'დაინტერესება რუსეთიდან და საფრანგეთიდან არის' - თბილისის 'ლოკომოტივის' ახალგაზარდა შემტევი რევაზ ინჯგია

წლევანდელ სეზონში "ლოკომოტივმა" გაორებული შთაბეჭდილება დატოვა. გუნდს პოტენციალი აქვს, მაგრამ არასტაბილურია. თუმცა, შესაძლოა, წელს ჩვენ ახალი გუნდის პირველი ნაბიჯებიც ვიხილეთ, რომელსაც მინიმუმ სამეულისთვის ბრძოლა შეუძლია...

ამ გუნდში წელს ერთი საინტერესო თავდამსხმელი გამოჩნდა, რომელიც ეროვნული ლიგის სეზონის ერთ-ერთ აღმოჩენად შეიძლება მივიჩნიოთ - რევაზ ინჯგია.
17 წლის ფეხბურთელი საქართველოს 19-წლამდელთა ნაკრების წევრია. ლაშა ჭაღიაშვილმა მას წელს შანსი მისცა. ნიჭიერმა ახალგაზრდამ ეროვნულ ლიგაში 16 შეხვედრა ჩაატარა, მათ შორის, ერთი - ძირითად შემადგენლობაში.

ინჯგიამ მთავარ გუნდში გადასვლის მტკივნეული პროცესი იოლად გადაიტანა, ნელ-ნელა ათამაშდა - თბილისის "დინამოსთან" კონტრშეტევებს ამწვავებდა, გაჩემპიონებულ "საბურთალოსთან" პენალტი მოიპოვა, ბოლნისის "სიონთან" 33-ე ტურის შეხვედრაში კი თავი ისეთი გოლით გამოიჩინა, ნებისმიერი ვარსკვლავი რომ მოაწერდა ხელს - საკუთარი საჯარიმოდან ბურთიანად უსწრაფესად ჩაუქროლა ბოლნისელ მოთამაშეებს და დაახლოებით 75-მეტრიანი სოლორეიდი გოლით დაასრულა.

პარალელურად, ინჯგია სულიკო დავითაშვილის ხელმძღვანელობით საქართველოს 19-წლამდელთა ლიგაში თამაშობდა, სადაც "ლოკომოტივი" ჩემპიონი გახდა. დავითაშვილის გუნდმა ჩემპიონის ტიტული 1 დეკემბერს, საგურამოს ბაზაზე "სამტრედიასთან" ფეერიული გამარჯვების (12:1) შედეგად მოიპოვა.

საინტერესო ფაქტი - "ლოკომოტივმა" 19-წლამდელთა B ჯგუფსა და ოქროს ლიგაში, მთელი სეზონის განმავლობაში წაუგებლად იასპარეზა. დავითაშვილის ბიჭებმა 28 მატჩიდან 25 მოიგეს, 3 კი ფრედ დაასრულეს და... 139(!) გოლი გაიტანეს.

19-წლამდელთა ოქროს ლიგაში საუკეთესო მაჩვენებელი სწორედ რევაზ ინჯგიას აქვს - მან მეტოქეთა კარი 28-ჯერ აიღო. ბომბარდირებს შორის მეორე ადგილზე მისი თანაგუნდელი შოთა შეყილაძე გავიდა, რომელმაც 26 გოლი მიითვალა.

ვისაც ამ ბიჭის თამაში უნახავს, დაგვეთანხმება, რომ ამ უსწრაფეს და დაუღალავ თავდამსხმელს პერსპექტივა ეტყობა და ჩვენი ინფორმაციით, უკვე კონკრეტული წინადადებებიც აქვს. 5 დეკემბერს ის გიორგი მიქაძემ საქართველოს 19-წლამდელთა ნაკრებში გამოიძახა და ძირითად შემადგენლობაშიც ათამაშა იტალიელებთან მოგებულ (2:1) მატჩში.

"ლელომ" ახალგაზრდა ფეხბურთელთან ინტერვიუ ჩამოართვა - ბავშვობაზე, მომავალზე, პერსპექტივაზე...

- ფეხბურთის თამაში როდის დაიწყეთ?

- 5 წლის ვიყავი, ფეხბურთზე რომ შევედი.

- თავიდანვე "ლოკომოტივში" ვარჯიშობდით?

- არა, პირველი საფეხბურთო სკოლა იყო "ავაზა", მერე თბილისის "დინამოს" აკადემიაში გადავედი, საიდანაც "საბურთალოში" წასვლა ვამჯობინე.

"ლოკომოტივში" კი ბოლო ორი წელია, რაც ვთამაშობ.

- მამათქვენი, გია ინჯგია, საფეხბურთო წრეებში კარგად ცნობილი პიროვნებაა. რა გავლენა მოახდინა მან ფეხბურთელად თქვენს ჩამოყალიბებაზე?

- თითქმის ყველაფერი მამაჩემის დამსახურებაა - ფეხბურთზე შეყვანიდან დაწყებული - დღემდე. ის წლებია ფეხბურთში ტრიალებს და ბევრი ისეთი დეტალის ახსნით მეხმარებოდა, რაც ყველა დამწყებ ფეხბურთელს სჭირდება. ბავშვობიდან მომყვება და მიხარია, ოჯახში ასეთი მრჩეველი რომ მყავს. ახლა "შევარდენის" მთავარი ექიმია, მანამდე უმუშავია "ლოკომოტივის" აკადემიაში, სოხუმის "ცხუმსაც" ეხმარება და კლინიკაშიც მუშაობს.

- მამა, რომელიც ექიმია და თან ფეხბურთშია, ბევრ რამეში დაგეხმარება რჩევით - ტრავმების თავიდან აცილებაში, კვების რაციონის სწორად შერჩევაში... კიდევ?

- არა მხოლოდ ამაში, ნებისმიერ ცხოვრებისეულ საკითხში მეხმარება.

- "ლოკომოტივის" ფორმით ეროვნულ ლიგაში წელს პირველად გამოჩნდით. ბავშვებიდან დიდებში გადასვლა ძნელია, მაგრამ ეს ეტაპი საკმაოდ უმტკივნეულოდ გადალახეთ...

- რა თქმა უნდა, რთულია, რადგან ასაკობრივ გუნდებთან შედარებით ეროვნული ლიგაში ბევრად მეტი მოთხოვნები და დატვირთვებია. მაგრამ ჩემი გამოცდილი თანაგუნდელების მხარდაჭერას მუდამ ვგრძნობ და ვცდილობ, ამ სირთულეებს თავი გავართვა.

- "სიონთან" თქვენი გოლი ყველას დაამახსოვრდა - გრძელი სოლორეიდი და გოლი. ჩამოყალიბებულ ვარსკვლავსაც შეშურდებოდა...

- მადლობა ასეთი შეფასებისთვის. მე რაღა უნდა ვთქვა?.. მართლა არ იყო ცუდი გოლი...

- 10, 20 და 30 მეტრს რამდენ წამში ფარავთ?

- სიმართლე გითხრათ, არ ვიცი.

- თამაშის დროს რამდენი კილომეტრი დაგიფარავთ?

- მაგალითად, იტალიის 19-წლამდელებთან შეხვედრაში 11 კილომეტრი დავფარე და 29 სპრინტი მქონდა.

- ფაქტია, ძალიან სწრაფი ხართ. უფრო რომელი სისწრაფე გაქვთ - სასტარტო თუ სპრინტული?

- მწვრთნელებისგან ვიცი, რომ ორივე მაქვს, მაგრამ ჩემი აზრით, სასტარტო უკეთესი მაქვს.

- 19-წლამდელების ჩემპიონატის ბომბარდირი გახდით 28 გოლით. მშვენიერი შედეგია...

- ჩვენი მიზანი ჩემპიონობა იყო და ამაში მოკრძალებული წვლილი მეც შევიტანე. ეს ბომბარდირობა დიდი შრომისა და გუნდის კარგი თამაშის დამსახურებაა.

- საქართველოს ნაკრებმა შესარჩევი ციკლი ჩააგდო. მაგრამ ეს უკვე გავლილი ეტაპია. იტალიის 19-წლამდელებთან მატჩზე რას იტყვით?

- შესარჩევ ციკლში ჩავარდნას უიღბლობას დავაბრალებდი, იტალიასთან კი გუნდის ყველა ფეხბურთელმა მთელი სული და გული ჩადო. ამით მოვიგეთ. ასეთ თამაშებში უკეთესად შეიძლება საკუთარი თავის დანახვა. მიმაჩნია, რომ ჩვენი განვითარებისთვის ამ დონის მეტოქეებთან თამაშები ძალიან კარგი და სასარგებლოა.

- იტალიასთან მოგებით გსურდათ, დაგემტკიცებინათ, რომ შესარჩევი ციკლი შემთხვევით ჩააგდეთ?

- დიახ, რა თქმა უნდა. მაგრამ მე მაინც მგონია, რომ ყველაფრის მიზეზი უიღბლობა იყო.

- ვიცით, რომ თქვენით მოსკოვის "ლოკომოტივია" დაინტერესებული. ეს კონკრეტული შემოთავაზება იყო თუ ინტერესის დონეზე გაჩერდნენ?

- ამ ეტაპზე თბილისის "ლოკომოტივში" თავის დამკვიდრებაზე ვფიქრობ, დანარჩენს კი დრო გვიჩვენებს.

- ანუ სერიოზული არაფერი იყო?

- რამდენიმე სერიოზული შემოთავაზება არის და ამაზე მამაჩემთან საუბრობენ.

- ქვეყნები მაინც გვითხარით...

- როგორც ვიცი, საფრანგეთის ლიგა 1-ის და რუსეთის პრემიერლიგის გუნდები დაინტერესდნენ...

- სინჯებზეა ლაპარაკი თუ კონტრაქტზე?

- როგორც ვიცი, პირდაპირ კონტრაქტზე. თუმცა, არ მინდა ვიჩქარო და გამოვაცხადო, რომ ეს საკითხი გადაწყვეტილია. ყველაფერს დრო გვიჩვენებს.

ყოველდღიური სპორტული გაზეთი "ლელო"
1333
მკითხველის კომენტარები / 0 /
მსგავსი ამბები
რუბრიკის სხვა სიახლეები