დვალის გოლი, არშემდგარი დერბი და ჭანტურია სკამზე [VIDEO]

იტალია

სერია A. მოლოდინის მიუხედავად, "ემპოლის" განაცხადში ვერ მოხვდა ლევან მჭედლიძე, რომელმაც მცირე ტრავმის შემდეგ გუნდთან ერთად სრული დატვირთვით ივარჯიშა. მისმა თანაგუნდელებმა კი მედგარი წინააღმდეგობა გაუწიეს "იუვენტუსს", პირველი ტაიმის შემდეგ იგებდნენ (1:0) კიდეც, მაგრამ მეორე ნახევარში "ბებერმა ქალბატონმა" იძალა და კრიშტიანო რონალდოს დუბლით 2:1 გაიმარჯვა.

 

ესპანეთი

ლა ლიგა 2. გიორგი აბურჯანია 21-ე წუთიდან ჩაერთო "ლუგო"-"კადისის" მატჩში, როცა ტრავმირებული თანაგუნდელი შეცვალა. საბოლოოდ, აბურჯანიას "ლუგომ" საკუთარ მოედანზე 1:2 წააგო.

 

რუსეთი

პრემიერლიგა. "ურალისა" და "უფას" მატჩში (1:1) მასპინძელთა შორის ჯერ მხოლოდ თადარიგში გამოჩნდა გიორგი ჭანტურია, რომელიც მუხლის ჯვარედინი მყესების გაწყვეტის გამო დიდი ხანია, უქმობდა. რაც შეეხება "უფას" ქართველ ჯიმი ტაბიძეს, ის 53-ე წუთზე შეცვალეს.

ფრედ (2:2) დასრულდა "არსენალისა" და "ორენბურგის" მატჩიც. "მეთოფეთა" ქართველმა მცველმა გია გრიგალავამ სრულად ითამაშა.

 

ფინეთი

ვეიკაუსლიგა. ჩემპიონატის ბოლო ტურში "როვანიემიმ" 1:0 მოუგო "ილვესს" და მეორე ადგილზე გავიდა. ამ გუნდის ქართველი ნახევარმცველი გიორგი გოროზია კი 57-ე წუთზე შეცვალეს.

 

ესტონეთი

მეისტრილიიგა. ჩემპიონობისთვის მებრძოლმა "ფლორამ" ფინიშამდე ორი ტურით ადრე შინ 4:0 მოუგო "კურესაარეს". ზაქარია ბეგლარიშვილმა (90 წუთი) ამჯერად ვერ გაიტანა (ორი გოლი მეტოქე გუნდის ფეხბურთელებმა საკუთარ კარში გაიტანეს) და ბომბარდირთა დავაში 28 გოლით მეორე ადგილზე რჩება.

ამავე ტურში აუტსაიდერ "პიარნუ ვარპუსის" (0:5 დამარცხდა ტალინის "კალევთან") რიგებში 90 წუთი ითამაშა გეგი კეკუამ.

 

უნგრეთი

OTP ბანკ ლიგა. გიორგი ბერიძის "უიპეშტი" სტუმრად 0:1 დამარცხდა ერთ-ერთ ლიდერ მტკ-სთან. ქართველმა შემტევმა, რომელმაც წინა ტურში დუბლი შეასრულა და თავის გუნდს პირადად მოაგებინა, თავიდან ბოლომდე ითამაშა.

ბაჩანა არაბულის (90 წუთი) "პუშკაშ აკადემიამ" გასვლაზე 1:2 წააგო "დებრეცენმა".

 

ყაზახეთი

პრემიერლიგა. ტურის ერთ-ერთი სიურპრიზი იყო კახა ცხადაძის მიერ გაწვრთნილი "ორდაბასის" საშინაო ფრე (1:1) ბოლოადგილოსან "შახტიორთან" (ყარაღანდა).

ლევან კასრაძის "ჟეტისუ" შინ უგოლო ფრეს დასჯერდა "ატირაუსთან". ქართველმა მცველმა შეუცვლელად ითამაშა.

შოთა გრიგალაშვილისა და გიორგი ფოფხაძის "ყიზილჟარმა" სტუმრად 0:1 წააგო "აქტობესთან". გრიგალაშვილი (ცენტრალურ მცველად ითამაშა) 74-ე წუთზე შეცვალეს, ფოფხაძემ სრულად ითამაშა.

ჯაბა კანკავასა და ნიკა კვეკვესკირის "ტობოლი" კვირას ლიდერ "ასტანას" მასპინძლობს.

 

ხორვატია

I ნაციონალური ლიგა. "გორიცას" მარჯვენა მცველ გიორგი მჭედლიშვილს არ უთამაშია  (თადარიგში დარჩა) "ზაპრეშიჩთან" სტუმრად მოგებულ (3:1) მატჩში.

 

პოლონეთი

ექსტრაკლასა. გიორგი მერებაშვილის "პლოცკი" შინ "პიასტის" დაუზავდა - 1:1. მასპინძელთა ქართველი შემტევი 77-ე წუთზე შეცვალეს, ხოლო "პლოცკი" ბოლო დამატებულ წუთზე გადაურჩა წაგებას სტუმარი ფეხბურთელის მიერ გატანილი ავტოგოლის წყალობით.

ლუკა ზარანდიას "არკამ" სტუმრად 1:2 წააგო გდანსკის "ლეხიასთან". საქართველოს ნაკრების შემტევმა სრულად ითამაშა. "არკამ" მეორე გოლი 90-ე წუთზე გაუშვა.

"პოგონი"-"ლეხის" მატჩში გოლი გაიტანა საქართველოს ნაკრების მცველმა ლაშა დვალმა, რომელიც პირველი ტაიმის მიწურულს შორეულ ძელთან ჩაუსაფრდა კუთხურიდან მოწოდებულ ბურთს და ანგარიში 2:0 გახდა. მეორე ტაიმში დვალის გუნდმა კიდევ ერთი გოლი გაიტანა და საბოლოოდ, "პოგონმა" 3:0 გაიმარჯვა. დვალმა ბოლომდე ითამაშა.

 

უკრაინა

პრემიერლიგა. "შახტარმა" სტუმრად 3:0 მოუგო კიევის "არსენალს". გამარჯვებულთა შორის სრულად ითამაშა და ყვითელი ბარათი მიიღო დავით ხოჭოლავამ.

მეკარე ზაურ მახარაძე ("ზორია") სათადარიგო იყო "ოლექსანდრიასთან" საშინაო მატჩში - 0:0.

 

ავსტრია

ბუნდესლიგა. კვლავ ვერ მოიგო ოთარ კიტეშვილის "შტურმმა". ქართველი ნახევარმცველის გუნდი სტუმრად 0:2 დამარცხდა "ჰარტბერგთან". თავად კიტეიშვილი კი თავიდან ბოლომდე მოედანზე იყო და დამატებულ წუთებზე გაფრთხილებაც მიიღო.

 

პორტუგალია

პრიმეირა ლიგა. არ შედგა "ქართული დერბი" "რიუ ავესა" და "შავეშის" დაპირისპირებაში - მასპინძელთა მეკარე გიორგი მაკარიძე კვლავ ტრავმირებულია, სტუმრების შემტევი ავთო ებრალიძე კი თავიდან ბოლომდე მოედანზე იყო, მაგრამ ვერაფრით ააცილა მარცხი თავის გუნდს - 0:1.

628
მკითხველის კომენტარები / 0 /
მსგავსი ამბები
რუბრიკის სხვა სიახლეები