დავით მოძმანაშვილმა უზბეკეთს მორიგი დიდი გამარჯვება მოუტანა 

თავისუფალ ჭიდაობაში უზბეკთა ქართველმა მოჭიდავემ, ოლიმპიადის ვიცე-ჩემპიონმა, მსოფლიოსა და ევროპის მესამე პრიზიორმა დავით მოძმანაშვილმა (125 კგ.) შუა აზიის ქვეყანას მორიგი დიდი გამარჯვება მოუტანა: სექტემბერში აზიურ თამაშებზე ჩინებულად გამოსვლის შემდეგ, მან ამ უქმეებზე გაიმარჯვა დაღესტნურ ხასავიურტში ჩატარებულ საკონტინენტთაშორისო თასზე.

ჩვენებურმა პირველ წრეში 3:0; 2:0 დაამარცხა პოლონელი კამილ კოსელიოკი, თურქი სალიმ ერქანი პირველივე პერიოდში 9:0 დაჯაბნა, ხოლო ნახევარფინალში აზერბაიჯანელთა დაღესტნელ მოჭიდავე საიდ გამიდოვს ისევ ქულის დაუკარგავად, 2:0; 5:0 სძლია.

მას ფინალშიც აზერბაიჯანელი მეტოქე ელოდა - მსოფლიოს ფინალისტი ჯამალედინ მაგომედოვი. მოძმანაშვილმა ეს შეხვედრაც აღმავლობით დაიწყო და მალევე 1:0 დაწინაურდა: ფეხში აყვანას ცდილობდა, როცა მეტოქე ორქულიანიდან თავის დასაღწევად ზონის გარეთ გაექცა.

ამის შემდეგ მოძმანაშვილი დიდად არ აქტიურობდა, მაგომედოვი კი, თითქოს, ერიდებოდა პირდაპირ შეტევაზე წასვლას. მას ბევრჯერ წაუგია ჩვენებთან - იყო დრო, პირწმინდად აგებდა ქართველებთან (თუმცა მისგან მწარე ალიყურიც გვახსოვს) და გასაკვირი არაა ასეთი სიფრთხილე. სამაგიეროდ, უხეშობით გამოიჩინა თავი, როცა ჯიკაობით მიმდინარე საკმაოდ უღიმღამო პირველ პერიოდში თვალში თითი ატაკა ქართველს.

ვითარება შედარებით გამოცოცხლდა მეორე პერიოდში, როცა მაგომედოვი ოდნავ გააქტიურდა. მოძმანაშვილიც აჰყვა ტემპში და ერთ მომენტში ფეხშიც შეუხტა, მაგრამ მეტოქე უკან გაუხტა, მერე კი ლეიბზე ჩავარდნილ ჩვენებურს კარგად მოუარა და 2:1 დაწინაურდა. მოძმანაშვილი კიდევ უფრო გააქტიურდა და შეხვედრის დასრულებამდე 15 წამით ადრე ისევ ფეხიდან აყვანას ცდილობდა. მეტოქე ისევ გაექცა ზონის გარეთ, თუმცა ამჯერად ამ გაქცევას ესეც უფრო მომზადებული დახვდა და კი არ გაუშვა, 2-ქულიანზე გადააგდო.

საბოლოოდ 3:2 მის სასარგებლოდ და მეორე დიდი მოგება უზბეკეთისთვის.

დასასრულს, გეტყვით, რომ ამ ტურნირში ჩვენი ნაკრები არ გამოდიოდა, რადგან საქართველოს ჩემპიონატისთვის ემზადება. სპორტსმენები ჯერ ცალ-ცალკე ვარჯიშობენ, პირადი მწვრთნელების მეთვალყურეობით, მალე კი ნაკრები შეკრებასაც დაიწყებს.

ყოველდღიური სპორტული გაზეთი "ლელო"

4929
მკითხველის კომენტარები / 0 /
მსგავსი ამბები
რუბრიკის სხვა სიახლეები