ეს არის სიყვარულის ისტორია? რატომ არ მიჰყვება ესპანელი მომღერალი დავიდ დე ხეას მანჩესტერში?

მაცივარის ხსენებისას თვალწინ ყველას ალბათ წარმოგიდგებათ კაციობრიობის ტექნიკური პროგრესის მონაპოვარი ეს მეტად მნიშვნელოვანი ნივთი, ჩვეულებრივ მდგომარეობაში. მოშიებულებს და გურმანებს იგი ღია კარით და პროდუქტით სავსე მოელანდებათ, მამაკაცებს შიგნით მოთავსებული ლუდის ბოთლებით, ბავშვებს ნაყინით, ნივთების გადაადგილების მოყვარული დიასახლისები კი ალბათ სამზარეულოს ხან ერთ და ხან მეორე კუთხეში მდგარს წარმოიდგენენ. ამ ნივთის გადაადგილება თუ მოგიწიათ, აბა მის უკანა მხარეს დააკვირდით...

დიახ, იგი დიდად სახარბიელოდ არ გამოიყურება, თუმცა სწორედ ამიტომ ესპანელი მომღერლის, დევიდ დე ხეას მეგობარ გოგონას ედურნე გარსიას მაცივრის უკანა მხარე არც მეტი არც ნაკლები - მანჩესტერს აგონებს.

ედურნე მანჩესტერის სიძულვილით ცნობილი ქალია, მისი ერთგული მამაკაცი კი ამ ქალაქის ტიტულოვანი საფეხბურთო კლუბის გოლკიპერი.

ბუფონისა და სერედოვას სიყვარულის ისტორია: ჯიჯიმ Playboy გადაშალა და...

დე ხეა 2011 წლიდან იცავს "მანჩესტერ იუნაიტედის" კარს. ამ გუნდის მეტსახელი "წითელი ეშმაკებია". ედურნემ ერთხელ მანჩესტერი ჯოჯოხეთსაც შეადარა, თუმცა მაცივრისგან განსხვავებით ამ უკანასკნელთან მანჩესტერული კლუბის მეტსახელი გარკვეულ ასოციაციებს მაინც აღძრავს და ლოგიკის ჯაჭვი კიდევ შესაძლოა რომ ნახოთ.

რა გასაკვირია, რომ ედურნეს, ინგლისის ერთ-ერთ თვალსაჩინო, მაგრამ მისთვის საძულველ ქალაქში საცხოვრებლად თავის გულისსწორთან გადასვლის გაგონებაც არასოდეს უნდოდა. არადა ედურნე და მასზე ოთხი წლით უმცროსი დევიდი მეხუთე წელია ურთიერთობაში არიან და ერთმანეთს მონატრებულები "შორით ტრფობით" იტანჯებიან.

2015 წელს დე ხეას უნდოდა ამ ტანჯვისთვის წერტილი დაესვა. სამშობლოში დაბრუნების უკეთესი ვარიანტი რაღა უნდა იყოს – თვით "სამეფო კლუბი" არ მალავდა დაინტერსებას მანჩესტრის გოლკიპერის თაობაზე. ურთიერთის მონატრებით დაღლილ მადრიდულ წყვილს შანსი ეძლეოდა მშობლიურ ქალაქში ეცხოვრათ და თავისი საქმიანობაც ორივეს იქვე გაეგრძელებინა.

მაგრამ მოლაპარაკებები, რომელიც უკვე ფინიშის ხაზზე გასულიყო - ჩაიშალა. ჩაიშალა საოცარი მიზეზით. "წითელმა ეშმაკებმა" "სამეფო კლუბში" ტრანსფერთან დაკავშირებული საბუთების გაგზავნა დააგვიანა. ამასობაში, სატრანსფერო ფანჯარა დაიხურა და დე ხეა ამ საბედისწერო ფანჯრის სარკმელთან თვალცრემლიანი დარჩა.

ედურნე გარსიასაც მას შემდეგ ისევ უწევს მაცივრის უკანა მხარის ყურება, რადგან იქ, უნდა თუ არ უნდა კარში მისი შეყვარებული დგას.

ინტერვიუს დასრულებისას ჟურნალისტს ტუჩებში აკოცა... იკერისა და სარას LoveStory [PHOTO]

მადრიდის "ატლეტიკოში" ოთხი სეზონის ჩატარების შემდეგ, პრემიერლიგაში სათამაშოდ 21 წლის ასაკში 2011 წელს გაეშურა. ტრანსფერი სარეკორდო იყო. ბრიტანელებს მეკარეში 18 მილიონი ფუნტი სტერლინგი იქამდე არასოდეს გადაეხადათ. მართალია "ნისლიან ალბიონზე" სიხარულით მიიჩქაროდა ახალგაზრდა ფეხბურთელი, თუმცა ამბობენ მეგობარი გოგონა ფეხს მაშინაც ითრევდაო.

დევიდის კლასი იძლევა იმის საშუალებას, რომ "ატლეტიკოსა" და "მანჩესტერში" ითამაშოს, რომ "რეალმა" შესთავაზოს თავის კარის დაცვა, მაგრამ ედურნე გარსიამ რა ქნას? ის ესპანეთშია მოთხოვნადი მომღერალი და შოუს წამყვანი. ის არც ჯენის ჯოპლინია, არც ელა ფიტცჯერალდი, რომ ხმით, თუ შემოქმედებით ნიჭით დაატყვევოს მსმენელი და ინგლისსა და ამერიკაშიც ისეთივე მოთხოვნადი იყოს, როგორც ესპანეთში. ამიტომ შიშობს, რომ პირინეის მიღმა კარიერა ვერ აეწყობა და მანჩესტერიც ალბათ უფრო ამიტომ სძულს.

2015 წელს "ევროვიზიაზე" ედურნე გარსია ესპანეთს წარმოადგენდა, თუმცა თავი ვერაფრით ისახელა, ოცეულშიც ვერ მოხვდა. არადა, მაშინ ამ საძულველი მანჩესტერის გულშემატკივართა მთელმა არმიამ ხმის მიცემა არ დაამადლა მათი გუნდის გოლკიპერის გულის რჩეულს, "ევროვიზიაზე" ესპანეთის რჩეულს. გულშემატკივართა ხმა ედურნეს არ ეყო.

მანჩესტერში დე ხეას ფეშენებელური სახლი აქვს. იქ მას ექვსი საძინებელი ჰქონია, რომელიც ოთხ სართულზე ნაწილდება. აქვს აგრეთვე ხუთი აბაზანა, საუნა, სამუშაო კაბინეტი, საოჯახო კინოთეატრი, ბაღი და ა. შ. სახლი დევიდს იმ ზაფხულს, როდესაც სამშობლოში დაბრუნების და "რეალის" მაისურას მორგების დიდი იმედი ჰქონდა, უკვე გასაყიდადაც ჰქონდა გამოტანილი და 2,5 მილიონ ევროსაც აფასებდა.

სიმეონეს LoveStory. ჩოლოს მოტივატორები: 16 წლით უმცროსი კარლა და მოდელი კაროლინა

მერე მისი სამშობლოში დაბრუნება გადაიდო და ამ სახლში გოლკიპერს ისევ თითქმის ეულად უწევს ყოფნა. არ უყვარს გოგოს მაცივრის უკანა ხედის დიდ ხანს ყურება და საყვარელი მამაკაცისთვის იქაურობას პერიოდულად თუ სტუმრობს.

სხვათა შორის ედურნეს ესპანელმა ჟურნალისტებმა ჰკითხეს - მანჩესტერში მყოფ დე ხეაზე ხომ არ ეჭვიანობდა, მაგრამ გოგონა დარწმუნებულია, რომ ეჭვიანობისთვის საფუძველი არ არსებობს. ქალი დარწმუნებულია, რომ დევიდი მას ინგლისელ ქალში არ გაცვლის.

ალბათ ისიც გაინტერესებთ... არა, დევიდისთვის ედურნესთან დაკავშირებით იგივე კითხვა ინგლისელ ჟურნალისტებს არ დაუსვამთ.

13345
მკითხველის კომენტარები / 0 /
მსგავსი ამბები
რუბრიკის სხვა სიახლეები
;