დიდი 10. VII ტური: ბევრი ლელო და კარგი სანახაობა

* VII ტური საკმაოდ უხვლელოიანი გამოდგა - ხუთ მატჩში 31 ლელო შესანიშნავი შედეგია. მატჩში საშუალოდ 6,2 ლელო.

* მირიან მოდებაძემ (აია) 5 ლელო გაიტანა, რაც ამ სეზონის რეკორდია.

* "აკადემიამ" 7 წაგებულ მატჩში 6 ბონუს-ქულა აიღო.

* კლუბებს ეროვნულ ნაკრებში მიწვეული მორაგბეები აკლდათ.

ლოკომოტივი-არმაზი 45:25
ლოკომოტივი (15-9): ჩიღვინიძე, გოგოლაშვილი, ნიკოლავა (ჩახვაძე 4), გაგოშვილი, შკინინი, კავთიძე, გედახური (ხარაზიშვილი 79); (1-8): ცუცქირიძე, ხიდეშელი (წივწივაძე 78), კაკაურიძე (ქართველიშვილი 4, გოგიჩაშვილი 57), კოპაძე (ტურაშვილი 22), დარასელია (მაისურაძე 51), ფოფხაძე, გასვიანი, ამირანაშვილი.
7ლ: ჩახვაძე (2), ამირანაშვილი, ხიდეშელი (2), შკინინი, ფოფხაძე; 5გ: კავთიძე.
სინბინი: გაგოშვილი
არმაზი (15-9): დვალიშვილი, წიქარიშვილი, წიკლაური, კაიფაჯიანი, ფრუიძე, ხურცილავა (ჩანადირი 70), მამუჩარაშვილი; (1-8): ჯიბლაძე (სოსელია 35), ხუროშვილი, გაგნიძე, ჯიმშელეიშვილი, ბარბაქაძე (ყველაიძე 66), გუგეშაშვილი, მინაშვილი, სპანდერაშვილი
3ლ: ხუროშვილი, მინაშვილი (2); 2ს, 2გ: ფრუიძე.
სინბინი: გუგეშაშვილი
მსაჯი: თორნიკე გვირჯიშვილი

სატურნირო ცხრილის მეზობლების დაპირისპირებაში ბრძოლა მხოლოდ პირველ ტაიმში შედგა. ამას, ცხადია, თავისი მიზეზებიც ჰქონდა. დავიწყოთ იმით, რომ საქართველოს ეროვნული ნაკრები სამდღიან შეკრებაზე საფრანგეთში გაემგზავრა. მილტონ ჰეიგმა "არმზიდან" მგეზავი რეზო ჭეიშვილი და გარემარბი გიორგი კვესელიაძე იხმო.

ტრავმირებულია არმაზელთა შუამარბი ბადრი ლიპარტელიანი, რომელიც ასევე ნაკრების კანდიდატია. ამის გარდა, მარნეულის გუნდს ტრავმის გამო სხვა ბევრი მოთამაშეც აკლდა და სწორედ ამიტომ იყო, სათადარიგოთა შორის მხოლოდ სამი მორაგბე რომ ჰყავდა გამწესებული. ასეთი მოკლე სკამით კი, რკინიგზელთა ძლევა ძალზე ძნელია.

თავის მხრივ, "ლოკომოტივმაც" ორი მორაგბე, ბექა წიკლაური და ჯაბა ბრეგვაძე მიავლინა ეროვნულ გუნდში. ტრავმირებულია და დიდი ხანია არ თამაშობს კიდევ ერთი სანაკრებო კანდიდატი გიორგი აფციაური.

პირველ ტაიმში თანაბარი ბრძოლა გაიმართა. მეტიც, "არმაზი" ოდნავ სჯობდა კიდეც მეტოქეს. მარნეულელები ბევრს მოძრაობდნენ, რაკსა და მოლში სწორად ირჯებოდნენ და მეტოქეს ბევრ პრობლემას უქმნიდნენ.

ანგარიშიც არმაზელებმა ძალიან სწრაფად, პირველივე შეტევისას, მატჩის მეორე წუთზე გახსნეს. მრავალფაზიანი შეტევა ლელოთი კარის ძელთან ახლოს შერკინების კვაჭმა გოგა ხუროშვილმა დაასრულა. გარდასახვა გარემარბმა ბექა ფრუიძემ დაარტყა - 7:0.

"ლოკომოტივმა" პირველ ტაიმში მეტოქეს, ფაქტობრივად, ორჯერ შეუტია და ორივეჯერ ლელოს გამორჩა, რომელთაგან ვახტანგ კავთიძემ ვერც ერთი გარდასახა. სამაგიეროდ, კარში ზუსტად ურტყა არმაზელმა ფრუიძემ და მარნეულელებმა პირველი ტაიმი სამი ქულის სხვაობით 13:10 მოიგეს.
შესვენების შემდეგ უპირატესობა მთლიანად "ლოკომოტოვმა" იგდო ხელთ.

რკინიგზელები, ფაქტობრივად, შეცვლების გარეშე დარჩენილ მეტოქეს შერკინებაშიც ჯაბნიდნენ და უკანა ხაზიც სწრაფად, ეფექტურად აათამაშეს. თუმცა, პირველი ლელო მაინც არმაზელებმა მიითვალეს. ძალიან კარგი და სანახაობრივად ლამაზი კომბინაცია მარჯვენა ფრთაზე ლელოთი ოთარ მინაშვილმა დაასრულა - 18:13. ეს 50-ე წუთზე მოხდა.

ამის მერე მოედანზე რკინიგზელები გაბატონდნენ და მეტოქეს ხუთი ლელო გაუტანეს. კავთიძემ მიზანი გაასწორა და ხუთივე გარდასახა. ორ-ორი ლელო მიითვალეს შეცვლაზე შესულმა გიორგი ჩახვაძემ და შერკინების კვაჭმა დავით ხიდეშელმა, რომელიც გუნდში ერთ-ერთი საუკეთესო იყო.

მეორე ტაიმში მისმა გარჯამ რაკსა და მეტოქესთან ერთი-ერთზე ბრძოლაში რკინიგზელებს უპირატესობა მოაპოვებინა. ერთი ლელო ვეტერანმა გიორგი შკინინმაც გაიტანა, რომლის ყველა შეხება ბურთთან მეტოქეს ხიფათს უქადდა.

"არმაზმა" მეტოქის ხუთ ლელოს კიდევ ერთით უპასუხა და საბოლოოდ 25:45 დამარცხდა.

აია-ბაგრატი 67:5
აია: 10ლ - მოდებაძე (5), აბჟანდაძე (2), აბრამიძე, მაჩალაძე, არეშიძე; 7გ - ბაბუნაშვილი, აბჟანდაძე (6); ს - ბაბუნაშვილი.
ბაგრატი: ლ - ბალანჩივაძე.
სინბინი: საკანდელიძე, კენჭაძე, კვერნაძე
მსაჯი: ნიკა ამაშუკელი

როგორც მოსალოდნელი იყო, დერბიში "აიამ" იყოჩაღა და შვიდი თამაშიდან მეშვიდე გამარჯვება მოიპოვა. ამ შეხვედრაში საქართველოს ახალგაზრდული ნაკრების წევრებმა მირიან მოდებაძემ და თედო აბჟანდაძემ იყოჩაღეს. მოდებაძემ, რომელიც ეროვნულ ნაკრებშიც მიიწვიეს, ხუთი ლელო მიითვალა, რაც დღესდღეობით ერთ მატჩში გატანილი ლელოების რაოდენობით რეკორდული მაჩვენებელია.

აბჟანდაძის ანგარიშზე ორი ლელო და ექვსი გარდასახვაა. შესანიშნავად გაისარჯა ასევე შუამარბი ზურაბ ძნელაძე, რომელიც გუნდში ერთ-ერთი საუკეთესო იყო.

აკადემია-ჯიქი 18:19
აკადემია: 6ს - მათიაშვილი
სინბინი: ლომაური
ჯიქი: 3ლ - ნინიძე, მჭედლიშვილი, ჭყოიძე. 2გ - ნინიძე
მსაჯი: საბა აბულაშვილი


ქვეყნის ჩემპიონმა გორის "ჯიქმა" სტუმრად თბილისში მძიმე გამარჯვებას მიაღწია "აკადემიასთან". მასპინძლებმა მეტოქის ლელოს ვერაფერი დააკლეს, მაგრამ გუნდის ლიდერმა სოსო მათიაშვილმა ექვსი საჯარიმო გაიტანა.

"ჯიქმა" პირიქით, სამი ლელო მიითვალა და კარში დარტყმებში არ უმართლებდა. თუმცა, მინიმალური სხვაობით მოსაგებად ესეც საკმარისი აღმოჩნდა. "აკადემიამ" მეექვსე საპრემიო ქულა აიღო.

არმია-ხარები 16:28
არმია: 2ლ - მასხარაშვილი, ჭავჭავაძე; 2ს - მასხარაშვილი
ხარები: 3ლ - ბებიაშვილი, ნათელაშვილი, ბერძული; 3ს, 2გ - ხუციშვილი.
მსაჯი: სულხან ჩიხლაძე

ზედიზედ ორი მარცხის შემდეგ მიმდინარე ჩემპიონატში მეხუთე გამარჯვება მოიპოვა რუსთავის "ხარებმა". რუსთაველები მეტოქეზე უკეთ თამაშის დასაწყისიდანვე გამოიყურებოდნენ და ანგარიშშიც წინ იყვნენ, თუმცა არმიელთა სასახელოდ უნდა ითქვას, რომ 59-ე წუთზე მათ ანგარიშის გათანაბრება შეძლეს - 16:16. სამაგიეროდ, დასკვნითი 20 წუთი "ხარებმა" უკეთესად ჩაატარა და დამსახურებულად გაიმარჯვა.

ლელო-ბათუმი 28:25
ლელო: ლ - მამუკაშვილი, 6ს, გ - ყიასაშვილი; ა - ბარკალაია.
სინბინი: სვიმონიშვილი
ბათუმი: 3ლ - ქოიავა, საჯარიმო (2); 2ს - კობახიძე.
სინბინი: ტუჩაშვილი, მამრიკიშვილი
მსაჯი: შოთა თევზაძე.

ჩემპიონატის სავარაუდო ფავორიტების მატჩი დაძაბულ და დრამატულ ბრძოლაში წარიმართა. გუნდებს ეროვნულ ნაკრებში მივლენილი ლიდერები აკლდათ.

"ლელომ" მერაბ კვირიკაშვილი და ალექსანდრე თოდუა, ხოლო ბათუმელებმა ლაშა ხმალაძე და გიორგი თხილაიშვილი მოისაკლისეს. მიუხედავად ამისა, თამაში მაინც შესანიშნავი გამოდგა. ლელოელებმა ანგარიშის გათანაბრება მატჩის 76-ე წუთზე შეძლეს - 25:25. ბოლო წუთზე კი, ვეტერანმა ოთარ ბარკალაიამ არეკნით გამარჯვება მოუტანა გუნდს.

VIII ტური
3 ნოემბერი
არმია-აია

4 ნოემბერი
ჯიქი-ლელო
ბაგრატი-ლოკომოტივი

5 ნოემბერი
არმაზი-აკადემია
ხარები-ბათუმი

ყოველდღიური სპორტული გაზეთი "ლელო"
464
მკითხველის კომენტარები / 0 /
მსგავსი ამბები
რუბრიკის სხვა სიახლეები