გოჩა სვანიძემ საქართველოს რაგბის კავშირის პრეზიდენტის პოსტი დატოვა... ვინ შეცვლის? როდის გაიმართება არჩევნები?

გოჩა სვანიძემ რაგბის კავშირის პრეზიდენტის პოსტი დატოვა. მიზეზად ქართული რაგბის სამყაროში არსებული კრიზისი დასახელდა. კერძოდ, ის, რომ ვერ მოხერხდა საქართველოს ჩემპიონატის განახლება.

რაგბის კავშირს ყრილობამდე დროებითი საბჭო უხელმძღვანელებს.

რაგბის კავშირის გამგეობის სხდომა ორშაბათს, 3 აგვისტოს გაიმართება, სწორედ იქ უნდა მიიღონ ფედერაციის პრეზიდენტის გადადგომა. ბევრი რამ სწორედ ორშაბათს გაირკვევა.

2016 წელს გოჩა სვანიძემ რაგბის კავშირის პრეზიდენტის პოსტზე გია ნიჟარაძე შეცვალა. მისი პრეზიდენტობის პერიოდში თბილისში ჩატარდა მსოფლიოს 20-წლამდელთა ჩემპიონატი, საქართველოს ნაკრებმა იასპარეზა მსოფლიოს თასზე, სადაც ჯგუფში მეოთხე ადგილი დაიკავა. აღსანიშნავია სამხრეთ აფრიკის რაგბის კავშირთან გაფორმებული სტრატეგიული ხელშეკრულება, რაც პრაქტიკაში უკვე ხორციელდება.

ეპოქალური ხელშეკრულება ქართული რაგბისთვის - ბორჯღალი და ქურციკი დაძმობილდნენ

რაგბის კავშირის არჩევნები 2020 წელსაა დაგეგმილი და აქამდეც უნდა გამართულიყო, თუმცა 30 იანვარს დანიშნული არჩევნები, 24 თებერვლისთვის გადაიდო. რაგბის კავშირის გამგეობის თავმჯდომარის, დიმიტრი კალანდაძის განცხადებით, იანვარში არჩევნების ვადის გადაწევის თხოვნით მათ ორმა საპრეზიდენტო კანდიდატმა მიმართა:

"საქართველოს რაგბის კავშირის გამგეობის სახელზე ორი საპრეზიდენტო კანდიდატის - ბაჩო ხურციძის და ირაკლი აბუსერიძის განცხადება შემოვიდა. გამგეობის სხდომა გუშინ ჩატარდა და იმისათვის, რომ საპრეზიდენტო კანდიდატებს თავიანთი კამპანიის ჩასატარებლად მეტი დრო ჰქონდეთ, წესდებით გათვალისწინებულ ვადებში, მივიღეთ საპრეზიდენტო არჩევნების 24 თებერვალს გადატანის გადაწყვეტილება".

პრეზიდენტობის კანდიდატი იყო მოქმედი პრეზიდენტი გოჩა სვანიძეც.

[VIDEO] რატომ ჩაიშალა რაგბის კავშირის პრეზიდენტის არჩევნები?

მოვიდა 24 თებერვალი და არჩევნები მაინც არ შედგა - ჩაიშალა. ამის მიზეზი ქვორუმის არარსებობა გახლდათ. კენჭს ზემოთ დასახელებული 3 კანდიდატი იყრიდა. არჩევნები გაზაფხულისთვის იგეგმებოდა, მაგრამ კორონავირუსის პანდემიამ კიდევ ერთხელ ჩაშალა.

გოჩა სვანიძის 30 ივლისის განცხადების შემდეგ კი, ცხადია, მომავალ არჩევნებში ის მონაწილეობას აღარ მიიღებს და გადადგომის მიზეზზე კომენტარსაც ჯერ არ აკეთებს. როგორც აღვნიშნეთ, 3 აგვისტოს გამგეობის სხდომაზე გაირკვევა, ვინ უხელმძღვანელებს რაგბის კავშირს არჩევნებამდე და როდის გაიმართება ეს არჩევნები. ერთი რამ გარკვეულია - რაგბის კავშირის არჩევნები 2020 წელს ჩატარდება.

4245
მკითხველის კომენტარები / 0 /
მსგავსი ამბები
რუბრიკის სხვა სიახლეები
;