დაუვიწყარი ქამბექები: ისტორიული მატჩები, რომლებიც დავიწყებას არასდროს მიეცემა

ფეხბურთი იმადაც არის დღემდე სპორტის ნომერ პირველი სახეობა, რომ არცთუ იშვიათად სასწაულებიც ხდება.

დღევანდელ ჩვენს წერილში საქვეყნოდ აღიარებული დიდი “ქამბექების” ისტორიებს გავეცნობით, ისტორიებს, როცა დარწმუნებული ვიყავით ამა თუ იმ გუნდის გამარჯვებაში და მოხდა სრულიად საპირისპირო, დაუჯერებელი...

სათქმელ-საწერი ნამდვილად ბევრია და იმისიც გვჯერა, რომ ჩვენს წერილს ინტერესი არ მოაკლდება...

მუნდიალი 1970. მეოთხედფინალი
ინგლისი-გერმანია 2:3

ინგლისში ყველა აღიარებს, რომ გაქანებითა და შესაძლებლობით 1970 წლის ინგლისის ნაკრები უფრო ძლიერი იყო, ვიდრე ის, რომელმაც 1966 წელს საშინაო მუნდიალი მოიგო. 1970 წლის მსოფლიოს ჩემპიონატის მეოთხედფინალში ინგლისი 2:0-ს უგებდა დასავლეთ გერმანიას (გფრ), მაგრამ... მერე 3 გოლი გაუშვა და დამარცხდა.

ჩემპიონთა ლიგა 1998/99. ფინალი
მანჩესტერი-ბაიერნი 2:1

შავი დღე “ბაიერნის” ყველა გულშემატკივრისთვის. მათი გუნდი ჩემპიონთა ლიგის ფინალის ბოლო წამებამდე მარიო ბასლერის გოლით უგებდა “წითელ ეშმაკებს”, მაგრამ სერ ალექს ფერგიუსონის სამწვრთნელო გენიამ ერთხელაც გამოანათა. დამატებულ პირველ წუთზე ტედი შერინგემმა შეაგდო, მერე კი თავი ოლე გუნარ სულშერმაც გამოიჩინა.

მუნდიალი 1954. ფინალი
გერმანია-უნგრეთი 3:2

უნგრეთის “დიდი გუნდი”, რომელიც მუნდიალის გამოკვეთილ ფავორიტად ითვლებოდა, ფინალურ შეხვედრაში 2:0-ს უგებდა დასავლეთ გერმანიის (გფრ) ნაკრებს. ანგარიში ზოლტან ციბორმა გახსნა, მეორე გოლი კი ფერენც პუშკაშმა შეაგდო. უნგრელებს ეგონათ, პლანეტის უმთავრესი საფეხბურთო ჯილდო ჯიბეში ჰქონდათ (მით უმეტეს, გერმანელებისთვის იმავე მუნდიალის ჯგუფურ ეტაპზე 8:3 ჰქონდათ მოგებული)...
...და სწორედ მაშინ ჩაირთო “გერმანული მანქანა”. მაქს მორლოკის გოლითა და ჰელმუტ რანის დუბლით გერმანელებმა უნგრელები შოკში ჩააგდეს.

ჩემპიონთა ლიგა 1993/94
ვერდერი-ანდერლ. 5:3

ალბერტის გოლითა და ბოფინს დუბლით ჩემპიონთა ლიგის ჯგუფური ეტაპის შეხვედრაში “ანდერლეხტი” გასვლაზე 3:0-ს უგებდა “ვერდერს”. ის, რაც შემდეგ მოხდა, ძალიან ბევრისთვის წარმოუდგენელი იყო - რუფერმა (2), ბრატსეტმა, ჰობშმა და ბოდემ მსოფლიო ფეხბურთის ისტორიაში ერთ-ერთი გამორჩეული “ქამბექი” დააფიქსირეს. სხვა საქმეა, რომ ამ მოგებამ “ვერდერს” ვერ უშველა და “ანდერლეხტთან” ერთად ის ჯგუფში დარჩა. პლეი - ოფში “მილანი” და “პორტო” გავიდნენ.

ესპანეთის თასი 1996/97. მეოთხედფინალი
ბარსელონა-ატლეტ. 5:4

პირველი ტაიმის შემდეგ “ბარსელონა” 0:3-ს აგებდა მისთვის მეტად პრინციპულ მოწინააღმდეგესთან. მეორე ტაიმში თამაშის სურათი მთლიანად შეიცვალა - “კიჭა” რონალდომ (ჰეთ-თრიკი), ლუიშ ფიგუმ და ხუან ანტონიო პიციმ ხაზი გადაუსვეს მილინკო პანტიჩის “პოკერს” და “ბარსამ” 5:4 მოიგო.

ევროპალიგა 2015/16
ლივერპული-დორტმ. 4:3

ჰენრიხ მხითარიანისა და პიერ-ემერიკ ობამეიანგის გოლებით “დორტმუნდი” ორი ბურთით დაწინაურდა. ამის შემდეგ “ლივერპულმა” მთელი ძალით შეუტია. დივოკ ორიგიმ, ფელიპე კოუტინიომ, მამადუ სახომ და დეიან ლოვრენმა 4 ბურთი შეყარეს დორტმუნდელთა კარში, რასაც ერთი გოლით მარკო როისმა უპასუხა.

ჩემპიონთა ლიგა 2003/04. მეოთხედფინალი
მონაკო-რეალი 3:1

“მონაკომ” პირველი მატჩი “სანტიაგო ბერნაბეუზე” 2:4 წააგო ფავორიტ “რეალთან” და საპასუხო მატჩსაც აგებდა მას შემდეგ, რაც რაულმა შეაგდო. მაგრამ მერე სამთავროელები გამოცოცხლდნენ. დუბლი მიითვალა ლუდოვიკ ჟიულიმ, ერთი გოლიც ექსრეალელი ფერნანდო მორიენტესის ანგარიშზეა.

ჩემპიონთა ლიგა 2004/05 ფინალი
მილანი-ლივერპული 3:3

დაუვიწყარი მატჩი, რომლის პერიპეტიებზეც დაწვრილებით აღარ შევჩერდებით. “მილანი” 3:0-ს იგებდა სტამბოლურ ფინალში, მაგრამ მეორე ტაიმის დასაწყისიდანვე “ლივერპული” ამოქმედდა. ლეგენდარული სტივენ ჯერარდის მეთაურობით რაფა ბენიტესის გუნდმა მართლაც შეუძლებელი შეძლო - ანგარიშიც გაათანაბრა და პენალტების სერიაშიც გაიმარჯვა.

ჩემპიონთა ლიგა 2016/17. მეოთხედფინალი
ბარსელონა-პსჟ 6:1

პირველი მატჩი “ბარსელონამ” პარიზში 4:0 წააგო და სასწაულის იმედზე იყო. არადა, ამ სასწაულისაც არავის სჯეროდა, მაგრამ... ის მაინც მოხდა. ლუის სუარესმა, ლიონელ მესიმ, მაშინ ჯერ კიდევ ბარსელონელმა ნეიმარმა (დუბლი) და ლუის ალბერტომ შეარხიეს პსჟ-ის კარის ბადე. ერთი გოლიც საკუთარ კარში ლეივინ კურზავამ შეაგდო. ედინსონ კავანის მიერ გატანილმა გოლმა, რომლის შემდეგ ანგარიში 3:1 გახდა და თითქოს ყველაფერი გადაწყდა, მაინც შეცვალა. არადა, ეს ანგარიში 88-ე წუთამდე ენთო ტაბლოზე. ამის მერე “ბარსამ” კიდევ სამჯერ შეარხია კევინ ტრაპის კარის ბადე.

ყოველდღიური სპორტული გაზეთი "ლელო"
978
მკითხველის კომენტარები / 0 /
მსგავსი ამბები
რუბრიკის სხვა სიახლეები
;