დიდი ათის ბოლო ტური. არმია დაგვემშვიდობა, ვეფხვები კი პლეი ოფში

საქართველოს ჩემპიონატის რეგულარული გათამაშება დასრულდა. უმაღლესი ლიგის დატოვება თბილისის „არმიას“ მოუწევს, რომელსაც ბოლნისის „ყოჩები“ ჩაანაცვლებს.

მეცხრე ადგილზე გასული პატარძეულის „ვეფხვები“ კი პლეი ოფში პირველი ლიგის მეორეადგილოსანს, კიკეთის „იუნკრებს“ შეხვდება. ჩემპიონობისთვის ბრძოლას ექვსი გუნდი განაგრძობს. ესენია: „ბათუმი“, რუსთავის „ხარები“, თბილისის „ლოკომოტივი“, ქუთაისის „აია“, მარნეულის „არმაზი“ და თბილისის „ლელო“.

ვეფხვები-ხარები 13:19
ვეფხვები: ლ - მამულაშვილი. 2ს, გ - სუხაშვილი.
სინბიბნი: მექვაბიშვილი, ბებიაშვილი
ხარები: 3ლ - მაჭარაშვილი, ნარიმანიძე, გოგიაშვილი. 2გ - ბუჯიაშვილი
სინბინი: აქუბარდია, ცუხიშვილი
მსაჯი: შოთა თევზაძე

პატარძეულის „ვეფხვებმა“ უმაღლეს ლიგაში დასარჩენად ნაბიჯი ჯერ კიდევ წინა ტურში გადადგა. ახლა, პატარძეულელებს ერთ-ერთი ლიდერიც უნდა დაემარცხებინათ, მაგრამ არ გამოვიდა. „ხარები“ მე-19 წუთისთვის 19:7 იგებდნენ. საგულისხმოა, რომ რუსთაველებმა მატჩის ბოლომდე მონაგარი ვეღარ გაზარდეს. თუმცა, ამით ვერც მასპინძლებმა იხეირეს. „ვეფხვები“ დასარჩენ პლეი ოფს ითამაშებს, „ხარებმა“ კი მეორე ადგილი დაიკავა და მედლებისთვის ბრძოლას შესარჩევი ფინალიდან განაგრძობს. ამ მატჩში „ხარები“ სტუმრად „ბათუმს“ დაუპირისპირდება.

ლოკომოტივი-აია 15:17
ლოკომოტივი: 2ლ - არაბული (2), ს, გ - კავთიძე.
სინბინი: კაპანაძე, გორგასლიძე.
აია: 2ლ - საჯარიმო, ბაბუნაშვილი. ს, გ - ბაბუნაშვილი
სინბინი: ზოიძე, მოდებაძე
მსაჯი: თორნიკე გვირჯიშვილი

მეორე ადგილისთვის „ლოკომოტივიც“ იბრძოდა, მაგრამ შინ წააგო პლეი ოფში მოხვედრისთვის მებრძოლ ქუთაისის „აიასთან“ და მესამე ადგილს დასჯერდა. არადა, პირველი ტაიმი რკინიგზელებმა 15:7 მოიგეს. მეორე ნახევარში მათ ქულების აღება ვეღარ შეძლეს. „აიამ“ ამით ისარგებლა და მატჩი სათავისოდ დაასრულა. ორივე გუნდი პლეი ოფიდან განაგრძობს ბრძოლას.

არმია-ჯიქი 19:17
არმია: ლ - გორგასლიძე. 4ს, გ - კობახიძე
სინბინი: ქარუხნიშვილი
ჯიქი: 2ლ - შენგელია, მჭედლიძე. 2გ, ს - დ.კიკნაძე.
სინბინი: თ.კიკნაძე, დათუნაშვილი
მსაჯი: საბა აბულაშვილი

„არმიას“ გორის „ჯიქთან“ საშინაო გამარჯვებამ ვეღარ უშველა. „ჯიქი“ კი ამ მარცხის გამო პლეი ოფის მიღმა დარჩა. საგულისხმოა, რომ გორელები 71-ე წუთამდე ანგარიშში მუდამ წინ იყვნენ. სწორედ ამ დროს „არმია“ ბახვა კობახიძის საჯარიმოთი დაწინაურდა და ანგარიში 19:17 გახდა. „ჯიქის“ განკარგულებაში კიდევ ცხრა წუთი იყო, მაგრამ გორელებმა მატჩი ვეღარ იხსნეს.

არმაზი-ბათუმი 59:8
არმაზი: 9ლ - წიკლაური, ჯიმშელეიშვილი (2), დვალიშვილი, გიგაური, მინაშვილი, ჩადუნელი (2), სოსელია. 7გ - ჯინჭველაშვილი
ბათუმი: ლ - ბერიძე. ს - ჯაბნიძე
მსაჯი: სულხან ჩიხლაძე

„არმაზს“ გამარჯვება ჰაერივით სჭირდებოდა. წინააღმდეგ შემთხვევაში პლეი ოფის მიღმა დარჩენის საფრთხე დიდი იყო. „ბათუმისთვის“ მატჩს არანაირი პრაქტიკული მნიშვნელობა არ ჰქონდა. ამიტომ, გუნდის მწვრთნელებმა საქმეში სათადარიგო მოთამაშეების ხილვა გადაწყვიტეს. გამარჯვებას „მოწყურებულმა“ არმაზმა მეტოქეს ცხრა ლელო გაუტანა და პლეი ოფში ქუთაისის „აიას“ სტუმრად დაუპირსპირდება.

აკადემია-ლელო 22:20
აკადემია: 3ლ - საჯარიმო (2), მექერიშვილი. ა - სბ. ილურიძე.
სინბინი: ჩადუნელი
ლელო: ლ - მამამთავრიშვილი. 5ს - კვირიკაშვილი.
სინბინი: ლაზვიაშვილი, დუგლაძე, ბუბუტეიშვილი.
მსაჯი: ნიკა ამაშუკელი

თბილისის „აკადემია“ გავარდნას გადაურჩა. ბოლო ტურში „ლელოს“ დამარცხებით აკადემიელებმა უძლიერესთა შორის ადგილის შენარჩუნება შეძლეს. მართალია, პირველი ტაიმი „აკადემიამ“ მოიგო - 10:3, მაგრამ მეორეში „ლელომ“ თამაში დაალაგა და ანგარიშში დაწინაურდა. ბოლო წუთამდე, აკადემიელები 17:20 აგებდნენ. თუმცა, შეცვლაზე შესულმა ბურჯმა ნოდარ მექერიშვილმა გამარჯვების ლელო მიითვალა და „აკადემია“ უმაღლეს ლიგაში დატოვა. „პლეი ოფში“ გავიდა „ლელოც“, რომელიც გასავარდნ ფინალში მოსახვედრად თბილისის „ლოკომოტივს“ დაუპირისპირდება.

თ მ ფ წ ბ ქ(ს)
1. ბათუმი 18 15 0 3 +139 66(6)
2. ხარები 18 13 1 4 +73 60(6)
3. ლოკომოტივი 18 11 0 7 +135 55(11)
4. აია 18 9 1 8 -1 42(4)
5. არმაზი 18 8 1 9 +77 42(8)
6. ლელო 18 8 0 10 -40 37(5)
7. ჯიქი 18 6 1 11 -18 36(10)
8. აკადემია 18 6 2 10 -138 31(3)
9. ვეფხვები 18 4 2 12 -94 30(10)
10. არმია 18 6 0 12 -133 28(4)

პლეი ოფი

13 აპრილი
ლოკომოტივი-ლელო 16:00

14 აპრილი
აია-არმაზი 16:00

ყოველდღიური სპორტული გაზეთი "ლელო"
647
მკითხველის კომენტარები / 0 /
მსგავსი ამბები
რუბრიკის სხვა სიახლეები
;