დავით მუჯირი: თოთხმეტ მატჩში ორი გოლი გავიტანე, მაგრამ მეტი მინდა...

რამდენიმე თვეა, "საბურთალოს" 19-წლამდელთა ყოფილი ფეხბურთელი, მესამე თაობის დავით მუჯირი თურქეთში წავიდა და "ანთალიასფორის" 19-წლამდელთა გუნდში ჩაირიცხა.

ახლახან, მის პასპორტს ვადა გაუვიდა და მის გასაგრძელებლად რამდენიმე დღით თბილისში ჩამოვიდა. ჩვენც ვისარგებლეთ შემთხვევით და ახალგაზრდა ფეხბურთელს თურქული ამბები გამოვკითხეთ:

"ძირითადად, "ანთალიასფორის" დუბლშემადგენლობაში ვვარჯიშობ, 19-წლამდელებში კი ვთამაშობ და კმაყოფილი ვარ. უკვე 14 მატჩი ვითამაშე და 2 გოლი გავიტანე. ვეცდები, გავაუმჯობესო შედეგი.

ცოტა ხნის წინ გუნდში ორი ლეგიონერი იყო, მაგრამ წასვლა მოუხდათ და ახლა ერთადერთი უცხოელი მე ვარ. გასული წლის ზაფხულში, როცა "ანთალიაში" მივედი, აკადემიის დირექტორი ესპანელი იყო, ახლა უკვე სხვა ხელმძღვანელია.

ჩვენი გუნდი იმავე ბაზაზე ვარჯიშობს, სადაც მთავარი გუნდი ემზადება და ევროპაში ერთ-ერთი საუკეთესო ბაზაა. ამ დროისთვის შვიდი ბუნებრივი მოედანია და კიდევ სამს აკეთებენ", - ამბობს მუჯირი.

მან ზოგადად თურქულ ფეხბურთზეც ილაპარაკა: "19-წლამდელთა ჩემპიონატში გამორჩეულები "ბურსა" და "გალათასარაი" არიან, დანარჩენებში დონე თანაბარია.

სულ ორთაბრძოლებია, ძირითადად ძალისმიერ ფეხბურთს თამაშობენ. რამდენიმე ტურის წინ მაგარი მატჩი გვქონდა გასვლაზე - "ბურსას" 2:2 ვეთამაშეთ. ამ შემადგენლობიდან უმრავლესობა შარშან თბილისში იყო და "საბურთალოს" უეფას ახალგაზრდულ ლიგაზე დაუპირისპირდა.

ეს გუნდი 19-წლამდელთა პირველობას წლეულსაც ლიდერობს. საერთოდ, თურქი მცველები ძალიან აგრესიულ ფეხბურთს თამაშობენ, რომ იტყვიან - უხეშობის ზღვარზე. ზოგჯერ ზედმეტადაც უხეშობენ და მსაჯებს ყვითელ-წითელი ბარათების ჩვენება ხშირად უწევთ".

ყოველდღიური სპორტული გაზეთი "ლელო"
1040
მკითხველის კომენტარები / 0 /
მსგავსი ამბები
რუბრიკის სხვა სიახლეები
;