ტოჩინოშინის დედის, ნუნუ მარქარაშვილის მონათხრობი: გაჭირვებაში ვცხოვრობდით, 14 წლის ლევანი კაცებთან ერთად მთაში თიბავდა...

"ძალიან გაჭირვებული ცხოვრება გავიარეთ და ლევანი განსაკუთრებულად მებრძოლი ხასიათით გამოირჩეოდა. ოჯახზე ზრუნავდა და ბევრს შრომობდა ბაღში, ტყეში, შეშის მოსატანადაც კი დადიოდა... ჩემს მშობლებს ძროხები ჰყავდათ და 14 წლის ბავშვი მთაში ბალახს თიბავდა კაცებთან ერთად. რამდენიმე წელი ასე მოჰქონდა თივა, რომ არ გვეყიდა. თივის ფული არ გვქონდა..." - ლევან გორგოძის დედა - ნუნუ მარქარაშვილი ლევანის ბავშვობაზე და დღევანდელობაზე ვრცლად გვესაუბრა...

- როგორი ბუნების ბავშვი იყო ლევანი, ბიჭები ხომ ცელქები, მოუსვენრები არიან, რთული იყო მისი აღზრდა?

- სიმართლე, რომ გითხრათ არ იყო ძალიან რთული აღსაზრდელი ბავშვი. რასაც ვეუბნებოდი, ზედმიწევნით ზუსტად ასრულებდა ყველაფერს. ძალიან მოსიყვარულე და თბილი ბავშვი იყო. ოჯახის წევრების მიმართ ბავშვობიდანვე მზრუნველობას იჩენდა... ძალიან ცელქი არა, მაგრამ ღონიერი ბავშვი იყო და ეს ძალ-ღონე დადებითი მიზნებისკენ მივმართეთ.

- გაიხსენეთ, რა გზა გაიარა, სანამ ამ ყველაფერს მიაღწევდა, რა შრომა, რისი მოთმენა და რისი გადატანა უხდებოდა?

- ურთულესი გზა აქვს გავლილი. სპორტის ამ სახეობას ძალიან დიდი შრომა და ნებისყოფა ჭირდება. ამდენს ვიდრე მიაღწევდა, მანამდე ძალიან დიდი გზა გაიარა. ვარჯიში ბავშვობიდან დაიწყო, ჯერ კიდევ ძეგვში ცხოვრებისას. თან 90-იანი წლები იყო და კარგად მოგეხსენებათ, როგორი სიდუხჭირე იყო... იმდენად მონდოებული ბავშვი იყო, რომ სრულიად გადაუჭარბებლად გეტყვით, სპორტსმენად იყო დაბადებული. სოფელში თავდაუზოგავად ვარჯიშობდა... შემდეგ წამოიზარდა და გულახდილად გეტყვით, ჩემი დაჟინებული თხოვნით, სამედიცინო ტექნიკუმში ჩააბარა. მეც მედიცინის მუშაკი ვარ და ჩემი პროფესია იმ გაჭირვებულ პერიოდში ძალიან დამეხმარა ბავშვების გაზრდაში. ამიტომაც მსურდა, ლევანიც ექიმი გამხდარიყო...

ლევანი ტექნიკუმში რომ სწავლობდა, პარალელურად დინამოს სტადიონზე დადიოდა და ვარჯიშობდა სამბოში. სერიოზული წარმატებები ჰქონდა... ტრანსპორტი ჭირდა, მაშინ 14-15 წლის ბიჭები უფრო ბავშვურები იყვნენ და მეც დავყვებოდი ვარჯიშზე რომ მიდიოდა. მეშინოდა მისი მარტო გაშვება იმ არეულ წლებში. ხშირად იყო კურიოზული სიტუაციები, ბევრს ჩემი ძმა ეგონა, იმდენად მაღალი და დიდი იყო.

 მანანა გაბრიჩიძე

ინტერვიუ სრულად იხილეთ: https://www.mshoblebi.ge

5973
მკითხველის კომენტარები / 3 /
დათა
0
რაც რაიმე კარგი სიტყვაა, ყველაფერი თქვენს უდიდესს ოჯახს. მადლობა ყველაფრისთვის საამაყო ხალხო. ლევანს უდიდესი ბედნიერება ქვეყნისა და საკუთარი გამარჯვებებით,,,,,,,,,,,,,,,,,,,,
ვახტანგი
0
თქვენ გაიხარეთ და იდღეგრძელეთ, დიდება ქართველ დედებს....
მსგავსი ამბები
რუბრიკის სხვა სიახლეები
;