'დეტროიტის' საიტმა 'ბოსტონს' 10 ქულა დააკლო... ზაზა ფაჩულიას გუნდმა გაიმარჯვა? [VIDEO]

ზაზა ფაჩულიას "დეტროიტს" ბოსტონში სტუმრობამდე ზედიზედ ოთხი მატჩი ჰქონდა მოგებული. "სელტიკსთანაც" ახლოს იყო გამარჯვებასთან...

დეტროიტელთა ოფიციალურ საიტზე რომ შეხვიდეთ, გაგეხარდებათ - მეხუთეც მოიგოო. 110:108 - "პისტონსის" სასარგებლოდ. თუმცა ეს ის შემთხვევაა, როცა შეცდომებისგან დაზღვეულნი არავინ ვართ - როგორც ჩანს, ფოტოგალერეის შექმნისას "ბოსტონს" ერთიანის ნაცვლად ნულიანი დაუწერეს და მივიღეთ 108. რეალურად მატჩი "სელტიკსმა" 118:110 მოიგო.

მიუხედავად იმისა, რომ მასპინძლებმა უხვად ქულები დააგროვეს, 20 ქულამდე ერთი კალათბურთელიც ვერ ავიდა. ყველაზე მეტი, 19 ტატუმს ჰქონდა. 

"დეტროიტში" კი შეტევა ძირითადად სამ კალათბურთელზეა აწყობილი: ბლეიქ გრიფინმა 32 ქულა ჩააგდო, ანდრე დრამონდმა 21 ქულა (17 მოხსნა), ხოლო რეჯი ჯექსონმა - 18. ზაზა ფაჩულიამ 6 წუთში 4 ქულა და 2 მოხსნა ჩაიწერა.

"პისტონსს" "მაიამისთან" ერთად 26 მოგება, 30 წაგება აქვს და აღმოსავლეთის კონფერენციაში მერვე-მეცხრე ადგილებს იყოფს.

ნაციონალურ საკალათბურთო ასოციაციაში საოლსტარე შესვენება გამოცხადდა. ზაზას გუნდი მომდევნო შეხვედრას 23 თებერვალს "ატლანტასთან" გამართავს.

1175
მკითხველის კომენტარები / 0 /
მსგავსი ამბები
რუბრიკის სხვა სიახლეები
;