გურულები ისევ აოცებენ ამერიკას!

ასი წლის წინ გურულმა ცხენოსნებმა სრულიად ამერიკა გადარიეს და ახლახანს ერთი გურული მხედრის, ბართლომე მშვიდობაძის უზარმაზარი ვიტრაჟიც კი გამოფინეს ნიუ იორკში. გავიდა ასი წელი და შესაძლოა კიდევ ერთმა გურულმა, ამჯერად გოგონამ გადარიოს საკალათბურთო ამერიკა! ამასწინათ "კასპერ კოლეჯის" თავდამსხმელმა ნატალია ოთხმეზურმა "ოტეროსტან" 38 ქულა ჩააგდო!!!

ნატალია ოთხმეზური 2000 წელს დაიბადა მრავალშვილიან ოჯახში. მამამისი, ირაკლი საკმაოდ კარგად თამაშობდა კალათბურთს, დღესდეღეობით კი დიდუბის ღვთისმშობლის ეკლესიის დეკანოზია. ყველაფერი იმით დაიწყო, რომ მამამ ეზოში კალათბურთის ფარი დადგა და ბიჭებს ავარჯიშებდა. მალე ძმებმა კალათბურთზე დაიწყეს სიარული. (უფროსი ძმა დამიანე ახლა თსსუ-ში თამაშობს და საკმაოდ პერსპექტიული სპორტსმენია). ნატალიამაც გამოთქვა სურვილი, მაგრამ მამამ - შენ რა იცი კალათბურთიო? 12 წლის ჩხირივით პატარა გოგომ უკან არ დაიხია - მათამაშე და განახვებო! სამდღიანი "ცრემლების" და რამდენიმე ზუსტი ტყორცნის შემდეგ მამამ მასში დიდი ნიჭი დაინახა და ასე აღმოჩნდა პატარა ნატალია 166-ე სკოლაში ზურა რაზმაძესთან, რომელსაც მოეწონა მისი მონაცემები და სიგიჟემდე შეაყვარა კალათბურთი...

ნატალია ოთხმეზური: "მალე გუნდ "ოვერტაიმის" წევრი გავხდი. შემდგომ ვთამაშობდი "ბასტიონში" ლელა ცანავასთან, თსსუ-ში სერგო იშხნელთან, "დინამოში" ნინო ყიფშიძესთან, "არმიაში" ნუგზარ კანდელაკთან. 2015 წლიდან ვარ საქართველოს ქალთა სხვადასხვა ასაკის ნაკრების წევრი. მერე ჩეხეთის "ჰრადეც კრალოვეში" ვითამაშე 4 თვე, 19 წლამდელთა ჩემპიონატში, და საშუალოდ მატჩში 14,3 ქულას ვაგროვებდი. ბოლოს ვვარჯიშობდი ზაზა ფაჩულიას აკადემიაში, საიდანაც მოვხვდი "კასპერ კოლეჯში", რისთვისაც დიდ მადლობას ვუხდი ზაზა ფაჩულიას, გიორგი ალავიძეს, ლაშა ფარღალავას.

ამ დროის განმავლობაში მთელი ოჯახი გვერდში მედგა, განსაკუთრებით მამა, რომელიც ჩემი პირადი მწვრთნელი და ყველაზე მკაცრი შემფასებელია. ამერიკაში ვთამაშობ კასპერ კოლეჯის გუნდ "თანდერბერდში," NCAA-ს პირველობაზე. ვფიქრობ სეზონს წარმატებულად ვატარებთ. ამას წინათ გუნდ "ოტეროსთან" 38 ქულა, 5 მოხსნა, 4 პასი და 3 ჩაჭრა მქონდა. ამერიკულ სტილთან შეგუება არ გამჭირვებია, რადგანაც, ზაზა ფაჩულიას აკადემიაში შექმნილმა საუკეთესო პირობებმა, მაღალი კლასის მწვრთნელებმა ინდივიდუალურ თუ ფიზიკურ ვარჯიშებში, მომამზადეს ამ სერიოზული გამოწვევისთვის.

2019 წელს 15 მატჩი ვითამაშე და საშუალოდ თამაშში 15,2-ს ქულას ვაგროვებ და გუნდში საუკეთესო შედეგი მაქვს. ახლა შესვენებაა - 16 იანვრამდე საშობაო არდადეგები გვაქვს. ქართული და ამერიკული სტილის განსხვავება კალათბურთის სისწრაფესა და ფიზიკური მომზადების მაღალ დონეშია.

გარდა სპორტული თემებისა აქ ძალიან მნიშვნელოვანია სწავლის ხარისხი, რაც გარკვეულ დროსა და ძალისხმევას მოითხოვს. ასე რომ წინ დაძაბული სემესტრი მელოდება. თავისუფალი დრო იშვიათად მაქვს და მას მთლიანად ოჯახთან ურთიერთობას ვუთმობ. თუ გავითვალისწინებთ ოჯახის წევრების რაოდენობას (6 და-ძმანი ვართ), ეს არც ისე ადვილია. კოლეჯში ავირჩიე იგივე სპეციალობა, რომელსაც საქართველოს სახელმწიფო უნივერსიტეტში ვეუფლებოდი - ხელოვნებათმცოდნეობა. ავიხდინე დიდი ხნის ოცნება და ვესწრები ხატვის კლასს და იმედი მაქვს წარმატებებს ამ სფეროშიც მივაღწევ..."

დათა მესხია

3091
მკითხველის კომენტარები / 0 /
მსგავსი ამბები
რუბრიკის სხვა სიახლეები
;