დავით მუჯირი: კიტეიშვილს შეუძლია, ჩემზე უკეთესი კარიერა ჰქონდეს...

ავსტრიულმა გამოცემა "ლაოლამ" საქართველოს ფეხბურთის ფედერაციის გენერალურ მდივან დავით მუჯირს "შტურმში" ოთარ კიტეიშვილის ტრანსფერის შეფასება სთხოვა.

მოგეხსენებათ, თავის დროზე ამ კლუბში მუჯირიც თამაშობდა და კარიერის საუკეთესო პერიოდიც იქ გაატარა (106 მატჩი, 21 გოლი). რამდენიმე წლის განმავლობაში ის გრაცელთა ლიდერი გახლდათ...

"ძალიან ბედნიერი ვარ იმის გამო, რომ კიტეიშვილი "შტურმში" გადავიდა. ამასთან, მინდა "შტურმსაც" მივულოცო, რომელმაც შესანიშნავი ფეხბურთელი აიყვანა. დიდი იმედი მაქვს, რომ ის შეძლებს გუნდის კიდევ უფრო გაძლიერებას.

ახლა არ დავიწყებ ლაპარაკს იმაზე, თუ რას ნიშნავს ჩემთვის "შტურმი". ეს არის ჩემი ერთ-ერთი უსაყვარლესი კლუბი... კიტეიშვილი შესანიშნავი ადამიანია. მას აქვს იმის პოტენციალი, რომ "შტურმში" ჩემზე უკეთესი კარიერა ჰქონდეს", - ამბობს მუჯირი და იხსენებს იმ დღეს, როცა კიტეიშვილის მიერ გაფუჭებულმა პენალტმა თბილისის "დინამოს" ჩემპიონობა დააკარგვინა...

"ამის მიუხედავად მან დიდი ძალა გამოავლინა, ბევრი იშრომა და საუკეთესო იყო მინდორზე. რაც შეეხება ფეხბურთელის ძლიერ და სუსტ მხარეებს, ამაზე არაფერს ვიტყვი. ეს მწვრთნელის შესაფასებელია.

ავსტრიის დარად, საქართველოშიც 10-გუნდიანი და 4-წრიანი ჩემპიონატია. ჯერ ორი წრეა ნათამაშები და ორივე წრეში საუკეთესოდ სწორედ კიტეიშვილი დასახელდა. ის ქმნიდა და გაჰქონდა კიდეც. ახალგაზრდა ფეხბურთელებს, რომლებიც "დინამოს" ღირსებას იცავენ, ოთარი კარგ მაგალითს აძლევდა...

თუნდაც, მხოლოდ პროფესიული კუთხით რომ შევხედოთ კიტეიშვილის "შტურმში" გადასვლას, შეიძლება, ის მეტად გამოადგეს საქართველოს ნაკრებს ერთა ლიგის გათამაშებაში, რომელიც სექტემბრის დასაწყისში აიღებს სტარტს".

ყოველდღიური სპორტული გაზეთი "ლელო"
1398
მკითხველის კომენტარები / 0 /
მსგავსი ამბები
რუბრიკის სხვა სიახლეები
;