[მზადება] გურამ კაშია: იმედი მაქვს, სტადიონი გაივსება და ეს დამატებით ძალას მოგვცემს!

როგორც დაანონსებული იყო, საქართველოს ნაკრებმა 21 მარტს "დინამო არენაზე" ივარჯიშა. წვრთნა ერთ საათს გაგრძელდა. ჩვენი გუნდი შვეიცარიასთან მატჩისთვის 25 ფეხბურთელით ემზადება. ეროვნულ გუნდში გამოძახებული ყველა მოთამაშე სრული დატვირთვით ვარჯიშობს.

საქართველოს ნაკრების ერთ-ერთმა ლიდერმა გურამ კაშიამ gff.ge-სთან მოახლოებულ მატჩზე ილაპარაკა:

"ყველაზე მთავარი ის არის, რომ ნაკრებშიც და გულშემატკივრებშიც შევქმენით დადებითი განწყობა და ხალხს იმედი დავუბრუნეთ. მომავალ ორ თამაშში რთული მეტოქეები გვყავს, მაგრამ თავდაჯერებულები ვართ. მატჩებისთვის მოსამზადებლად ძალიან მოკლე პერიოდი გვაქვს, მაგრამ ახლა კონკრეტულად შვეიცარიის ნაკრების წინააღმდეგ სათამაშოდ ვემზადებით. საკვალიფიკაციო ტურნირის კარგად დაწყება ძალიან მნიშვნელოვანია და გვსურს, ამ ორ თამაშში დადებითი შედეგი ვაჩვენოთ...

ჩვენი ჯგუფი ძალიან რთულია და ვფიქრობ, გუნდებს შორის ძალიან ბევრი ქულა დაიკარგება, ამიტომ, მომავალი უახლოესი ორი მატჩის შედეგი ჯგუფში ჯერჯერობით არაფერს გადაწყვეტს...

თანამედროვე ფეხბურთში გულშემატკივარს უდიდესი როლი აქვს, ამიტომ, თითოეულ ჩვენგანს დიდი იმედი გვაქვს, რომ 23 მარტს "დინამო არენა" კვლავ გაივსება. ეს ფაქტი მოთამაშეებს თავდაჯერებასდა დამატებით ძალას გვაძლევს".

924
მკითხველის კომენტარები / 0 /
მსგავსი ამბები
რუბრიკის სხვა სიახლეები
;