გრიზმანისა და ბარსას  წინააღმდეგ საქმე აღძრეს ...ბარსელონამ კი პარიზელებს ახალი წინადადებით  მიმართა, კლუივერტისთვის პოსტი გაამზადა 

ესპანეთის ფეხბურთის ფედერაციამ საქმე აღძრა ფორვარდ ანტუან გრიზმანისა და მისი ახალი კლუბის “ბარსელონას” წინააღმდეგ.

გაზეთ AS-ის ინფორმაციით, მიზეზი გახდა მადრიდის “ატლეტიკოს” სარჩელი. “ბარსელონამ” გრიზმანის სანაცვლოდ მადრიდულ კლუბს 120 მილიონი ევრო გადაუხადა, მაგრამ “ატლეტიკო” კიდევ 80 მილიონს ითხოვს, რადგან მიაჩნია, რომ 28 წლის ფეხბურთელთან კატალონელებმა მაშინ დაიწყეს მოლაპარაკებები, როცა გამოსასყიდი თანხა ჯერ კიდევ 200 მილიონი ევრო იყო.

ესპანეთის ფეხბურთის ფედერაცია უახლოეს დროში გაიწყებს გამოძიებას და დაადგენს - იყო თუ არა დარღვევა მოლაპარაკებების დროს.
ამასობაში, “ბარსელონა” არ აპირებს დანებებას და ისევ ცდილობს “პარი სენ-ჟერმენის” ფორვარდის ნეიმარის გადაბირებას.

ესპანური პრესის ცნობით, კატალონიური გრანდის ხელმძღვანელობამ ახალი წინადადება მოამზადა ფრანგული კლუბისთვის: 100 მილიონი ევრო და ორი ფეხბურთელი.

პარიზელებს ამ ორი მოთამაშის არჩევა ოთხი ფეხბურთელიდან შეუძლიათ. ესენი არიან: ფილიპე კოუტინიო, ივან რაკიტიჩი, ნელსონ სემედუ და მალკომი. საინტერესოა, რომ კოუტინიო და რაკიტიჩი არ აპირებენ ამ ზაფხულს “ბარსელონას” დატოვებას, რამაც შეიძლება გაართულოს 27 წლის ბრაზილიელის დაბრუნება.

კიდევ ერთი ამბავი კატალონიურ გრანდზე: “ბარსელონასა” და ჰოლანდიის ნაკრების ყოფილმა ფორვარდმა პატრიკ კლუივერტმა, შესაძლოა, კატალონიურ გრანდში თანამდებობა მიიღოს, - წერს გამოცემა Diario Sport.

ამ მომენტისთვის, “ბარსელონაში” მიმდინარეობს ახალგაზრდული აკადემიის რეკონსტრუქცია და კლუივერტი განიხილება “ლა მასიას” დირექტორის პოსტზე ერთ-ერთ ძირითად კანდიდატად. აღნიშნული რეკორსტრუქციის რანგში, ამ დღეების კლუბის ყოფილი მეკარე ვიქტორ ვალდესი 19-წლამდელთა გუნდის მწვრთნელად დაინიშნა.

გასულ კვირას, 43 წლის კლუივერტი კამერუნის ნაკრების სამწვრთნელო შტაბიდან დაითხოვეს. ის თავისი თანამემამულის კლარენს ზეედორფის ასისტენტად მუშაობდა.

პატრია კლუივერტს “ბარსელონაში” 259 მატჩი ჩაუტარებია. მის ანგარიშზეა 123 გოლი და 61 შედეგიანი პასი. ჰოლანდიელი “ბარსელონას” ისტორიაში მეხუთე ბომბარდირია სამუელ ეტო’ოს (130), რივალდოს (133), ლუის სუარესისა (177) და ლიონელ მესის (603) შემდეგ.

ყოველდღიური სპორტული გაზეთი "ლელო"
381
მკითხველის კომენტარები / 0 /
მსგავსი ამბები
რუბრიკის სხვა სიახლეები
;