დასავლეთ და აღმოსავლეთ საქართველოს ნაკრებების დაპირისპირებაში პირველი 'ამერმა' მოიგო

იმერი-ამერი 12:21

იმერი: (15-9) კობახიძე, გოგიტიძე (წივწივაძე 41), ლოსაბერიძე (ძნელაძე 26), ირემაძე (სიმსივე 41), აბრამიძე, გობეჯიშვილი (მანაგაძე 41), როხვაძე; (1-8) სალდაძე (ერისთავი 41), ტორაძე (ერემეიშვილი 26), დონაძე (გოგისვანიძე 36), ბაბუნაშვილი, შალამბერიძე, ხანთაძე (ლეშქაშელი 34), დანგაძე (ფუტკარაძე 41), ბუჯიაშვილი.

2ლ: წივწივაძე, ფუტკარაძე. გ: კობახიძე

ამერი: (15-9) კიკნაძე, ხარაზიშვილი, ნინიძე (ხელაია 41), კავთიძე, გოგოლაშვილი (თაბუკაშვილი 41), ბასილაია (მოძღვრიშვილი 63), პერანიძე (გედეხაური 61); (1-8) ქვათაძე (ორაგველიძე 53), ლომაური (ხუროშვილი 15), პატარაია (ქართველიშვილი 48), ჯიმშელეიშვილი (აქუბარდია 57), ტრაპაიძე, სუხაშვილი, დარასელია (ილურიძე 52), ამირანაშვილი.

3ლ: ჯიმშელეიშვილი, ამირანაშვილი, ხუროშვილი. 3გ: ხარაზიშვილი

მსაჯი: სულახან ჩიხლაძე

საქართველოს ჩემპიონატის დასრულებისთანავე ფინალისტების, "ლოკომოტივისა" და "აიას" მწვრთნელებს დასავლეთ და აღმოსავლეთ საქართველოს ნაკრებების, ამერ-იმერის შექმნა დაევალათ, რომლებიც 26 მაისს ქუთაისის "აია არენაზე" პირველად დაუპირისპირდნენ ერთმანეთს.

მატჩი, ძირითადად, აღმოსავლეთელების უპირატესობით წარიმართა და ამერის გამარჯვებით დასრულდა - 21:12.

პირველ ტაიმში ამერი მეტოქეს ყველა კომპონენტში ჯობდა. ეგ იყო, მხოლოდ შერკინებისას გაუჭირდა ოდნავ. სხვა მხრივ, აღმოსავლეთელები უფრო მონდომებულნი და მოტივირებულნი ჩანდნენ და მეტოქეს ორი უპასუხო ლელო გაუტანეს.

მე-19 წუთზე თავი კობა ჯიმშელეიშვილმა გამოიჩინა, რომელმაც ბურთი ლელოდან ორ მეტრში წარმოქმნილი რაკიდან აიტაცა, დაუცველ სივრცეში შეიჭრა და ჩათვლის მოედანში შეაღწია. რამაზ ხარაზიშვილმა ზუსტად გარდასახა - 7:0.

მეორე ლელო ამერმა პირველი ტაიმის დასრულებამდე სამი წუთით ადრე გაიტანა. მორაგბეებმა ხელდახელ ბურთაობით მარცხენა ფრთაზე შეუტიეს და მესამეხაზელმა ვახტანგ ამირანაშვილმა ბურთი კარის ძელებს შორის დაამიწა. ხარაზიშვილს გარდასახვა არ გასჭირვებია - 14:0. ასე დასრულდა პირველი ტაიმი.

შესვენებისას იმერის შემადგენლობაში ცვლილებები მრავლად განხორციელდა. გუნდმა ტემპს უმატა და საწყის შვიდ წუთში ორი ლელო გაიტანა. 42-ე წუთზე დასავლეთელთა ლამაზი შეტევა შეცვლაზე შესულმა ნიკა წივწივაძემ დაასრულა. ლელო ბახვა კობახიძემ გარდასახა - 7:14.

ხუთ წუთში კიდესთან ახლოს ლელო კიდევ ერთმა შეცვლაზე შესულმა, მესამეხაზელმა ვანო ფუტკარაძემ გაიტანა. კობახიძემ, რომელმაც ამ ლელოში ლომის წილი დაიდო, ვერ გარდასახა - 12:14.

ამერელები ამის შემდეგ ისევ გამოცოცხლდნენ და ტემპს უმატეს. ხელიდან გაშვებული უპირატესობაც ნელ-ნელა დაიბრუნეს. გამარჯვების მომტანი ლელო კი 70-ე წუთზე შეცვლაზე შესულმა შერკინების კვაჭმა გიორგი ხუროშვილმა გაიტანა. ხარაზიშვილმა ესეც გარდასახა - 21:12.
ამერს იმერის დამარცხებისთვის ჯილდოდ ამ მატჩზე დაწესებული თასი გადაეცა.

ყოველდღიური სპორტული გაზეთი "ლელო"
951
მკითხველის კომენტარები / 0 /
მსგავსი ამბები
რუბრიკის სხვა სიახლეები
;