დიდი ათი. ლელოების წვიმა სეზონის სტარტზე

* 44 ლელო პირველ ტურში
* 12 სინბინი
* სანდრო სვანიძის ჰეთ თრიკი
* მასპინძელმა მხოლოდ
ერთ მატჩში იმარჯვა

საქართველოს ჩემპიონატის პირველი ტური უხვლელოიანი გამოდგა. ხუთ მატჩში გუნდებმა 44 ლელო გაიტანეს. საშუალოდ მატჩში 8,8 ლელო. საკმარისზე მეტი იყო ყვითელი ბარათიც. მსაჯებმა 10 წუთით მოედნიდან 12 მორაგბე გააძევეს. საგულისხმოა, რომ საშინაო მატჩი მხოლოდ ერთმა, მარნეულის "არმაზმა" მოიგო.

არმია-აია 14:57

არმია: 2ლ - მასხარაშვილი. 2გ - კობახიძე
სინბინი: მასხარაშვილი, გუგეშაშვილი
აია: 8ლ - სალდაძე, მანაგაძე (2), აბრამიძე (2), წიკლაური, წივწივაძე, ერემეიშვილი. 7გ, ს - აბჟანდაძე.
სინბინი: ლომიძე, რატიაშვილი, დანგაძე
მსაჯი: გია ამირხანაშვილი

პირველი ტურის ყველაზე დიდი მოულოდნელობა, ალბათ, მაინც თბილისის "არმიას" დიდი ანგარიშით მარცხი იყო საკუთარ მოედანზე. "აიამ" პირველი ტაიმი ბრწყინვალედ წარმართა. ქუთაისელების თითქმის ყველა შეტევა შედეგიანად დასრულდა და შესვენებამდე 50 ქულას მოუყარა თავი. მაშინ, როდესაც მეტოქეს ქულების აღების შანსიც არ დაუტოვა.

არმიელებმა ორი ლელო მხოლოდ მეორე ტაიმში მიითვალეს. "აია", თითქოს, მოეშვა. ისე აგრესიული და სწრაფი აღარ იყო, როგორც პირველ ტაიმში. გუნდს ერთი სერიოზული ნაკლი აქვს. შერკინება სტატიკურ მდგომარეობაში სუსტია. ამის კომპენსირებას მორკინალები დინამიკაში აგრესიული თამაშით ახერხებენ. თანაც, თითქმის უნაკლოა ქუთათურთა უკანა ხაზი, რომელსაც შესანიშნავად გეზავს თედო აბჟანდაძე.

აღსანიშნავია ასევე ყვითელი ბარათების სიმრავლეც. მატჩის არბიტრმა სინბინში სულ ხუთი მორაგბე გაუშვა. აქედან სამი ქუთაისელი იყო.

არმაზი-ჯიქი 38:15

არმაზი: 5ლ - სვანიძე (3), კვესელაძე, ხუროშვილი. 5გ, ს - ჯინჭველაშვილი
ჯიქი: 3ლ - თ. კიკნაძე, სუხაშვილი, კალანდაძე
მსაჯი: სულხან ჩიხლაძე

მარნეულის "არმაზი" ერთადერთი გუნდია, რომელმაც პირველ ტურში შინ მოიგო. არმაზელებმა საკმაოდ კარგ შემადგენლობას მოუყარეს თავი, რაც მათი თამაშის ხარისხზეც საგრძნობლად აისახა.

გორის "ჯიქთან" მატჩში ჰეთ თრიკი შეასრულა ფულბეკმა სანდრო სვანიძემ. გორელებმა მეტოქის ხუთ ლელოს სამით უპასუხეს, თუმცა მატჩის გადარჩენის შანსი მხოლოდ მე-60 წუთამდე ჰქონდათ. ამის შემდეგ მოედანზე მთლიანად "არმაზი" დომინირებდა და დამსახურებულადაც გაიმარჯვა.

ხარები-ლელო 26:29

ხარები: 4ლ - აქუბარდია, ნათელაშვილი, ბუჯიაშვილი, საჯარიმო. 2გ - თაბუკაშვილი, ბუჯიაშვილი.
ლელო: 4ლ - თაფლაძე, ტაბუცაძე (2), დარძულიძე. 3გ, ს - კვირიკაშვილი
სინბინი: ქერდიყოშვილი, ტაბუცაძე
მსაჯი: შოთა თევზაძე

როგორც მოსალოდნელი იყო, ეს მატჩი დაძაბული და ძალზე საინტერესო გამოდგა. თამაშის ბოლო წუთამდე გამარჯვებულის ვინაობის გამოცნობა შეუძლებელი იყო. ორივე გუნდი ხელდახელ ბურთაობით ცდილობდა წარმატების მოპოვებას, თუმცა არც მორკინალების გარჯას "თაკილობდა" და ორივემ თითო ლელო მოლითაც გაიტანა. ორივე გუნდმა ოთხ-ოთხი ლელო და სამ-სამი გარდასახვა მიითვალა. გამარჯვებისთვის საჭირო ერთი საჯარიმო კი, "ლელოს" მგეზავმა მერაბ კვირიკაშვილმა გაიტანა. ლელოელთაგან გამოვყოფდით გარემარბ აკაკი ტაბუცაძეს, რომლის ანგარიშზეც ორი ლელოა.

ვეფხვები-ლოკომოტივი 22:47

ვეფხვები: 3ლ - შალიკაშვილი, გელაშვილი, მუჩიაშვილი. 2გ, ს - ბროძელი
ლოკომოტივი: 7ლ - შკინინი (3), ძნელაძე, წივწივაძე, გასვიანი, კოპაძე. 6გ - წიკლაური.
სინბინი: ბებიაშვილი
მსაჯი: გია ამირხანაშვილი

ჩემპიონატის დებიუტანტს, პატარძეულის "ვეფხვებს", პირველივე მატჩში სერიოზული გამომცდელი ჰყავდა. ქვეყნის ჩემპიონმა თბილისის "ლოკომოტივმა" მატჩის ბედი, ფაქტობრივად, პირველ ტაიმში გადაწყვიტა, როცა მეტოქეს ოთხი ლელო გაუტანა და 26:3 დაწინაურდა.

რკინიგზელთა შვიდი ლელოდან სამი შარშანდელი ჩემპიონატის საუკეთესო მელელოვის, გიორგი შკინინის ანგარიშზეა. პატარძეულელებმა სამი ლელოს გატანა მოახერხეს, რაც მათი ბრძოლისუნარიანობის დასტურად შეიძლება მივიჩნიოთ.

აკადემია-ბათუმი 7:46

აკადემია: ლ - მოსულიშვილი. გ - მოძღვრიშვილი
სინბინი: მოსულიშვილი
ბათუმი: 7ლ - ურჯუკაშვილი, ფუტკარაძე (2), ბუჯიაშვილი (2), ერისთავი, თედორაძე. 4გ, ს - ნინიძე.
სინბინი: ურჯუკაშვილი, გოგისვანიძე, თოდუა
მსაჯი: ონისე მოგელაშვილი

თბილისის "აკადემია" სეზონის წინ ყველაზე მეტად დაზარალდა. ბევრი წამყვანი მორაგბე დაკარგა, რაც გუნდის თამაშის ხარისხზე ნათლად აისახა.

აკადემიელებმა საგრძნობლად მოღონიერებულ "ბათუმს" მეტ-ნაკლები წინააღმდეგობა მხოლოდ პირველ ტაიმში გაუწიეს. თუმცა, ბათუმელებმა მასპინძლებს შვიდი ლელო გაუტანეს და დამსახურებულად გაიმარჯვეს. ორ-ორი ლელო ვანო ფუტკარაძემ და ხვიჩა ბუჯიაშვილმა მიითვალეს.

II ტური

7 სექტემბერი
ბათუმი-ხარები

8 სექტემბერი
ვეფხვები-ლელო
აია-არმაზი

9 სექტემბერი
ჯიქი-აკდემია
ლოკომოტივი-არმია

ფოტო დიდი ათის
ფეისბუქის გვერდიდან

ყოველდღიური სპორტული გაზეთი "ლელო"
472
მკითხველის კომენტარები / 0 /
მსგავსი ამბები
რუბრიკის სხვა სიახლეები