დავით ვოლკოვი: ან დარჩენა, ან ჩეხეთი

დასრულებული სეზონის მეორე წრეში "საბურთალომ" სერბული "ზემუნიდან" დავით ვოლკოვი დაიმატა, რომელიც სეზონის ერთ-ერთი აღმოჩენა გახდა - 22 წლის თავდამსხმელმა 17 შეხვედრაში 10 გოლი გაიტანა და გუნდს დაეხმარა, ეროვნულ ლიგაში წამყვან როლებში რომ ყოფილიყო.

განსაკუთრებით შთამბეჭდავად ვოლკოვმა თბილისის "დინამოსთან" შეხვედრა ჩაატარა, რომელშიც "საბურთალომ" მეტოქე გასვლაზე 4:1 დაამარცხა, 22 წლის თავდამსხმელმა კი დუბლი შეასრულა.

თუმცა, სეზონი დასრულდა და ჯერ უცნობია, ვოლკოვი ისევ "საბურთალოში" დარჩება თუ კარიერას სხვა კლუბში გააგრძელებს.

"კონტრაქტი დამიმთავრდა, მაგრამ "საბურთალოს" უნდა დაველაპარაკო და ამის შემდეგ გადაწყდება, დავრჩები თუ კარიერას სხვაგან გავაგრძელებ. ჯერ ამაზე დაზუსტებით ლაპარაკი არ შემიძლია", - ამბობს ვოლკოვი.

მისი თქმით, არაა გამორიცხული, კარიერა ევროპაში გააგრძელოს:

"ამაზე იყო ლაპარაკი და რაც ვიცი, ჩეხეთის კლუბია დაინტერესებული, მაგრამ დაკონკრეტებას მოვერიდები. თუმცა, "საბურთალოში" დარჩენასაც არ გამოვრიცხავ, რადგან ამ კლუბში გავიხსენი და თავს კარგად ვგრძნობდი".

ფეხბურთელის მენეჯერი ლევან ზუხბაია ამბობს, რომ ვოლკოვს საინტერესო მიწვევები აქვს:

"ახლა დათო თავისუფალი აგენტი გახდა და არჩევანში უფრო თავისუფალია. ჩვენი სურვილია, ისეთ კლუბში ითამაშოს, სადაც პოტენციალს უკეთ გამოავლენს და რომელიც მის კარიერას წაადგება".

ყოველდღიური სპორტული გაზეთი "ლელო"
1317
მკითხველის კომენტარები / 0 /
მსგავსი ამბები
რუბრიკის სხვა სიახლეები
;