დავით ზირაქაშვილი მაისამდე იუქმებს

საფრანგეთის სარაგბო ჩემპიონატში მორიგი, მე-19 ტურის შეხვედრები გაიმართა. პლეი ოფში მოხვედრის რეალურ შანსი ქართველ მორაგბეთა სამი გუნდი ინარჩუნებს. ესენია: „კლერმონი“, „ბორდო“ და „რასინგი“.

დავით ზირაქაშვილის, ბექა კაკაბაძისა და ვიქტორ კოლელიშვილის „კლერმონმა“ შინ დაამარცხა „პო“ 27:14. ზირაქაშვილი ძირითად შემადგენლობაში იყო და შესვენებისას შეცვალეს. მან თამაშის მსვლელობისას ფეხი დაიშავა. დეტალურად გასინჯვის შემდეგ ექიმებმა დაადგინეს, რომ მკურნალობისთვის სამი-ოთხი კვირა დასჭირდება. ამის შემდეგ რამდენიმე კვირა რეაბილიტაციისთვის იქნება საჭირო. ერთი სიტყვით, ზირაქაშვილი თამაშს, სავარაუდოდ, მაისის დასაწყისში შეძლებს.
კაკაბაძე ასევე ძირითად შემადგენლობაში იყო და 55-ე წუთზე შეცვალეს.

ბექა გორგაძის, ლაშა ტაბიძისა და ლექსო ყაულაშვილის „ბორდომ“ შინ დაამარცხა გიორგი მელიქიძის „სტად ფრანსე“ 26:12. ტაბიძე თამაშში 55-ე წუთიდან ჩაერთო, გორგაძე და მელიქიძე ეროვნულ ნაკრებში გაისარჯნენ, ყაულაშვილი ტრავმირებულია.

ვასილ კაკოვინისა და გურამ გოგიჩაშვილის „რასინგმა“ სტუმრად შეძლო ერთ-ერთი აუტსაიდერის, ბექა გიგაშვილისა და დავით ქუბრიაშვილის „გრენობლის“ დამარცხება - 34:6. ქართველებიდან მხოლოდ კაკოვინმა ითამაშა. ის მოედანზე 47-ე წუთიდან გამოჩნდა. გიგაშვილმა და გოგიჩაშვილმა ეროვნულ ნაკრებში ითამაშეს.

მამუკა გორგოძის „ტულონმა“ შინ წააგო მიხეილ ნარიაშვილის, კონსტანტინე მიქაუტაძის, ლევან ჩილაჩავას, უშანგი ჭეიშვილისა და გელა აფრასიძის „მონპელიესთან“ - 18:21. მიქაუტაძე დაშავდა და მალევე, მე-6 წუთზე შეცვალეს, გორგოძემ მოედანი 46-ე წუთზე დატოვა. ნარიაშვილი და ჭეიშვილი განაცხადში არ იყვნენ, ჩილაჩავამ და აფრასიძემ ეროვნულ ნაკრებში იასპარეზეს.

გიორგი თეთრაშვილისა და თამაზ მჭედლიძის „აჟენმა“ შინ დაამარცხეს პლეი ოფისთვის მებრძოლი „ლა როშელი“ - 19:7. თეთრაშვილი ძირითად შემადგენლობაში იყო და 50-ე წუთზე შეცვალეს, მჭედლიძე ტრავმირებულია.

XIX ტური
ტულონი-მონპელიე 18:21, აჟენი-ლა როშელი 19:7, კასტრი-პერპინიანი 36:17, გრენობლი-რასინგი 16:34, ბორდო-სტად ფრანსე 26:12, კლერმონი-პო 27:14, ტულუზი-ლიონი 53:21

სატურნირო მდგომარეობა
1. ტულუზი - 72 ქულა, 2. კლერმონი - 65, 3. კასტრი - 54, 4. ლიონი - 52, 5. ბორდო - 52, 6. რასინგი - 51, 7. ლა როშელი - 51, 8. სტად ფრანსე - 46, 9. მონპელიე - 42, 10. ტულონი - 38, 11. პო - 33, 12. აჟენი - 29, 13. გრენობლი - 20, 14. პერპინიანი - 8.

ყოველდღიური სპორტული გაზეთი "ლელო"
658
მკითხველის კომენტარები / 0 /
მსგავსი ამბები
რუბრიკის სხვა სიახლეები
;