დავით მოძმანაშვილის დოპინგ-ისტორია

საწუხაროდ, მოხდა ის, რისიც მთელი ამ წლების განმავლობაში ყოველთვის გვეშინოდა - თავისუფალი სტილით მოჭიდავე დავით მოძმანაშვილს (120) საბოლოოდ დაუმტკიცდა დოპინგის გამოყენება, კერძოდ - ტურინაბოლის და 2012 წელს ლონდონის ოლიმპიადზე მოპოვებული ვერცხლის მედალი ჩამოერთვა. მან ეს მედალი სოკ-ს უნდა დაუბრუნოს, თუმცა ყოფილა პრეცედენტები, როცა გარკვეული სპორტსმენები ამ წესს არ დაემორჩილნენ და სოკ-ს ახალი მედლების დამზადება მოუხდა.

დავით მოძმანაშვილს ოლიმპიური ვერცხლი ჩამოართვეს - დოპინგი

როგორც გითხარით, ამის შიში მას შემდეგ გამუდმებით გვქონდა, რაც საერთაშორისო ანტიდოპინგურმა სააგენტომ უახლესი ტექნოლოგიების გამოყენებით ძველი ოლიმპიადების მედალოსანთა დოპინგ-სინჯების გადამოწმება დაიწყო - კულისებში იმთავითვე ჩურჩულებდნენ, რომ საეჭვო ერთი ქართველის სინჯებიც იყო. საქმეში ჩახედულებმა კარგად იცოდნენ, რომ ეს უცნობი ქართველი დავით მომანაშვილი იყო. მას უკვე მიენიჭა დისკვალიფიკაცია, რაც დასკვნის გამოქვეყნებისთანავე შევიდა ძალაში.

შეგახსენებთ, რომ მოძმანაშვილი ლონდონური თამაშების ფინალში უზბეკეთის სახელით მოჭიდავე არტურ ტაიმაზოვთან დამარცხდა, ვინც მესამედ გახდა ოლიმპიური ჩემპიონი, რითაც ალექსანდრ კარელინისა და ბუვაისა საიტევის დუეტს ამოუდგა გვერდში. თუმცა საინტერესოა, რომ მოგვიანებით ერთი ოქრო მასაც ჩამოართვეს, ოღონდ არა ლონდონის, არამედ მანამდელი - პეკინის თამაშებისა. მისი ოქრო უკვე გადაეცა რუსთა დაღესტანელ ათლეტ ბახტიარ ახმედოვს, მოძმანაშვილის ვერცხლს კი რუსთა მეორე დაღესტანელი ბილიალ მახოვი მიიღებს (ისიც თუ არ ჩავარდა დოპინგზე) - იმხანად დაუმარცხებელი მსოფლიოს სამგზის ჩემპიონი ნახევარფინალში სწორედ ჩვენებურთან დამარცხდა და კარიერაში საბოლოოდ ოლიმპიური ჩემპიონის ტტულის გარეშე დარჩა.

მოძმანაშვილის დისკვალიფიკაციით საქართველოს დღევანდელი თავისუფალი სტილით მოჭიდავეთა ნაკრები არაფერს დაკარგავს, რადგან დასჯილი ათლეტი 2017 წლიდან უზბეკეთის სახელით გამოდის, სადაც სწორედ ტაიმაზოვის შემცვლელად მიიწვიეს და შარსან აზიის ჩემპიონიც გახდა, ხოლო აზიურ თამაშებზე მესამეზე გავიდა. სამაგიეროდ, დაკარგავს ქართული სპორტი, რომელსაც ერთი მნიშვნელოვანი ოლიმპიური მედალი დააკლდება.

დავით მოძმანაშვილმა უზბეკეთს მორიგი დიდი გამარჯვება მოუტანა 

შეგახსენებთ, რომ მოძმანაშვილი ადრე საქართველოში ყოფნის დროსაც იყო დასჯილი დისკვალიფიკაციით დოპინგის მიღების გამო. მაშინ ვადა-მ რეგულაციები გაამკაცრა და მის სისხლი, როგორც კიდევ 5 ქართველი ფალავანისა, მილდრონატის გაზრდილი დოზა აღმოაჩინა. მაშინ ექვსივეს 6-თვიანი დისკვალიფიკაცია მიესაჯა, თუმცა რადგან ამ ახალმა რეგულაციებმა ლამის ნახევარი მსოფლიოს მოჭიდავები იმსხვერპლა, ვადა-მ უკან დაიხია, მაჩვენებლები შეცვალა და მხოლოდ ისინი დასაჯა, ვისაც განსაკუთრებით დიდი დოზა აღმოაჩნდა. ჩვენები მეორე ბანაკში აღმოჩნდნენ და ის დისკვალიფიკაციაც მალევე გაუუქმდათ.

მსოფლიოს მასშტაბის ამ დოპინგ-სკანდალმა შარშანწინ ჩვენც გვახეირა, როცა გიორგი გოგშელიძეს პეკინში მოპოვებული ბრინჯაო ვერცხლში გადაუცვალეს, რაკი ყაზახ ვიცე-ჩემპიონ თეიმურაზ ტიგიევს დოპინგის გამო ვერცხლის მედალი ჩამოართვეს. სხვათა შორის, ჩვენ მაშინაც ვწერდით, რომ საეჭვოთა სიაში ერთი ქართველიც იყო...

994
მკითხველის კომენტარები / 0 /
მსგავსი ამბები
რუბრიკის სხვა სიახლეები
;