გურამ კაშია თბილისის 'დინამოში' ვარჯიშობს

საქართველოს ნაკრების დაცვის ბურჯი გურამ კაშია თბილისის "დინამოში" ვარჯიშობს.

ის ამ გუნდის ყოფილი კაპიტანია და სწორედ მის შემადგენლობაში ემზადება ამერიკაში გამგზავრებამდე, სადაც 30 წლის მცველმა "სან ხოსეს" ღირსება უნდა დაიცვას ვაკო ყაზაიშვილთან ერთად.

"დინამოში" ჩემი კარიერა მაშინ დაიწყო, როცა 15 წლის ვიყავი, კლუბის აკადემიაში მოვხვდი სინჯებზე, რაც წარმატებით დასრულდა. მანამდე, "ნორჩ დინამოელში" გავიზარდე... მოკლედ, სულ დინამოელი ვიყავი... დღესაც "დინამოსთან" ერთად ვარ, რაც ძალიან სასიამოვნოა.

მადლობა მინდა გადავუხადო კლუბის ხელმძღვანელობას, მწვრთნელ კახა კაჭარავას, ბიჭებს, რომლებმაც ძალიან კარგად მიმიღეს... "დინამოში" კარგა ხნის განმავლობაში ვითამაშე.

თუ არ ვცდები, 22 თუ 23 წლის ვიყავი, როცა ჰოლანდიის ჩემპიონატში გადავედი. "დინამომ" შემიქმნა ყველანაირი პირობა, რომ პროფესიონალ ფეხბურთელად ჩამოვყალიბებულიყავი. ეს კლუბი ყოველთვის ნომერ პირველი იქნება ჩემთვის... რამდენიმე დღეა, აქ ვვარჯიშობ, ვნახე "დინამოს" თამაშები...

გუნდი ახალგაზრდა ფეხბურთელებითაა დაკომპლექტებული. მათ შეუძლიათ რაღაც დონემდე მისვლა. ეს მაძლევს იმის იმედს, რომ გუნდს შეუძლია, გარკვეულ წარმატებას მიაღწიოს ევროპის ლიგაზე.

ეს არ იქნება იოლი, მაგრამ შეუძლიათ, გააკვირვონ მეტოქე და ქომაგი. ნებისმიერი გუნდისთვის, თუნდაც ჰოლანდიურისთვის, რთულია ჯგუფში მოხვედრა. ამ ბიჭებს გამხნევება სჭირდებათ. კახა კაჭარავას სახით გუნდს ჰყავს ძალიან კვალიფიციური მწვრთნელი...

რაც შეეხება ჩემს მომავალს, გადავდგი ის ნაბიჯი, რომელიც მეც მინდოდა და ჩემი ოჯახის წევრებსაც. 8 წელი ვიყავი "ვიტესში". საფეხბურთო კარიერა ხანმოკლეა და მინდა, გავიცნო სხვა კულტურაც. შემოთავაზება იყო ამერიკიდან და გადავწყვიტე, მიმეღო ეს შემოთავაზება...

ჩემპიონატის დონეს რაც შეეხება, ვფიქრობ, ამერიკის ლიგა არ არის ნაკლები ჰოლანდიის ჩემპიონატზე და სხვა მსგავს პირველობებზე. ევროპის დონეს უახლოვდება", - თქვა კაშიამ.

ყოველდღიური სპორტული გაზეთი "ლელო"
615
მკითხველის კომენტარები / 0 /
მსგავსი ამბები
რუბრიკის სხვა სიახლეები