გორის "დილამ" თანაქალაქელები დააწიოკა

გუშინ გორში თანაქალაქელმა გუნდებმა ამხანაგური მატჩი გამართეს. უმაღლესი ლიგის ბინადარმა "დილამ" მესამელიგელი "გორი" 6:1 დაამარცხა.

შეგახსენებთ, რომ "დილამ" მოახლოებული ჩემპიონატისთვის ორი მოსამზადებელი შეკრება გაიარა: პირველი - გორში, ხოლო შემდეგ - თურქეთში. ჩაატარა 8 ამხანაგური მატჩი, რომელთაგან 5 მოიგო, ხოლო სამში მარცხი იწვნია.

გუშინდელ სპარინგს რაც შეეხება, "დილას" მხრივ გოლები ფანცულაიამ (3), კორიფაძემ, სამუშიამ და აშორტიამ გაიტანეს, ხოლო "გორისგან" თავი ოქროპირიძემ გამოიჩინა.

დილა: ბეგაშვილი, კორიფაძე, კვახაძე, ჯ. გოგიაშვილი, სუხიაშვილი, რაზმაძე, რაჟამაშვილი, ფანცულაია, ნონიკაშვილი, კოვტალიუკი, ქავთარაძე; შეცვლაზე შევიდნენ: გულუაშვილი, აშორტია, კერელეიშვილი, ჩადუნელი, სამუშია, ფორტესი, ნონდი, ისიფუ, გორდულავა.

გორი: ბოლოთაური, ლომიძე, ოქროპირიძე, კალხიტაშვილი, კურმაშვილი, ელიაური, მაჭარაშვილი, სირბილაძე, ნოზაძე, კაპანაძე, სადაღაშვილი; შეცვლაზე: ა. გოგიაშვილი, ბუზალაძე, იაია, მაიკი, დადიანი, პაბლო.


ვისარგებლეთ შემთხვევით და მატჩის შემდეგ "დილას" გამოცდილ ნახევარმცველ ლუკა რაზმაძეს გუნდის მზადების თაობაზე გავესაუბრეთ...

- ჩვენს ჩემპიონატში ერთ-ერთი ყველაზე გამოცდილი ფეხბურთელი ხართ და სასიამოვნოა, რომ ასაკის (34) მიუხედავად, "დილას" შემადგენლობაში ისევ მყარად დგახართ...

- შემართება და თამაშის სურვილი ისევ მაქვს, ამასთან, ბუნებრივია მაქსიმალურად შევეცდები, მწვრთნელების ნდობა გავამართლო, თავს არ ვზოგავ, აქტიურად ვვარჯიშობ... მინდა, თანაგუნდელებს წლეულსაც გვერდში დავუდგე.

- ეს ორი შეკრება რამდენად პროდუქტიული იყო?

- ვფიქრობ, ორივე შეკრება საკმაოდ ნაყოფიერი გამოდგა. ამხანაგურ შეხვედრებშიც არ წარმოგვიჩენია თავი ურიგოდ. ეს ეტაპი შეთამაშების თვალსაზრისითაც გამოგვადგება, რადგან ახალწვეულები თანდათან გაუშინაურდებიან გუნდს. ყოველივე ამის გათვალისწინებით, მიმაჩნია, რომ სეზონის სტარტს კარგ ფორმაში ვხვდებით.

- თურქულ შეკრებაზე ერთ-ერთ მატჩში უნგრულ მტკ-სთან 5:0 იმარჯვეთ, ბოლო სპარინგში კი "ორენბურგთან" 0:4 დამარცხდით. რამ გამოიწვია ასეთი კონტრასტი?

- საერთოდ, ყველა მატჩში კარგი მოწინააღმდეგები გვყავდა და თავდაუზოგავად, სრული დატვირთვით ვთამაშობდით. უნგრელებთან რომ საუკეთესოდ წარმოვაჩინეთ თავი, ამას ანგარიშიც მეტყველებს.

შეუძლებელია 5:0 მოგებული თამაშით უკმაყოფილო ვიყოთ, მაგრამ "ორენბურგთან" პაექრობა არ იყო ის, სადაც ჩვენი შესაძლებლობები სრულად ვაჩვენეთ. თანაც, დილით და უკვე წამოსვლის წინ ვითამაშეთ, რის გამოც კონცენტრირება გაგვიჭირდა.

- სიახლე "დილას" სამწვრთნელო შტაბშიცაა, რომელსაც ახალგაზრდა მწვრთნელები - ირაკლი მოდებაძე და გიორგი შაშიაშვილი დაემატნენ...

- მოდებაძე და შაშიაშვილი გვერდში უდგანან გიორგი დარასელიას. ისინი ძალიან მონდომებულები არიან და იმედი მაქვს მთელი სამწვრთნელო შტაბის შრომა, ისევე, როგორც ყველა ფეხბურთელის გარჯა, წარმატებებს მოუტანს "დილას".

- რისი იმედი უნდა ჰქონდეს გორელ გულშემატკივარს, რისთვის იბრძოლებს გუნდი?

- რა თქმა უნდა, მხოლოდ მაღალი მიზნებისთვის.

ვასილ ბალახაძე
გორიდან 

ყოველდღიური სპორტული გაზეთი "ლელო"
1358
მკითხველის კომენტარები / 0 /
მსგავსი ამბები
რუბრიკის სხვა სიახლეები
;