გურამ თუშიშვილი საქართველოს აბსოლუტური ფალავანია!

ქართულ ჭიდაობაში საქართველოს 2017 წლის აბსოლუტური ფალავანი გურამ თუშიშვილი გახდა! ჩვენი ქვეყნის ერთ-ერთმა ყველაზე გამორჩეულმა ძიუდოისტმა, რომელიც წლეულს ძიუდოში ევროპის ჩემპიონიც გახდა, როგორც პირად ისე გუნდურ პირველობებში – ამჯერად ქართულ ჭიდაობაში ისახელა თავი.

აბსოლუტური ფალავნობა ჩვენს ეროვნულ საჭიდაო სახეობაში ყველაზე პრესტიჟული შეჯიბრებაა, რომელიც ყოველი წლის მიწურულს გამოავლენს ფალავანთა შორის საუკეთესოს. საქართველოს ქართული ჭიდაობის ეროვნული ფედერაციის მიერ ორგანიზებული ეს შეჯიბრება ამჯერად თბილისის ვაჟა კაჭარავას სახელობის ოლიმპიურ სასახლეში ჩატარდა.

მონაწილეობა მასში საქართველოს და უცხოეთის სხვადასხვა ქვეყნების 80-მდე სპორტსმენმა მიიღო. უცხოელები ფალავნობაში უკანასკნელი რამდენიმე წელიწადია სისტემატიურად ასპარეზობენ, თუმცა ჯერ კვარცხლბეკზე დადგომას ვერ ახერხებენ და მედლებიც მხოლოდ ქართველ მოჭიდავეებზე ნაწილდება. საზღვარგარეთიდან არენაზე ამჯერად 8 მოჭიდავე გვეწვია. ისინი უკრაინიდან, თურქეთიდან, ყაზახეთიდან და გერმანიიდან ჩამოვიდნენ საასპარეზოდ.

შეჯიბრების დებულების მიხედვით საუკეთესოები ჯერ წონით კატეგორიებში ირკვეოდა, შემდეგ კი გადადიოდნენ დასკვნით ეტაპზე, სადაც განაგრძობდნენ ბრძოლას 2017 წლის აბსოლუტური ფალავანის ტიტულის დასაუფლებლად.

გურამ თუშიშვილი რა თქმა უნდა თავიდანვე ფავორიტთა შორის მოაზრებოდა. მთავარი ჯილდოს მოპოვების კანდიდატებად მიიჩნეოდნენ ლევან მატიაშვილი, აგრეთვე საქართველოს 2013 და 2015 წლების აბსოლუტური ფალავანი პაატა ღვინიაშვილი.

წონით კატეგორიებში საუკეთესო სამეულები ასე გადანაწილდა:
80 კგ. 1. გიორგი მახარაშვილი (მცხეთა), 2. კობა მჭედლიშვილი (საგარეჯო), 3. კახა მამულაშვილი (კასპი)
90 კგ. 1. პაატა ღვინიაშვილი (ქარელი), 2. გიორგი პაპუნაშვილი (გორი), 3. ნიკა სიდამონიძე (ქარელი)
100 კგ. გიორგი ბოლოთაშვილი (გორი), 2. რევაზ წულუკიძე (აჭარა), იასონ ნემსაძე (ქუთაისი)
+100 კგ. 1. ლევან მატიაშვილი (თბილისი), 2. გურამ თუშიშვილი (კოჯორი), 3. გიორგი ქავთარაძე (გარდაბანი)

წონით კატეგორიებში გამოვლენილი საუკეთესო ოთხეულები აბსოლუტური ფალავნობისათვის ბრძოლაში ჩაებნენ და ყველაზე ფიცხელი ბრძოლაც როგორც მოსალოდნელი იყო მაშინ გაჩაღდა. დაფიქსირდა რამდენიმე მოულოდნელი შედეგიც.

ნახევარფინალურ წყვილებში გურამ თუშიშვილმა – პაატა ღვინიაშვილს, გიორგი ქავთარაძემ კი ლევან მატიაშვილს მოუგო. მესამე ადგილისთვის პაექრობა ღვინიაშვილსა და მატიაშვილს შორის უნდა შემდგარიყო, მაგრამ ეს უკანასკნელი არ გამოცხადდა და ჩვენი ქვეყნის ორგზის ფალავანი ღვინიაშვილი ამჯერად მესამე საპრიზო ადგილის მფლობელი გახდა.

ფინალში ქავთარაძესთან პაექრობისას თუშიშვილის უპირატესობა აშკარა იყო. ქავთარაძე კარგი მოჭიდავეა, ძიუდოსა და სამბოში ჭაბუკთა ასაკიდან მოყოლებული ჰქონდა გარკვეული წარმატებები, ნახერხმოყრილ არენაზეც ხშირად გვინახავს სხვადასხვა რეგიონში გამართულ ტურნირებზე და აბსოლუტურ ფალავანობასაც არ აკლდება ხოლმე, თუმცა თუშიშვილს მან ვერაფერი მოუხერხა.

გურამს რთული საშეჯიბრო დღის შემდეგ ენერეგიაც მეტი ჰქონდა შემორჩენილი და ილეთებიც ნაყოფიერად გამოიყენა – ჯერ ქულები აართვა მეტოქეს, შემდეგ სუფთაზეც დააგდო.

საბოლოოდ აბსოლუტური ფალავანის ტიტული პირველად მოიპოვა 22 წლის გურამ თუშიშვილმა, ვიცე-ფალავანი გიორგი ქავთარაძე, ხოლო მესამე ადგილის მფლობელი პაატა ღვინიაშვილი გახდა.

ქართული ჭიდაობის ეროვნული ფედერაციის და სპორტისა და ახალგაზრდობის საქმეთა სამინისტროს მიერ გამარჯვებულებისთვის და მედალოსნებისთვის დაწესებული იყო საპრიზო ფონდი. ცალკეულ წონით კატეგორიებში პირველ სამეულში გასულ მოჭიდავეებს შესაბამისად 3, 2, და ათასი ლარი ერგოთ. 30 ათასი ლარი იყო დაწესებული აბსოლუტური ფალავანისთვის, 10 ათასი ვიცე-ფალავანისთვის, ხოლო 5 ათასი მესამე ადგილზე გასული მოჭიდავისათვის.

2431
მკითხველის კომენტარები / 0 /
მსგავსი ამბები
რუბრიკის სხვა სიახლეები