დავით ვოლკოვი: გამიხარდა, მძიმე ტრავმას რომ გადავურჩი

ეროვნული საფეხბურთო ლიგის მე-6 ტურში "საბურთალომ" თბილისის "დინამოს" მისსავე არენაზე 1:0 სძლია და კვლავ ერთპიროვნული ლიდერია.

დედაქალაქური დერბის 76-ე წუთზე "საბურთალო" კაცნაკლული დარჩა, რადგან დავით ვოლკოვი რომ დაშავდა და მოედანი ექიმების დახმარებით დატოვა, იმ დროისთვის გიორგი ჭიაბრიშვილს უკვე ყველა შეცვლა გაკეთებული ჰქონდა.

საინტერესოა, რა ხდება ვოლკოვის თავს? თავდაპირველი ეჭვი, რომ "საბურთალოს" ფორვარდს მძიმე ტრავმა ჰქონდა, არ დადასტურდა. ინფორმაციას თავად კლუბი ავრცელებს:

"დავით ვოლკოვს თბილისის "დინამოსთან" მატჩში კოჭი გადაუბრუნდა, რის შემდეგაც თამაშის გაგრძელება ვეღარ შეძლო. სურათის გადაღების შემდეგ, მას ძვლოვანი დაზიანება არ აღენიშნება.

აქედან გამომდინარე, ტრავმა სერიოზული არ არის. ფეხბურთელი ახლა ექიმების დაკვირვების ქვეშ იმყოფება. სავარაუდოდ, ის ვარჯიშს უახლოეს დღეებში განაახლებს", - ამბობს გუნდის ექიმი ლევან ქებაძე.

"ლელო" თავად ფეხბურთელს ელაპარაკა: "ექიმებმა მითხრეს, რომ კოჭზე არც მყესებია გაწყვეტილი და არც - იოგები. ძალიან გამიხარდა, რომ მძიმე ტრავმას გადავურჩი. ახლა ფეხზე ყინულები მადევს, მაგრამ მალე ესეც აღარ დამჭირდება და იმედია, დიდხანს არ მომიწევს დასვენება".

ვოლკოვმა ის ეპიზოდიც გაიხსენა: "ბურთისთვის ბრძოლის შემდეგ ცუდად დავეცი და საშინელი ტკივილი ვიგრძენი. მეგონა, კოჭი მქონდა გატეხილი. კიდევ კარგი, დაცემისას ფეხი სწორად დავდგი და ამან გადამარჩინა მძიმე ტრავმას. არადა, თავიდან მეგონა, რომ მოედანს დიდი ხნით დავემშვიდობე. საბედნიეროდ, ასე არ არის და ეს ძალიან მახარებს".

ტრავმამდე ვოლკოვი მოედანზე ერთ-ერთი მთავარი მოქმედი პირი იყო. მან "დინამოსთან" მოგებულ თამაშზეც ილაპარაკა: "ძალიან რთული მატჩიც იყო და ძალიან კარგიც.

"დინამო" ისეთი გუნდია, თავადაც თამაშობს და შენც გათამაშებს, რაც საქართველოში იშვიათი გამონაკლისია. მსიამოვნებდა, მოედანზე რომ ვიყავი და ასეთ გუნდში, თან ასეთი მეტოქის წინააღმდეგ რომ ვთამაშობდი.

რა თქმა უნდა, მოგება გამიხარდა. მომენტებიდან ერთი მაინც გამოვიყენეთ. "დინამომ" კარგად კი ითამაშა, მაგრამ აშკარად არ გაუმართლა. პირადად მე, დიდი ხანია, ფეხბურთით ასეთი სიამოვნება არ მიმიღია".

ყოველდღიური სპორტული გაზეთი "ლელო"
1002
მკითხველის კომენტარები / 0 /
მსგავსი ამბები
რუბრიკის სხვა სიახლეები
;