დიდი ათი. ბოლო ტურის წინ: ყველაფერი ახლა წყდება... პირველი ადგილის გარდა

საქართველოს ჩემპიონატის ბოლო ტურის წინ პლეი ოფში თამაშის უფლება სამ გუნდს აქვს განაღდებული. თუმცა, ორი მათგანი გაცხარებით იბრძვის მეორე ადგილის დასაკავებლად, რადგან პირველის მფლობელი უკვე ცნობილია - „ბათუმი“. არანაკლებ დაძაბული ბრძოლა გველის პლეი ოფში მოხვედრის მსურველებს შორისაც. ასევე დაძაბული მდგომარეობაა სატურნირო ცხრილის ფსკერზე...

გათამაშების ლიდერი „ბათუმი“ სტუმრად ხვდება მარნეულის „არმაზს“. შავიზღვისპირელებისთვის ამ მატჩს არანაირი პრაქტიკული დატვირთვა არ ახლავს. მათ, როგორც უკვე ვთქვით, პირველი ადგილი დაბევებული აქვთ და პლეი ოფში უპირატესი მდგომარეობით ისარგებლებენ. აი, „არმაზს“ კი, რომელიც 37 ქულით მე-5 ადგილზეა, აუცილებლად გამარჯვება სჭირდება, რათა პლეი ოფში გააღწიოს.

ბევრად უფრო საინტერესო და დაძაბული შეიძლება გამოდგეს თბილისის „ლოკომოტივის“ საშინაო მატჩი ქუთაისის „აიასთან“. ტრადიციული მეტოქეების დაპირისპირებას სხვა სატურნირო მნიშვნელობაც ენიჭება - რკინიგზელები მეორე ადგილისთვის იბრძვიან, რაც მათ სხვა მეტოქებთან შედარებით უპირატეს მდგომარეობაში ჩააყენებს პლეი ოფში. „აიას“ მომდევნო ეტაპზე გასვლა კი სათუოა. ქუთათურებმა აუცილებლად უნდა მოიგონ, რათა მედლებისთვის ბრძოლა განაგრძონ.

მეორე ადგილისთვის იბრძვის რუსთავის „ხარებიც“. ეს გუნდი შინ ეთამაშება უმაღლესი ლიგის დებიუტანტ პატარძეულის „ვეფხვებს“, რომელმაც წინა ტურში ქუთაისში გამარჯვებით, უმაღლეს ლიგაში დასარჩენად წინ დიდი ნაბიჯი გადადგა. თუმცა, თუ ბოლოდან მეორე ადგილი დაიკავა, პლეი ოფში პირველლიგელ კიკეთის „იუნკრებთან“ მოუწევს უძლიერესთა შორის ადგილის დამკვიდრებისთვის ბრძოლა.

ყველაზე რთულ მდგომარეობაში თბილისის „არმიაა“, რომელიც სატურნირო ცხრილში ბოლო ადგილზეა. არმიელების მეტოქე გორის „ჯიქია“. მიუხედავად იმისა, რომ არმიელები შინ თამაშობენ, გორელებთან წარმატებით თამაში ძალიან ძნელი იქნება. მით უფრო, რომ „ჯიქი“ პლეი ოფში მოსახვედრად იბრძვის და ამ მატჩში გამარჯვება მისთვის ბოლო შანსია.

ასევე რთულ ვითარებაშია ბოლოსწინა ადგილზე მყოფი თბილისის „აკადემია“. მისი მეტოქე თბილისის „ლელოა“, რომელიც ასევე პლეი ოფში მოსახვედრად იბრძვის. ორივე გუნდს გამარჯვება სჭირდება და, სავარაუდოდ, როგორც ყოველთვის, მათ შორის დაპირისპირება უკიდურესად მწვავე გამოვა.

თ მ ფ წ ბ ქ(ს)
1. ბათუმი 17 15 0 2 +190 66(6)
2. ხარები 17 12 1 4 +67 56(6)
3. ლოკომოტივი 17 11 0 6 +137 54(10)
4. აია 17 8 1 8 -3 38(4)
5. არმაზი 17 7 1 9 +26 37(7)
6. ლელო 17 8 0 9 -38 36(4)
7. ჯიქი 17 6 1 10 -16 35(9)
8. ვეფხვები 17 4 2 11 -88 29(9)
9. აკადემია 17 5 2 10 -140 27(3)
10. არმია 17 5 0 12 -135 24(4)

ყოველდღიური სპორტული გაზეთი "ლელო"
771
მკითხველის კომენტარები / 0 /
მსგავსი ამბები
რუბრიკის სხვა სიახლეები
;