გრიზმანი, საული, იოვიჩი, ჰადსონ-ოდოი... 'ბაიერნი' ზაფხულში რეკორდებს გვპირდება, - ანტუანს ტიტული უნდა

“ბაიერნი” ჩემპიონთა ლიგას მერვედფინალური სტადიიდან გამოეთიშა. რა თქმა უნდა, ეს მიუნხენური კლუბის ხელმძღვანელობისა და გულშემატკივრებისთვის ნამდვილი ტრაგედიაა.

“ბაიერნის” პრეზიდენტმა ული ჰიონესმა მეტად ამბიციური განცხადება გააკეთა - ზაფხულში ძალიან აქტიურები ვიქნებით სატრანსფერო ბაზარზე და ისტორიაში სარეკორდო თანხას დავხარჯავთ ახალი ფეხბურთელების შესაძენად.

ფული დღევანდელ ფეხბურთში ძალიან ბევრს წყვეტს და შეიძლება თამამად ითქვას, რომ “ბაიერნის” ცხოვრებაში ახალი ხანა იწყება - ხანა, რომელიც ბევრ საინტერესოს გვიქადის. ეს წერილი იმ ფეხბურთელებს ეძღვნებათ, რომლებიც, დიდი ალბათობით, შეავსებენ მიუნხენური გრანდის შემადგენლობას.

41,5 მილიონი ევრო - ამდენი გადაიხადა “ბაიერნმა” “შტუტგარტის” ფრანგ ლიდერ ბენჟამინ პავარში. 22 წლის პავარი რუსულ მუნდიალზე საფრანგეთის ნაკრების ძირითადი შემადგენლობის ფეხბურთელი იყო და თავი შესანიშნავად წარმოაჩინა. სწორედ მან გაუტანა ულამაზესი გოლი არგენტინის ნაკრებს...

“ბაიერნი” ყველაფერს გააკეთებს იმისთვის, რომ ხელში ჩაიგდოს მადრიდის “ატლეტიკოსა” და საფრანგეთის ნაკრების ლიდერი, 28 წლის ანტუან გრიზმანი. გასული სეზონის დასრულების შემდეგ გრიზმანი ყველაზე მიმზიდველი ფიგურა გახლდათ სატრანსფერო ბაზარზე. მაშინ გრიზმანმა “ბარსელონაში” გადასვლაზე ბოლო წამს თქვა უარი და “ათლეტებს” უერთგულა.

ძალიან ძნელი გამოსაცნობია, რა იქნება ამ ზაფხულს. დიდი ალბათობით, გრიზმანი დატოვებს “ატლეტიკოს” და შეიცვლის ატმოსფეროს. ეს “ბაიერნისთვის” კიდევ ერთი მშვენიერი შანსია.

120 მილიონი ევრო - ეს თანხა უნდა გადაიხადოს კლუბმა, რომელსაც გრიზმანის სამსახური სურს. რა თქმა უნდა, თანხა ძალიან დიდია, მაგრამ ამ გადასახედიდან შეუძლებლად არაფერი მოსჩანს. მით უმეტეს, ჰიონესის განცხადებით, კლუბი რეკორდების მოხსნას აპირებს. ეს ზუსტად ის შესაძლებლობაა, რომლის ხელიდან გაშვება არ ღირს.

რა თქმა უნდა, თანხა ძალიან დიდია, მაგრამ ამასთან ერთად არც ის უნდა დავივიწყოთ, თუ რამხელა სარგებლობა შეუძლია მოუტანოს გრიზმანმა “რეკორდმაისტერს”. ფრანკ რიბერისა და არიენ რობენის შემდეგ, “ბაიერნს” ახალი ლიდერი ჰყავს საძებარი. გრიზმანს თავისუფლად შეუძლია ამ ტვირთის ზიდვა, რადგან ძლიერი ინდივიდუალისტია და ამასთანავე მუდამ ითვალისწინებს გუნდის ინტერესებს.

გრიზმანს ძალიან უნდა ტიტულის მოგება და “ბაიერნში” ის ამას ასპროცენტიანი ალბათობით შეძლებს. სასწაული უნდა მოხდეს, “რეკორდმაისტერმა” გერმანიის ჩემპიონობას ვერ უწიოს. მით უმეტეს, იმ მოცემულობაში, როცა მისი შემადგენლობა გაცილებით ძლიერი იქნება, ვიდრე არის დღეს.

აქვე ვთქვათ, რომ “ბაიერნში” გადაწყვეტილია “ატლეტიკოს” მცველის, 23 წლის ლუკას ერნანდესის ტრანსფერის საკითხიც. ახალგაზრდული ასაკის მიუხედავად, ლუკასი საიმედო ფეხბურთელია. მას შეუძლია, კიდევ უფრო შეკრას მიუნხენური გრანდის დაცვა, რომელსაც აშკარად აქვს პრობლემები.

“ბაიერნის” მადრიდული წიაღსვლა მხოლოდ ამით არ ამოიწურება. “რეკორდმაისტერი” არ მალავს, რომ ძალიან უნდა 24 წლის საულ ნიგესის გადაბირებაც - ძალიან ნიჭიერი ფლანგელი შესანიშნავი ტექნიკითა და უნივერსალიზმით. რა თქმა უნდა, საული იაფი არ იქნება, მაგრამ კიდევ ერთხელ გავიხსენოთ ჰიონესის მიერ დაპირებული რეკორდები.

“ტელეგრაფის” ინფორმაციით, “ბაიერნი” ბოლომდე აპირებს ბრძოლას, რათა ხელში ჩაიგდოს “აინტრახტის” 21 წლის შემტევი ლუკა იოვიჩი. მან მიმდინარე სეზონში 20-ზე მეტი გოლი გაიტანა. მისი გადაბირებით “რეალი”, “ჩელსი” და “ბარსელონა” არიან დაინტერესებულები.

ამ დროისთვის კონკრეტული წინადადებით “აინტრახტს” მხოლოდ “ბაიერნმა” მიმართა. მიუნხენელები ფეხბურთელის სანაცვლოდ 50 მილიონ ევროს იხდიან, მაგრამ ფრანკფურტელები 20 მილიონით მეტს ითხოვენ. ვნახოთ, როგორ გაგრძელდება კლუბებს შორის მოლაპარაკება.

კარგა ხანია, “ბაიერნი” უტრიალებს “ლილის” ლიდერ ნიკოლა პეპეს. ფრანგულ კლუბში ძალიან კარგად იციან, რომ 23 წლის პეპე დღითიდღე პროგრესირებს და მის სანაცვლოდ საკმაოდ სოლიდურ თანხას - 80 მილიონ ევროს ითხოვენ.

და ბოლოს, “ბაიერნს” ძალიან უნდა “ჩელსის” ფლანგელის, კალუმ ჰადსონ-ოდოის გადაბირება. არავინ დავობს იმაზე, რომ 18 წლის ჰადსონ-ოდოი დიდი ტალანტია, მაგრამ ფაქტია ისიც, რომ “ჩელსის” შემადგენლობაში მას არ ჰყოფნის სათამაშო პრაქტიკა.

ახალ “ბაიერნში” ძალიან საინტეტესო უნდა იყოს ამ სწრაფი და ძალიან ტექნიკური ფლანგელის ხილვა. მით უმეტეს, ახალგაზრდა ინგლისელები კარგად თამაშობენ სხვადასხვა კლუბში. ამის ნათელი მაგალითია 19 წლის ჯეიდონ სანჩო - “დორტმუნდის” ერთ-ერთი ლიდერი, რომელიც ინგლისის ნაკრებში უკვე შინაური კაცია.

ყოველდღიური სპორტული გაზეთი "ლელო"
564
მკითხველის კომენტარები / 0 /
მსგავსი ამბები
რუბრიკის სხვა სიახლეები
;