დავით ქევხიშვილი 'ლელოს': ნაკრების მწვრთნელად უცხოელი აქამდეც მინდოდა

საქართველოს ძიუდოს ფედერაციაში ვაჟთა ნაკრების ახალი მთავარი მწვრთნელის საკითხთან დაკავშირებით ხვალ, 4 მაისს აღმასკომის სხდომა გაიმართება. ამის თაობაზე ძიუდოს ფედერაციის პრეზიდენტმა დავით ქევხიშვილმა გვითხრა:

"პარასკევს შეიკრიბება აღმასკომი და ის იმსჯელებს ამ საკითხებზე. მე ოთხშაბათსაც მინდოდა მისი შეკრება, რადგან დრო არ ითმენს, მაგრამ რამდენიმე წევრი პარლამენტარია და მოუცლელობის გამო მათ ითხოვეს სხდომის გადადება. აღმასკომზე დეტალურად უნდა განიხილონ მომხდარის მიზეზები, როგორ უნდა გავაგრძელოთ მუშაობა სამომავლოდ, პირველ რიგში - მსოფლიოს ჩემპიონატამდე, რომ სპორტსმენებს არ შეექმნათ არანაირი პრობლემა.

მსოფლიოსთვის მოსამზადებლად უკვე შედგენილი იყო გეგმა და ბილეთებიც ნაყიდი იყო, ვის სად უნდა გაეგრძელებინა მომზადება. ეს გეგმა ასეც გაგრძელდება და ის თანაშემწე მწვრთნელები ისევ გაჰყვებიან შეგირდებს. როცა მთავარი მწვრთნელი გვერდზე დგება, ავტომატურად გვერდზე დგება მისი გუნდიც, თუმცა ეს იმას არ ნიშნავს, რომ ისინი დღეს საწვრთნელ პროცესში მონაწილეობას აღარ მიიღებენ.

   ⇒დავით ქევხიშვილი სამწვრთნელო შტაბის გადადგომის მიზეზს განმარტავს [VIDEO]

თუმცა ის უკვე სხვა სტატუსით იქნება, მას არ ექნება თანაშემწის სტატუსი. მაგალითად, ბილეთები უკვე ნაყიდია და იაპონიაში ლაშა შავდათუაშვილს და ვაჟა მარგველაშვილს ისევ მინდია ბოდაველი გაჰყვება; დანარჩენებს ისევ გურამ მოდებაძე წაიყვანს კორეაში შეკრებაზე; სხვა ყოფილი თანაშემწეები აქ დარჩენილებს ისევ ძველი დაგეგმილი სხვა პროგრამით მოამზადებენ."

ერთი სიტყვით, მსოფლიოს ჩემპიონატისთვის მზადება ჩვეულებრივ გაგრძელდება, ოღონდ როცა გაირკვევა, ვინ იქნება მწვრთნელი ან რა ფორმატით - მოვალეობის დროებით შემსრულებელი მსოფლიომდე თუ როგორ, ამის შემდეგ დაბალანსდება ყველაფრი. თუმცა ვარჯიშის პროცესს ხელი არ უნდა შეეშალოს.

ქევხიშვილს საკუთარი პოზიციის დაფიქსირება იმაზეც ვთხოვეთ, პირადად თვითონ ქართველი მწვრთნელის კანდიდატურას ემხრობა თუ - უცხოელისას. ამაზე მან შემდეგი გვიპასუხა:

"ამ კონკრეტულ შემთხვევაში უმრავლესობა - აღმასკომი, შემდეგ, თუ საჭიროა, ყრილობასაც მოვიწვევთ, კონსულტაციას გავივლით სამინისტროსთანაც, მოვუსმენთ ბიჭებსაც იმ ნაწილში, სადაც მათ აქვთ საუბრის უფლება, შეთანხმდებიან იმაზე, რომ ამ სამწვრთნელო გუნდთან ერთად მათ აქვთ პოტენციალი, მივიდნენ მსოფლიოს ჩემპიონატამდე და იქ ეს ყველაფერი გამოასწორონ, ამაზე თუ შეთანხმდებიან, არაფერი მაქვს საწინააღმდეგო.

მე ჩემი გასაკეთებელი ამ ნაწილში გავაკეთე იმით, რომ ვთქვი - კმარა! ოღონდ თუ უმრავლესობა შეთანხმდება, რომ ისევ ძველმა გუნდმა გააგრძელოს მზადება, დიდი სიამოვნებით დავეთანხმები, ოღონდ ეს უნდა იყოს საერთო კონსესუსის ამბავი. თუ ამაზე ვერ შეთანხმდებიან, მაშინ მე ვემხრობი უცხოელს ქართველი თანაშემწეებით. ეს აქამდეც იყო ჩემი დიდი სურვილი და ამ კუთხით მუშაობაც დაწყებული გვქონდა, თუმცა განხორციელება ვერ შევძელით, რადგან უცხოელებმა არ მოისურვეს თანამშრომლობა."

ერთი სიტყვით, ნუ გაგვიკვირდება, მსოფლიოს ჩემპიონატზე ჩვენს ნაკრებს ისევ ძველი სამწვრთნელო შტაბი თუ წაიყვანს, ოღონდ - შეცვლილი სტატუსით. თუმცა როგორც ქევხიშვილი ამბობს, ეს უნდა გადაწყვიტოს აღმასკომმა და უმრავლესობამ.

2140
მკითხველის კომენტარები / 0 /
მსგავსი ამბები
რუბრიკის სხვა სიახლეები