დევისის თასზე წილისყრა გაიმართა - მესი პიკეს საინვესტიციო კომპანიას შეურთდა

„ბარსელონას“ ფორვარდი ლიონელ მესი შეუერთდა თავის თანაგუნდელ ჟერარ პიკეს საინვესტიციო კომპანიას.

შესაბამისად, არგენტინელი გახდა დევისის თასის ახალი პროექტის თანამონაწილე. პიკე გახლავთ საინვესტიციო ჯგუფ Kosmos-ის დამფუძნებელი. ახლა მან განაცხადა, რომ მესი - მისი პარტნიორია.

„ლეო - Kosmos-ის პარტნიორი და ოჯახის წევრია. ისიც აღმერთებს ჩოგბურთს. უკვე 18 წელია ერთმანეთთან კავშირი გვაქვს და ყოველთვის ვუმხელ იდეებს. ამ პროექტში ისიც მონაწილეობს“, - მოჰყავს პიკეს სიტყვები Tennis365.com-ს.

ადრე გახდა ცნობილი, რომ Kosmos-მა 25 წლით მოაწერა ხელი დევისის თასის ჩატარებაზე კონტრაქტს. იგეგმება, რომ ხელშეკრულების მოქმედების პერიოდში, კომპანია ტურნირს სამ მილიარდ დოლარს დაახარჯავს.

ამასობაში, მადრიდში 2019 წლის დევისის თასის ფინალური ტურნირის წილისყრა გაიმართა. 18 ნაკრები ექვს ქვეჯგუფში გადანაწილდა:

A ჯგუფი: საფრანგეთი, სერბეთი, იაპონია;
B ჯგუფი: ხორვატია, ესპანეთი, რუსეთი;
C ჯგუფი: არგენტინა, გერმანია, ჩილე;
D ჯგუფი: ბელგია, ავსტრალია, კოლუმბია;
E ჯგუფი: ბრიტანეთი, ყაზახეთი, ჰოლანდია;
F ჯგუფი: აშშ, იტალია, კანადა.

პლეი ოფში გავლენ ჯგუფების გამარჯვებულები და მათ დაემატებათ მეორეადგილოსნებს შორის ორი საუკეთესო. რვა გუნდი ბრძოლას მეოთხედფინალიდან გააგრძელებს.

დევისის თასი ახალი ფორმატით ნოემბერში, მადრიდში გათამაშდება.

ყოველდღიური სპორტული გაზეთი "ლელო"
620
მკითხველის კომენტარები / 0 /
მსგავსი ამბები
რუბრიკის სხვა სიახლეები
;