დავით ხოჭოლავა: ცოტა ვინერვიულე...

საქართველოს ეროვნული ნაკრებისა და დონეცკის "შახტარის" 24 წლის მცველმა დავით ხოჭოლავამ თავისი წვლილი შეიტანა ჩემპიონთა ლიგაში როტერდამის "ფეიენოორდის" დამარცხებაში (2:1).

ის მინდორზე 77-ე წუთზე შევიდა. იმ დროისთვის უკრაინული კლუბი კაცნაკლული იყო და ჩვენებურის დახმარებით სასურველი ანგარიში შეინარჩუნა.

"სიმართლე გითხრათ, ცოტა ვნერვიულობდი, როცა მინდორზე შევედი. რიცხობრივ უმცირესობაში ვიყავით, ვიგებდით და ყველაფერი უნდა გაგვეკეთებინა იმისთვის, რომ მატჩი სასურველი ანგარიშით დაგვესრულებინა...

ჩვენ საწყისი 10 წუთის განმავლობაში თამაშზე კონტროლი დავაწესეთ, მაგრამ გოლი მაინც გავუშვით. "ფეიენოორდი" გამორჩეულია იმით, რომ ჰყავს სწრაფი ფეხბურთელები. უნდა გვეთამაშა ორგანიზებულად და, ამასთან, მოგვეხერხებინა ბურთის შენარჩუნება.

ჩვენ გვყავს ისეთი ძლიერი ინდივიდუალისტები, როგორებიც არიან ტაისონი, მარლოსი და ბერნარდი. როცა მათ უჩნდებათ თავისუფალი ზონა, ისინი შეუჩერებლები არიან...

ძალიან სასიხარულოა ეს გამარჯვება, მაგრამ ჯერ ჯგუფიდან გასვლაზე ლაპარაკი ადრეა, რადგან წინ კიდევ სამი ტურია", - უთხრა ხოჭოლავამ "შახტარის" პრესსამსახურს.

"ვინ იქნება "შახტარის" მეორე ცენტრალური მცველი "ფეიენოორდთან" საშინაო მატჩში? ჩვენ კვირას კიევის "დინამოსთან" გვაქვს თამაში და ახლა მხოლოდ ამაზე ვფიქრობთ. დასრულდება კიეველებთან შეხვედრა და მერე გადავერთვებით როტერდამელებთან მატჩზე. სანერვიულო არაფერია. მაგალითად, ხოჭოლავა შეცვლაზე შევიდა და ის შესანიშნავი იყო", - განაცხადა "შახტარის" მთავარმა მწვრთნელმა პაულუ ფონსეკამ.

ყოველდღიური სპორტული გაზეთი "ლელო"

2658
მკითხველის კომენტარები / 0 /
მსგავსი ამბები
რუბრიკის სხვა სიახლეები