე ლელო მიითვალა.

ნარიაშვილი, რომელიც ძირითად შემადგენლობაში იყო, 63-ე წუთზე შეცვალეს, სამ წუთში თამაშში კონსტანტინე მიქაუტაძე ჩაერთო.

"მონპელიეს" ახლა ოთხი ქულით უსწრებს შოტლანდიური "ედინბურგი", რომელმაც სტუმრად შეძლო ინგლისური "ნიუკასლის" დამარცხება - 21:8. "ტულონს", რომელიც 6 ქულით ბოლო ადგილზეა, მომდევნო ეტაპზე გასვლის მხოლოდ თეორიული შანსი აქვს.

სრულიად უშანსოდაა დარჩენილი A ჯგუფში მოასპარეზე ზურაბ ჟვანიას "ვოსფსი", რომელმაც მე-4 ტურში სტუმრად წააგო ლიდერ "ტულუზთან" - 27:42. ჟვანია თადარიგში იყო და თამაშში 52-ე წუთიდან ჩაერთო.

"ჩელენჯ კაპის" გათამაშებაში ოთხი ტურის შემდეგ პლეი ოფში გასვლის რეალური შანსი ქართველ მორაგბეთა ოთხ გუნდს აქვს. ესენია: "კლერმონი", "ოსფრიზი", "აჟენი" და "გრენობლი".

დავით ზირაქაშვილის, ვიქტორ კოლელიშვილისა და ბექა კაკაბაძის "კლერმონმა", რომელიც A ჯგუფში დაუმარცხებლად ასპარეზობს, შინ მოუგო უელსურ "ნიუპორტს" - 49:24. ქართველ მორაგბეებს არ უთამაშიათ. "ვულკანების" კონკურენტი აქ ინგლისური "ნორსჰემპთონია", რომელიც ჩვენებურთა გუნდს ხუთი ქულით ჩამორჩება.

E ჯგუფში, სადაც ქართველ მორაგბეთა გუნდები "აჟენი" და "გრენობლი" ასპარეზობენ, პირველ ადგილზე გასვლის შანსი ოთხივე გუნდს თანაბრად აქვს. მეოთხე ტურში გიორგი თეთრაშვილისა და თამაზ მჭედლიძის "აჟენმა" და ბექა გიგაშვილისა და დავით ქუბრიაშვილის "გრენობლს" უმასპინძლა და 14:10 დაამარცხა. ქართველებიდან მხოლოდ მჭედლიძემ ითამაშა, რომელმაც მოედანზე თავიდან ბოლომდე დაჰყო.

ამ ჯგუფში ლიდერი ინგლისური "ჰარლიქვინზია", რომელსაც 11 ქულა აქვს, მას ერთი ქულით ჩამორჩება იტალიური "ბენეტონი". "აჟენმა" და "გრენობლმა" ცხრა-ცხრა ქულა დააგროვეს.

თავიანთი პირველი მატჩები მოიგეს "სტად ფრანსემ" და "ბორდომ". გიორგი მელიქიძის პარიზულმა გუნდმა შინ დაამარცხა გიორგი ნემსაძის "ოსფრიზი" - 12:3. მელიქიძე თამაშში 67-ე წუთიდან ჩაერთო, ნემსაძე განაცხადში არ იყო. ოსფრიზელები მეორე ადგილზე არიან და ჯგუფიდან გასვლის კარგი შანსი აქვთ. პარიზელები ხუთი ქულით ბოლო ადგილზე არიან.

ლექსო ყაულაშვილის, ბექა გორგაძისა და ლაშა ტაბიძის "ბორდომ" სტუმრად მოუგო ინგლისურ "სეილ შარქსს" - 17:14. ტაბიძე ძირითად შემადგენლობაში იყო და 62-ე წუთზე შეცვალეს, გორგაძე მოედანზე 46-ე წუთიდან გამოჩნდა, ყაულაშვილი ტრავმირებულია. ბორდოელები 6 ქულით მესამე ადგილზე არიან.

ისევ დამარცხდა მიხეილ გაჩეჩილაძის, შალვა მამუკაშვილისა და დავით კაჭარავას "ენისეი". კრასნოიარსკელებმა იტალიაში, "ზებრესთან" 14:58 წააგეს. გაჩეჩილაძემ სრულად ითამაშა, მამუკაშვილი მოედანზე 59-ე წუთიდან გამოჩნდა, კაჭარავა ტრავმირებულია. "ენისეის" 1 ქულა აქვს.

ყოველდღიური სპორტული გაზეთი "ლელო"
688
მკითხველის კომენტარები / 0 /
მსგავსი ამბები
რუბრიკის სხვა სიახლეები
;