დავით თარგამაძე: ჯერ კარიერა არ დამისრულებია, - დვალიშვილიც და ცნობილაძეც 'საბურთალოში'

ეროვნული ლიგის ლიდერი "საბურთალო" სეზონის მეორე ნახევრისთვის მზადებას თბილისში, "ზესტაფონის" ბაზაზე შეუდგა.

გიორგი ჭიაბრიშვილის შეგირდები 25 ივლისს ამხანაგურ მატჩში ეროვნული ლიგა 2-ის ბინადარ "თელავს" დაუპირისპირდებიან. შემდეგ კი უკვე ოფიციალურ მატჩში ბოლნისის "სიონს" უმასპინძლებენ...

"საბურთალომ" ვარჯიშებზე პირველად გამოიყენა "პოლარის" ანალიტიკური სისტემა...

ახალწვეულები

შემადგენლობაში რამდენიმე სიახლეა. ამიერიდან, კლუბის ღირსებას საქართველოს ნაკრების ფეხბურთელები - ლადო დვალიშვილი და დავით თარგამაძე დაიცავენ, პლუს, გუნდს "ლოკომოტივში" იჯარით წასული დაჩი ცნობილაძე დაუბრუნდა.

ჯერ ნაადრევია...

დავით თარგამაძეს ტრავმის გამო ორი წელი გაუცდა, მაგრამ 28 წლის შემტევი ნახევარმცველი მომჯობინდა, თბილისელთა შემადგენლობაში თვეზე მეტი ვარჯიშობდა და საბოლოოდ, კარიერის ფაქტობრივად ხელახლა დაწყება "საბურთალოში" ამჯობინა.

35-ე სკოლის აღზრდილი თარგამაძე 2008-10 წლებში გერმანულ "ფრაიბურგში" თამაშობდა, შემდეგ უკრაინულ გუნდებში მოსინჯა ძალა. ჯერ იყო "ოლექსანდრია", საიდანაც დონეცკის "შახტარში" აიყვანეს და "მარიუპოლში" გაანათხოვრეს. თარგამაძე იყო 19 და 21-წლამდელთა ნაკრებების წევრი, 2011 წლიდან კი ეროვნულ გუნდშიც მიიწვიეს, სადაც 19 მატჩი ითამაშა და 2 გოლი გაიტანა.

"წვივის ძვლის მოტეხილობის გამოც ძალიან დიდი დრო გამიცდა. ამ ხნის განმავლობაში სამი ოპერაცია გავიკეთე, რთული დრო გავიარე, მაგრამ ახლა ეს ყველაფერი დავიწყებულია და ცხოვრების ახალ ეტაპს ვიწყებ. მადლობა ღმერთს, ფეხი აღარ მაწუხებს. გუნდთან ერთად ვარჯიში რომ დავიწყე, მივხვდი, ყველაფერი კარგად იყო. საიდან "საბურთალო"? საქართველოს ჩემპიონატს თვალს ვადევნებ. "საბურთა

ლომ" კარგი შთაბეჭდილება დატოვა. როცა ვარჯიშის დაწყება გადავწყვიტე, შემოთავაზება მქონდა უკრაინიდან, სადაც კარიერის დიდი ნაწილი გავატარე, მაგრამ უარი ვთქვი.

უცხოეთში რომ მიდიხარ, კარგად უნდა წარმოაჩინო თავი. ჯერ ფორმა უნდა აღვიდგინო, ევროპაში წასვლას მომავალშიც შევძლებ. გიორგი ჭიაბრიშვილს ვთხოვე, ვარჯიშის დაწყების შესაძლებლობა მოეცა. ის გვერდში დამიდგა და მისი დამსახურებაა, ამ გუნდის ფეხბურთელი რომ ვარ.

"საბურთალოს" თითოეულ წევრს გვერდში დგომისა და დახმარებისთვის მადლობას გადავუხდი. ეს ფაქტორი ჩემთვის ძალიან დიდი სტიმულია და ძალას მმატებს", - ამბობს თარგამაძე.

გამოცდილმა ფეხბურთელმა ახალ კლუბზე ილაპარაკა: "ეს ახალგაზრდული, ამბიციური და პერსპექტიული კლუბია. ფეხბურთელების უმეტესობას არ ვიცნობდი, მაგრამ ვიცოდი, რომ მათი დიდი ნაწილი ასაკობრივ ნაკრებებში თამაშობდა.

"საბურთალოს" დიდი მიზნები და გეგმები აქვს და მჯერა, ყველაფრის მიღწევას შეძლებს. რატომ შევაჩერე არჩევანი "საბურთალოზე"? კლუბის სათამაშო მანერა ჩემს გემოვნებაში ჯდება - სწრაფი, შემტევი და სანახაობრივი სტილი ძალიან მიყვარს და ასე სხვა ქართული გუნდი არ თამაშობს.

გადაჭარბების გარეშე ვიტყვი, რომ საქართველოში "საბურთალო" გამორჩეული კლუბია. აქ სწორი ხედვაც გამოარჩევთ და არ შეიძლება ამ ყოველივემ შედეგი არ მოიტანოს.

უბრალოდ, ყველაფერს დრო სჭირდება. ამ კონტიგენტს არა მხოლოდ საქართველოს ჩემპიონობის მოპოვება, არამედ ევროტურნირებზე ღირსეული და წარმატებული თამაში შეუძლია. ევროსარბიელზე მთავარია, ფიზიკურად კარგად წარმოაჩინო თავი და 90 წუთი ბოლომდე იბრძოლო. ქართველებს ტექნიკა სულ გვქონდა, მაგრამ ჩვენი პრობლემა "ფიზიკა" იყო. "საბურთალოში" ესეც კარგ დოენზეა".

თარგამაძე იმედოვნებს, რომ ფეხბურთში თავისი სათქმელი ჯერ არ უთქვამს: "გულშემატკივრებს ვეტყვი, რომ ჩემი კარიერა ჯერ არ დამთავრებულა. მჯერა, "საბურთალოსთან" ერთად დიდ წარმატებებს მივაღწევ და ქართველ ქომაგებს კიდევ გავახარებ".

დიდხანს არც მიფიქრია...

"საბურთალოს" ბედი ეროვნული ნაკრების ფორვარდმა ლადო დვალიშვილმაც დაუკავშირა. 32 წლის თავდამსხმელს უთამაშია თბილისის და ბათუმის "დინამოში", რუსთავის "ოლიმპში", რიგის "სკონტოში", ჰაიფას "მაკაბიში", პოლონეთის "პოლონიაში", "ლეგიასა" და "ლეჩნაში", ასევე - დანიის "ოდენსეში". საკლუბო დონეზე დვალიშვილმა 285 მატჩში 111 გოლი გაიტანა, ნაკრებში ჩატარებულ 34 მატჩში კი თავი 5-ჯერ გამოიჩინა.

"მათ მიმართ სიმპათია აქამდეც მქონდა. "საბურთალო" პროგრესირებადი და მიზანდასახული კლუბია. ძალიან თბილად და მეგობრულად დამხვდნენ, ყველა ახლოს გავიცანი. სიმართლე გითხრათ, შეთავაზებაზე დიდხანს არც მიფიქრია და მალევე შევთანხმდით. გუნდს მწვრთნელის ხელი ეტყობა და შემთხვევითი არ არის, ლიგას რომ ლიდერობს. ვფიქრობ, რამდენიმე კლუბთან ერთად, "საბურთალო" საქართველოში საუკეთესო გუნდია. "საბურთალო" კარგი ფეხბურთელებითაა დაკომპლექტებული, რომელთა იმედი ნამდვილად უნდა გვქონდეს", - ამბობს დვალიშვილი.

მესამე წრიდან ეროვნულ ლიგაში ბევრი გამოცდილი ფეხბურთელი ითამაშებს. დვალიშვილის თქმით, ეს ჩემპიონატის პრესტიჟსა და დონეს წაადგება:

"თარგამაძე, ვაწაძე და ლიპარტია ეროვნულ ლიგაში დაბრუნდნენ, "ტორპედომ" რამდენიმე ლეგიონერი დაიმატა და ეს მაიმედებს - რაც მეტი გამოცდილი ფეხბურთელი ითამაშებს, ეს წაადგება ეროვნულ ლიგას და დონეც შედარებით მოიმატებს. კვალიფიციური ლეგიონერების გამოჩენაც წინ გადადგმული ნაბიჯი იქნება. ახალგაზრდები საქართველოში ყოველთვის იზრდებოდნენ და მომავალშიც გაიზრდებიან".

31 წლის გამოცდილი თავდამსხმელის აზრით, "საბურთალოს" ჩემპიონობისთვის ბრძოლის რეალური საფუძველი აქვს:

"რთული მეორე ნახევარი გველის, რადგან რამდენიმე კარგი კლუბია - "დინამო", "დილა"... მიუხედავად იმისა, რომ "ტორპედო" ლიდერებში არ არის, ანგარიშგასაწევი ძალა იქნება, რადგან ბოლო დროს ძალიან გაძლიერდა და აშკარაა, რომ მოუმატებს. თუმცა გუნდი კარგი ფეხბურთელებითაა დაკომპლექტებული და მშვენიერი შანსი გვაქვს, ქვეყნის ჩემპიონები გავხდეთ და კლუბის ისტორიაში მნიშვნელოვანი ფურცელი ჩავწეროთ".

ყოველდღიური სპორტული გაზეთი "ლელო"
637
მკითხველის კომენტარები / 0 /
რუბრიკის სხვა სიახლეები