გრიზმანი გზაგასაყარზე: მანჩესტერ იუნაიტედი, ბაიერნი, პსჟ...

თითქმის გარკვეულია, რომ ანტუან გრიზმანი "ატლეტიკოში" ბოლო სეზონს ატარებს. გასულ ზაფხულს მსოფლიოს ჩემპიონმა უარი თქვა "ბარსელონაში" გადასვლაზე, რის სანაცვლოდაც "ატლეტიკოსგან" გაუმჯოსებული ხელშეკრულება მიიღო.

მაგრამ 27 წლის გრიზმანი გაწბილებულია - მისი "როხიბლანკო" ჩემპიონთა ლიგიდან გავარდა და ფაქტია, არც ლა ლიგაში ტრიუმფისთვის შესწევს ძალა (10 ქულით ჩამორჩება "ბარსელონას"). ძალიან მაღალი ალბათობით, ფრანგი შემტევის ტრანსფერის საკითხი ამ ზაფხულს კვლავ დადგება დღის წესრიგში და ასევე ძალიან მაღალი ალბათობით, "ატლეტიკო" მის წასვლას აღარ შეეწინააღმდეგება. ეს იქნება გრიზმანში მსუყე ფულის შოვნის ჩინებული შანსი და "ვანდა მეტროპოლიტანოზე" ამ შანსს ხელიდან აღარ გაუშვებენ.

როგორც ბარსელონაში გამომავალი "სპორტი" წერს, გრიზმანის შეძენის ყველაზე დიდი შანსი "მანჩესტერ იუნაიტედს" აქვს, თუმცა ინგლისურ გრანდს სერიოზული კონკურენცია მოუწევს "ბაიერნსა" და პსჟ-სთან. სხვათა შორის, მიუნხენში დაანონსდა, რომ ზაფხულში "რეკორდმაისტერის" ხელმძღვანელობა დიდ ფულს დახარჯავს გუნდის სერიოზულ განახლებაში და სავსებით რეალურია, რომ ერთ-ერთი სამიზნე გრიზმანიც იყოს.

რაც შეეხება პსჟ-ს, აქ ფრანგი შეიძლება იმ ნეიმარის ალტერნატივად განვიხილოთ, რომელსაც დიდი ხანია "რეალში" გადასვლას უწინასწარმეტყველებენ. კრიშტიანო რონალდოს წასვლის შემდეგ "რეალს" ძალიან აკლია ამ ტიპის მოთამაშე და, როგორც ამბობენ, გუნდში ახლახან დაბრუნებულმა ზინედინ ზიდანმა უკვე დააყენა ეს საკითხი ფლორენტინო პერესის წინაშე.

ერთი სიტყვით, საინტერესო ზაფხული გველოდება, მანამდე კი შეგახსენებთ, რომ გრიზმანმა მიმდინარე სეზონის ყველა ტურნირში ერთად 18 გოლი გაიტანა და 8 საგოლე პასი შეასრულა.

ყოველდღიური სპორტული გაზეთი "ლელო"
459
მკითხველის კომენტარები / 1 /
aburjga
0
ეს მდიდარი გუნდები კლავენ ფეხბურთს!
მსგავსი ამბები
რუბრიკის სხვა სიახლეები
;