დავით მუჯირი სიახლეებს ემხრობა -კლუბების ლიცენზირებისა და ფინანსური 'ფეარ პლეის' საკითხები

კლუბების ლიცენზირებისა და ფინანსური “ფეარ პლეის” საკითხები 21-ე საუკუნეში უეფამ ახალ საფეხურზე აიყვანა.

სხვა სახეობებთან კონკურენციის პირობებში, ევროპული ფეხბურთის ორგანიზაციის მოთხოვნები წლიდან წლამდე მკაცრდება - ფეხბურთი პირველი სახეობის სტატუსის შენარჩუნებას ასე ცდილობს.

ახლა კლუბების ლიცენზირებისა და ფინანსური “ფეარ პლეის” საკითხებზე სემინარს თბილისი პირველად მასპინძლობდა. მისი ინიციატორი საქართველოს ფეხბურთის ფედერაცია გახლდათ, ხოლო ორგანიზატორი - უეფა. სემინარს უეფას წარმომადგენლები გაუძღვნენ.

მასში მონაწილეობდნენ კრისტალბეთ ეროვნულ ლიგაში ჩართული 12 ქართული კლუბის ხელმძღვანელები და იმ აუდიტორული კომპანიების წარმომადგენლები, რომლებიც კლუბების ლიცენზირების პროცესში არიან ჩართულები.

სემინარის მიმდინარეობისას შეხვედრის მონაწილეებმა დეტალურად მიმოიხილეს ევროპული საკლუბო ფეხბურთის მონაცემთა ანალიზი და ფინანსური “ფეარ პლეის” საკითხები. კლუბების ლიცენზირებისა და ფინანსური “ფეარ პლეის” საკითხებში სემინარი საქართველოში პირველად ჩატარდა. სფფ-ის ცნობით, შეხვედრის მთავარი მიზანი ლიცენზირების პროცესის ევროპული სტანდარტის შესაბამისად უზრუნველყოფაა.

სემინარი დავით მუჯირმა გახსნა. საქართველოს ფეხბურთის ფედერაციის გენერალურმა მდივანმა ინიციატივის აუცილებლობაზე ისაუბრა.

“კლუბების ლიცენზირებისა და ფინანსური ფეარ პლეის საკითხების სემინარი ქართული კლუბებისათვის კიდევ ერთი წინგადადგმული ნაბიჯი და აუცილებელი გამოცდილების გაზიარებაა, რათა ქართულმა საკლუბო ფეხბურთმა ევროპულ მოთხოვნებსა და სიახლეებს ფეხი აუწყოს”, - ამბობს დავით მუჯირი.

აქვე ვიტყვით, რომ ფინანსური “ფეარ პლეის” საკითხები ევროპულ ფეხბურთში განსაკუთრებით აქტუალურია, მაგრამ არანაკლებ მნიშვნელოვანია საქართველოშიც. მაგალითად, კლუბი მოთამაშეებს უნიშნავს ხელფასებს, რომლის გადახდის საშუალება ფინანსური ოპერაციებიდან გამომდინარე არ აქვს.

ასეთ შემთხვევაში, საქმე გვაქვს ან ფინანსურ პირამიდასთან, ელემენტარულ სპორტულ აფერისტობასთან ან უფრო უარესთან - კავშირი ტოტალიზატორთან. ფაქტია, რომ ბევრ წარმატებულ ქართულ კლუბში პრობლემები სწორედ ფინანსური პირამიდის გამო შეიქმნა და ამან არაერთი მათგანი შეიწირა.

კლუბების ლიცენზირებისა და ფინანსური “ფეარ პლეის” საკითხებზე სემინარი ამიტომ არ იყო რიგითი მოვლენა. ამ კუთხით თუ ჩვენი კლუბები განვითარდებიან და ევროპულ ჩარჩოში მოექცევიან, ეს ისევ ქართულ ფეხბურთს წაადგება.

ყოველდღიური სპორტული გაზეთი "ლელო"
728
მკითხველის კომენტარები / 0 /
მსგავსი ამბები
რუბრიკის სხვა სიახლეები
;