დაპირისპირება ევროპულ რაგბიში: გააძევეთ იტალია 6 ერიდან და შეუშვით საქართველო!

მეტი, ვიდრე იტალია?! - ევროპულ მედიაში 6 ერში საქართველოს პერსპექტივას განიხილავენ

კორონავირუსის პანდემიის გამო, რაგბის სამყარო გაჩერებულია, თუმცა არ წყდება დისკუსიები ექვსი ერის ტურნირის სავარაუდო რეორგანიზაციაზე. მეტიც, ევროპულ მედიაში ამის შესახებ უფრო მეტი ინტენსივობით წერენ. ბუნებრივია, ეს თემა რაგბის ქართველი გულშემატკივრებისთვის ძალზე საინტერესოა, რადგან უშუალოდ ეხება საქართველოს ნაკრების პერსპექტივას...

ის უკვე გასცდა ჟურნალისტების მოსაზრებებს, საქმეში სპეციალისტები ჩაერივენ. მას მერე, რაც იტალიელებმა ექვს ერზე ზედიზედ 25-ე მატჩი დათმეს, Press Association თებერვალში წერდა: "უკვე ძნელია იტალიის გამართლება, საქართველო თავისას ითხოვს".

ამის შემდეგ სერ კლაივ ვუდვორდმა Daily Mail-ში სპეციალური სტატია მიუძღვნა მსოფლიო რაგბის ორგანიზაციის თავმჯდომარის არჩევნებს და ექვსი ერის საკითხსაც შეეხო. ვუდვორდი რაგბის მამებს მოუწოდებდა, "ერთხელ მაინც გაეკეთებინათ სწორი არჩევანი". მას მერე, რაც ორგანიზაციამ ისევ ბილ ბომონტი აირჩია, ინგლისელმა სპეციალისტმა დაწერა, რომ "მსოფლიო რაგბიმ უნიკალური შანსი გაანიავა".

ბილ ბომონტმა პირველ რიგში, სწორედ ის აღნიშნა, რომ ექვს ერს მსოფლიო რაგბის ორგანიზაცია არ შეეხებოდა.
მაგრამ ყველაზე დიდი აჟიოტაჟი ინგლისის ნაკრების ყოფილი მორაგბის, სტიუარტ ბარნსის სტატიას მოყვა პრესტიჟულ The Times-ში, ის ექვსი ერიდან იტალიის გაძევებასა და საქართველოსთვის შანსის მიცემას ითხოვდა.

სტატიამ განსაკუთრებით იტალიაში გამოიწვია აჟიოტაჟი, ბარნსს იტალიური რაგბის ლეგენდებმა მაურო ბერგამასკომ და მასიმო ჯოვანელიმ უპასუხეს.

იტალიელებს მხარი ირლანდიის რაგბის კავშირის აღმასრულებელმა დირექტორმა ფილიპ ბრაუნმა დაუჭირა, მან პოდკასტ Off The Ball-ზე განაცხადა, რომ "საქართველო ექვს ერს იმაზე მეტს ვერ შემატებს, რასაც იტალია".

ფილიპ ბრაუნი (IRFU): "წლების განმავლობაში გვესმის საქართველოს შესახებ, როგორც იტალიის ალტერნატივაზე ექვს ერში. იტალიამ საქართველოს რამდენჯერმე მოუგო. არა მგონია, რომ საქართველომ ტურნირს მეტი მისცეს, ვიდრე იტალიამ. ირლანდია რომ დააქვეითონ და მას საქართველოსთან, რუსეთთან, ესპანეთთან და გერმანიასთან მოუწიოს თამაში, შედეგი მყისიერი. ფინანსური კრახი გარანტირებული იქნება".

ბრაუნს The Times-ში სტიუარტ ბარნსმა უპასუხა. ბარნსი წერს, რომ ირლანდია ხელს არ უნდა უშლიდეს მსოფლიოში რაგბის განვითარებას, "წინააღმდეგ შემთხვევაში, მე ამ სახეობის მომავლის იმედი აღარ მაქვსო".



ამის მტკიცება სასაცილოა

გუშინ ექვსი ერის მოდერნიზაციის თემას The Irish Sun-ის სპორტული რედაქტორი ნილ ო'რიორდანი გამოეხმაურა: "მსოფლიოში რაგბის განვითარებას აფერხებენ ტრადიციული მმართველები, რომლებსაც საკუთარი ძალაუფლებისა და გავლენის დაკარგვის ეშინიათ".

ბრაუნი წერდა, რომ იტალიამ რამდენჯერმე მოუგო საქართველოს და დაამტკიცა, რომ უკეთესია. ო'რიორდანი სხვანაირად ფიქრობს:

"იტალია საქართველოს ტესტებში სულ ორჯერ შეხვდა, 2003 და 2018 წლებში და მოუგო 9 და 11 ქულის სხვაობით. ჩემი რჩევაა, არასდროს დაავალოთ ბრაუნს გამოკითხვის მოწყობა მისეული საზომებით. იმის თქმა, რომ ეს ორი მატჩი (15-წლიანი შუალედით) არის მტკიცებულება იტალიის ნაკრების უპირატესობის და იმის გარანტია, რომ საქართველო გარეთ დარჩეს, სასაცილოა.

იტალია ექვს ერს 2000 წელს შეუერთდა, თუ არ ჩავთვლით მსოფლიოს თასებს, საქართველო, თუ გაუმართლებს, წელიწადში ერთხელ ხვდება პირველი დონის ნაკრებებს".

მოკლედ, ირლანდიელ ჩინოვნიკს ირლანდიაშივე უპასუხეს: "IRFU-ს გენერალურმა დირექტორმა ფილიპ ბრაუნმა ზუსტად მაშინ განაცხადა, რომ ჩრდილოეთ ნახევარსფერო ისევ ჩაკეტილი უნდა დარჩეს, როცა სამხრეთის ქვეყნებმა, ახალმა ზელანდიამ, სამხრეთ აფრიკამ, ავსტრალიამ და არგენტინამ ერთობლივი განცხადება მიიღეს, რაგბის განვითარების ახლებურ პრინციპებზე, სადაც ერთი პუნქტი სპეციალურად განვითარებად ქვეყნებს ეძღვნება".

შეგახსენებთ, რომ ექვსი ერის პირველობაში იტალიას 2015 წლის შემდეგ არ მოუგია, მაშინ, როცა საქართველოს ნაკრებს რაგბის ევროპის ჩემპიონატში პრაქტიკულად აღარ ჰყავს კონკურენტები. საქართველო მსოფლიო რაგბის რეიტინგში მე-12 პოზიციაზეა, იტალია - მე-14-ზე.


6918
მკითხველის კომენტარები / 2 /
qqqq
7
არ არის საქართელო მზად და რა ვუყოთ??? იაპონია ტონგა ფიჯი ამათ ვეთამაშოთ ჯერ !!!
ქუთაისელი
0
არ არის მზად მართალია, მაგრამ თუ არ ეთამაშე მათ ვერც ვერასდროს იქნები მზად. იტალიის წინააღმდეგი არ ვარ მაგრამ რაც ისინი 6 ერში არიან; ჩვენ რომ მასეთი შანსი გამოგვჩენოდა იმედია ერთ ან ორ ბობოლას მოუგებდით და მინიმუმ 10 ეულში შევიდოდით. სწორედ ამიტომაა აუცილებელი და საჭირო 6 ერი, რომ განვითარდე შენზე კარგ გუნდებს უნდა ეთამაშო...
14:02 2020.07.04
დალი
1
ჩვენები დღევანდელ იტალიურ გუნდს ბევრად სჯობნის.ეს თვითონ იტალიელებმაც იციან,მაგრამ გავარდნას ვერ ეგუებიან.
მსგავსი ამბები
რუბრიკის სხვა სიახლეები
;