გრიგოლ დოლიძე: ფეხბურთიდან ტიტულები და სტატისტიკა დამრჩება

საქართველოს დავით ყიფიანის სახელობის თასის ფინალში ქუთაისის "ტორპედო" და საჩხერეს "ჩიხურა" ითამაშებენ. ქუთაისელები თავისი არსებობის ისტორიაში ფინალში მერვედ გავიდნენ, ხოლო "ტორპედოს" ფლანგის შემტევი ნახევარმცველი გრიგოლ (ირაკლი) დოლიძე - მეშვიდედ. მას თასის მოგების სიხარულიც განუცდია და ფინალში წაგების სიმწარეც ახსოვს.

გუშინდელ ნახევარფინალში დოლიძეს თბილისის "დინამოს" კარის აღება ძირითად დროში ორჯერ შეეძლო, მაგრამ ამ შესაძლებლობებით ვერ ისარგებლა. პენალტების სერიაში კი თავისი შანსი გოლად აქცია და "ტორპედოს" ფინალში გასვლაში დაეხმარა.

- ტორპედო-დინამო (თბ) 0:0 (პენ. 5:4) - კვასხვაძემ მოიგერია, ტაბატაძემ გადაწყვიტა [VIDEO]

გრიგოლ დოლიძეს მატჩის შემდეგ ინტერვიუ ვთხოვეთ...

- გილოცავთ ფინალში გასვლას! საკმაოდ მძიმე თამაში გამოდგა...
- "ტორპედო"-"დინამოს" სხვაგვარი თამაში წარმოუდგენელიც იყო. ჩვენ ამხანაგურიც რომ ვითამაშოთ, ისიც დაძაბული იქნება. ახლა კი თასის ფინალში გამსვლელის ვინაობა ირკვეოდა. მიმაჩნია, რომ ძალიან კარგი თამაში გამოდგა, თანაც ისეთი დასასრული ჰქონდა, თასის ნახევარფინალს რომ უხდება.

- ზედიზედ მეორედ ნახევარფინალში "დინამოს" დამარცხება ძალიან რთულია. რას ფიქრობთ, რის ხარჯზე მოიგეთ?
- "დინამოსთან" შარშანაც ურთულესი შეხვედრა ჩავატარეთ. მაშინ ძირითად დროში მოვიგეთ. მაგრამ ახლანდელი გამარჯვება არანაკლებ ძვირფასია, რადგან ახლაც ფინალში გავედით. მოგება დიდი მონდომების ხარჯზე მოვიპოვეთ და გულშემატკივარმა დიდი დახმარება გაგვიწია. "ტორპედოს" გამორჩეული ფანობა ჰყავს და მათი თანადგომა თითოეული ჩვენგანისთვის ძალიან ბევრს ნიშნავს.

- წლევანდელ თასის ფინალში შარშანდელზე ძლიერი მეტოქე გეყოლებათ. ეროვნულის მონაწილე საჩხერეს "ჩიხურა" სათასო გუნდია და ბევრად რთული მატჩი გელით.
- "ჩიხურა" მართლაც კარგი გუნდია და ბოლო წლებში ფინალში რამდენჯერმე გავიდა. დიდი იმედი მაქვს, რომ ფინალზე ბევრი მაყურებელი მოვა და სანახაობრივ ფეხბურთს ვაჩვენებთ.

- თუ არ მეშლება, თასის ფინალში თამაშების რაოდენობით ერთ-ერთი რეკორდსმენი გახდი.
- რეკორდსმენი?

- როგორც მახსოვს, ყველაზე მეტჯერ, 7-ჯერ ფინალში "დინამოს" მეკარე ირაკლი ზოიძემ და "ამერში" თქვენმა ყოფილმა თანაგუნდელმა თენგიზ ჩიკვილაძემ ითამაშეს. ახლა თქვენც ანალოგიური მაჩვენებელი გაგიხდათ...
- ფინალში ყველაზე მეტჯერ ვინ ითამაშა, ამის ზუსტი სტატისტიკა არ ვიცოდი. მეშვიდედ ხომ? მართალია. ახლა გამახსენდა, რომ ზესტაფონში მე-6 ფინალი ჩავატარე. 3 ფინალი "ამერში" ვითამაშე, ორი - ქუთაისის "ტორპედოში", ერთი - "სამტრედიაში".

- თასი რამდენჯერ მოიგეთ?
- ამ 6 ფინალიდან 3 მოვიგე, ორი "ამერში", ერთი "ტორპედოში" და სამში დავმარცხდი. მე ის მახარებს, რომ კარიერას მალე დავასრულებ და მერე ფეხბურთიდან რა დამრჩება? ტიტულები და მსგავსი სტატისტიკა.

- პირველი ფინალი თუ გახსოვთ?
- კი, აბა? "ამერში" რომ ვიყავი, 2006 წელს "ზესტაფონს" ძირითად დროში ვერ მოვუგეთ, 2:2 დავამთავრეთ და პენალტებში 4:3 ვაჯობეთ. მაგრამ მაშინ პენალტი არ დამირტყამს.

- შეგეშინდათ?
- არა, უბრალოდ, მაშინ ახალგაზრდა ვიყავი და პენალტებს სხვები ასრულებდნენ.

- "დინამოსთან" დარტყმამდე ინერვიულეთ?
- პენალტი ყოველთვის სანერვიულოა. თანაც ისეთ დროს დავარტყი, რომ არ გამეტანა, ფინალში "დინამო" გავიდოდა. მაგრამ გამბედაობა მეყო და საბედნიეროდ, გავიტანე.

ყოველდღიური სპორტული გაზეთი "ლელო"
2558
მკითხველის კომენტარები / 0 /
მსგავსი ამბები
რუბრიკის სხვა სიახლეები
;