გუნდური მეშვიდე მოფარიკავეთა მსოფლიოს ჩემპიონატზე

ბუდაპეშტში გრძელდება მოფარიკავეთა მსოფლიოს ჩემპიონატი, რომელშიც საქართველოს 10 წარმომადგენელი ჩაება.

გასულ უქმეებზე ოთხი ჩვენებური განაგრძობდა ინდივიდუალურში მედლებისთვის პაექრობას, რადგან 64 საუკეთესოში იყვნენ გასული. მოხმალავე ქალთაგან თეოდორა კახიანმა და ლიკა ჯიჯეიშვილმა პლეი ოფის სტარტზე, შესაბამისად, პალინა კაშპიროვიჩსა (ბელარუსი, 15:5) და ქსიაო ძიანს (ჩინეთი, 15:12) სძლიეს, ხოლო იაი ჩაოსა (ჩინეთი, 12:15) და მომავალ ჩემპიონ ოლგა ხარლანთან (უკრაინა, 9:15) ვერაფერს გახდნენ. საბოლოოდ ჯიჯეიშვილი 28-ე იყო, კახიანი - 30-ე, ხოლო დარია ანტონოვა 126-ე ადგილით დაკმაყოფილდა.

რაპირით მოფარიკავე ქართველები - ლუკა ღაღანიძე და ლაშა გალუაშვილი პლეი ოფის პირველივე წრეში დამარცხდნენ: ღაღანიძე - ალაალდინ აბულკასემი (ეგვიპტე) - 4:15, გალუაშვილი - ჯუნ ჰეო (კორეა) - 7:15. ადგილები: 41. ლუკა ღაღანიძე, 56. ლაშა გალუაშვილი.

შაბათს გუნდური ასპარეზობა დაასრულეს მოხმალავე ვაჟებმა. მედლებისთვის ბრძოლაში 32 ნაკრები ჩაება. ჩვენებმა (სანდრო ბაზაძე, მიხეილ მარდალეიშვილი, ბექა ბაზაძე, ნიკა შენგელია) სტარტზე იოლად აჯობეს ავსტრალიას - 45:18. შემდეგ საფრანგეთს დაუპირისპირდნენ.

პირველსავე შეხვედრაში სანდრო ბაზაძემ 5:0 მოუგო ბოლად აპიტნის და თავისიანები დააწინაურა, თუმცა სამფეროვნებმა მალევე გამოასწორეს მდგომარეობა და ბოლო პაექრობის წინ შეხვერდას ოთხი ქულით იგებდნენ - 40:36. ამ დაძაბულ სიტუაციაში სანდრომ იყოჩაღა - ფრანგთა ტიტულოვან ლიდერ ვინსენ ანსტეტს 9:2 სძლია და თავის გუნდ 45:42 გაამარჯვებინა.

თითქოს შარშანდელი შედეგიც (მე-4 ადგილი) არ ჩანდა მიუწვდომელი, მით უმეტეს, რომ ევროპის ჩემპიონატზე მხოლოდ მიკერძოებული მსაჯობის გამო დამარცხდნენ (44:45) იტალიელებთან. ამჯერად აპენინელები ბევრად უკეთ მომზადებული აღმოჩნდნენ და ჩვენებს 45:33 მოუგეს. საქართველოს ნაკრებმა მეხუთე-მერვე ადგილებისთვის განაგრძო პაექრობა, თუმცა ირანს ვერ გაუმკლავდა - 42:45. ბოლო ორთაბრძოლაში ქართველმა მოხმალავეებმა რუმინელები დაჯაბნეს - 45:33 და მე-7 ადგილი დაიკავეს. 

დღეს საფარიკაო ბილიკებზე გუნდურში მოხმალავე ქალები გავლენ. საპრიზო ადგილებისთვის 31 ნაკრები იბრძოლებს. ჩვენი გუნდი (კახიანი, ჯიჯეიშვილი, ანტონოვა) მე-2 ნომრად განთესილ რუსეთს შეხვდება.

ყოველდღიური სპორტული გაზეთი "ლელო"
197
მკითხველის კომენტარები / 0 /
მსგავსი ამბები
რუბრიკის სხვა სიახლეები
;