დიდი ათი. დრამა დერბიში - 'ლოკომოტივი' ფარზე მოგებული მიდის

* "არმიამ" გაიმარჯვა და ახლა დიდ ათში მოუგებელი აღარავინაა.
* ბექა წიკლაურმა "ლოკომოტივს" ბოლო წამებზე გატანილი საჯარიმოთი მოაგებინა.
* ანზორ სიჭინავას დუბლი და ჩემპიონის ზედიზედ მე-3 მარცხი.

აუტსაიდერმა თბილისის "არმიამ" პირველი გამარჯვება მიითვალა. არმიელებმა სენსაცია გამოაცხვეს და სტუმრად სძლიეს ლიდერთა მარაქაში გარეულსა და აქამდე შესანიშნავად მოთამაშე რუსთავის "ხარებს". შედეგად, ექვსი ტურის შემდეგ ბრძოლა, როგორც სატურნირო ცხრილის სათავეში, ისე მის მეორე ნაწილშიც, უკიდურესად დაიძაბა.

ლელო-ლოკომოტივი 20:21

ლელო: 2ლ - ჭყოიძე, ყიასაშვილი. 2ს - კვირიკაშილი. 2გ - ყიასაშვილი, კვირიკაშვილი
სინბინი: დუგლაძე
ლოკომოტივი: 2ლ - გოგოლაშვილი, ტურაშვილი. 2ს, ა, გ - წიკლაური.
სინბინი: გასვიანი, გოგოლაშვილი, ბეგაძე, მაისურაძე
მსაჯი: თორნიკე გვირჯიშვილი

"ლოკომოტივს" მომდევნო უქმეებზე ევროთასებზე, "კონტინენტის ფარის" გათამაშებაში უწევს ასპარეზობა. ამიტომ ამ შეხვედრის წინ უკეთეს გამომცდელს ვერც ინატრებდა. თამაში, როგორც მოსალოდნელი იყო, დაძაბული გამოდგა, რამაც სანახაობრივი მხარე საგრძნობლად დააზარალა. გუნდები ხშირად უშვებდნენ შეცდომებს, რაც თამაშის საერთო სურათს უხეიროდ წარმოაჩენდა.

მატჩის ბოლო წუთები დრამატულად განვითარდა. "ლელომ", რომელიც 13:18-ს აგებდა, თამაშის დასრულებამდე ერთი წუთით ადრე ანგარიშში დაწინაურება შეძლო - 20:18. ამ დროისთვის რკინიგზელები თორმეტნი იყვნენ და 14 ლელოელის წინააღმდეგ თავგანწირვით იბრძოდნენ. ბოლოს კი 13 კაცით 14-ის წინააღმდეგ მოთამაშე რკინიგზელებმა საჯარიმოს დარტყმის უფლება მოიპოვეს და ბექა წიკლაურმა გუნდს გამარჯვება მოუტანა - 21:20.

აია-ბათუმი 10:34

აია: 2ლ - რატიაშვილი, აბრამიძე.
ბათუმი: 5ლ - ხუციშვილი, ფუტკარაძე, სიჭინავა (2), თედორაძე. 3გ, ს - ნინიძე.
სინბინი: სიჭინავა
მსაჯი: ნიკა ამაშუკელი

"ბათუმმა" გასვლით მატჩში ქუთაისის "აიას" ყველა კომპონენტში აჯობა და დამაჯერებლად გაიმარჯვა. აღსანიშნავია, რომ თედო აბჟანდაძის არყოფნაში კარში ზუსტად ვერავინ დაარტყა და აიელები ორი გატანილი ლელოს ამარა დარჩნენ. "ბათუმმა" საპასუხოდ ხუთი ლელო მიითვალა და ერთ საპრემიო ქულასაც გამოჰკრა ხელი. ზღვისპირელთა გარემარბმა ანზორ სიჭინავამ ისევ დუბლი გაახერხა. "აიამ" კი ზედიზედ მესამედ წააგო.

ხარები-არმია 29:31

ხარები: 4ლ - მელიქიშვილი, ქავთარაძე (2), ბურჭულაძე. 3გ, ს - ბუჯიაშვილი.
სინბინი: ქვლივიძე, კოშაძე, ციცქიშვილი
არმია: 3ლ - მესხი, კობახიძე, მასხარაშვილი. 4ს, 2გ - კობახიძე.
სინბინი: ბარბაქაძე, გელაშვილი, ნიკოლავა
მსაჯი: ონისე მოგელაშვილი

თბილისის "არმიამ" ტურის სენსაცია გამოაცხო. რუსთავში მის გამარჯვებას ნამდვილად არავინ ელოდა. მით უფრო, რომ "ხარებს" ტრავმის მოშუშების შემდეგ ერთ-ერთი წამყვანი მორაგბე, საქართველოს ნაკრების გარემარბი გიორგი კოშაძე დაუბრუნდა.

არმიელები 45 წუთის განმავლობაში დომინირებდნენ და ანგარიშში 22:3 დაწინაურდნენ. რუსთაველებმა ამის მერეღა გამოიღეს ხელი და 68-ე წუთისთვის ანგარიშში სხვაობის ექვს ქულამდე შემცირება შეძლეს - 22:28. 12 წუთი მატჩის გადარჩენისთვის სრულიად საკმარისი დროა. თუმცა არმიელებმა ერთი საჯარიმო კიდევ გაიტანეს, რაზეც "ხარებმა" ბოლო წუთზე ლელოთი უპასუხა, მაგრამ მასპინძლებისთვის ეს გამარჯვებისთვის საკმარისი არ აღმოჩნდა. "არმიამ" პირველად

მოიგო - 31:29.

ჯიქი-ვეფხვები 14:13
ჯიქი: ლ - წიკლაური. 3ს - ფურცხვანიძე (2), კიკნაძე.
ვეფხვები: ლ - ბროძელი. 2ს, გ - გურგენიძე.
სინბინი: გომიაშვილი
მსაჯი: სულხან ჩიხლაძე

პატარძეულის "ვეფხვები" მებრძოლ, გამართულ გუნდად ჩამოყალიბდა, რაც სტუმრად, გორის "ჯიქთან" გამართულმა შეხვედრამ კიდევ ერთხელ დაადასტურა. გათამაშების დებიუტანტი მინიმალური სხვაობით დამარცხდა და ერთი საპრემიო ქულაც მიითვალა. ცოტა მეტი გამოცდილება რომ ჰქონოდა, "ვეფხვები" ამ მატჩს, სავარაუდოდ, მოიგებდა კიდეც. თუმცა ამჯერად არ გაუმართლა. "ჯიქმა" მნიშვნელოვანი გამარჯვება მოიპოვა და საპლეიოფო ექვსეულს მიუახლოვდა.

არმაზი-აკადემია 36:12

არმაზი: 2ლ - მარჯანიშვილი, კვესელაძე, გიგაური, ხუროშვილი, საჯარიმო. 3გ, ს - ჯინჭველაშვილი.
სინბინი: ცინცაძე, კურატიშვილი
აკადემია: 2ლ - ლომაური, ბერაია. გ - მოძღვრიშვილი
სინბინი: ჩადუნელი
მსაჯი: საბა აბულაშვილი

მოულოდნელობების გარეშე განვითარდა მოვლენები მარნეულის "არმაზისა" და თბილისის "აკადემიას" შორის დაპირისპირებაში. არმაზელებმა ხუთი ლელოს გატანა შეძლეს, რაზეც მეტოქემ მხოლოდ ორით უპასუხა. ეს კი დამატებით კიდევ ერთი საპრემიო ქულისთვის საკმარისი აღმოჩნდა. ამ მოგების შემდეგ "არმაზმა" მესამე ადგილზე გადაინაცვლა.

თ მ ფ წ ბ ქ(ს)
1. ბათუმი 6 5 0 1 +98 24(4)
2. ლოკომოტივი 6 5 0 1 +70 23(3)
3. არმაზი 6 4 0 2 +102 21(5)
4. ხარები 6 4 0 2 +39 19(3)
5. ლელო 6 4 0 2 +4 17(1)
6. აია 6 3 0 3 +11 14(2)
7. ჯიქი 6 2 0 4 -37 11(3)
8. ვეფხვები 6 1 0 5 -90 6(2)
9. აკადემია 6 1 0 5 -102 6(2)
10. არმია 6 1 0 5 -95 5(1)

VII ტური

26 ოქტომბერი
ბათუმი-ლოკომოტივი

27 ოქტომბერი
აკადემია-ვეფხვები
ჯიქი-აია

28 ოქტომბერი
ლელო-არმია
ხარები-არმაზი

ყოველდღიური სპორტული გაზეთი "ლელო"
205
მკითხველის კომენტარები / 0 /
მსგავსი ამბები
რუბრიკის სხვა სიახლეები