დიდი ათი: 'ლელო' ზედიზედ ორჯერ არ აგებს [მიმოხილვა]

ლელო-არმია 33:5

ლელო: (15-9) მათიაშვილი, თაფლაძე, ჯინჯიხაძე, მამუკაშვილი (ლაშხი 52), ტაბუცაძე, კვირიკაშვილი (გავაშელიშვილი 11), მარგალიტაძე (ახობაძე 65); (1-8) ბეჟიაშვილი, ჭყოიძე (პაპიძე 55), დუგლაძე (ლაზვიაშვილი 59), დარძულიძე, ქერდიყოშვილი, მამამთავრიშვილი, აფციაური, ყორიაული (ბუბუტეიშვილი 48)
4ლ - თაფლაძე, მამუკაშვილი, ქერდიყოშვილი, ტაბუცაძე. 3ს, 2გ - მათიაშვილი

არმია: (15-9) პაპუნაშვილი, ცირეკიძე, მერკვილიშვილი, კობახიძე, მესხი (ლაზარიშვილი 62), ნიკოლავა (ჭინჭარაული 51), ბოხუა (მახრაშვილი 41); (1-8) ბარბაქაძე (ზვიადაური 41), მეკოკიშვილი (პაატაშვილი 48), ებრალიძე (ჩუმაშვილი 48), გელაშვილი (ჯულიხაძე 61), ქარუხნიშვილი, გუგეშაშვილი, კალმახელიძე, გორგასლძე (მასხარაშვილი 41).
ლ - მერკვილიშვილი
სინბინი: კობახიძე

მსაჯი: სულხან ჩიხლაძე

ჩემპიონატის ლიდერთა შორის მყოფმა თბილისის "ლელომ" საკუთარ "ლელო არენაზე" გათამაშების აუტსაიდერ "არმიას" უმასპინძლა და ერთი შეხედვით იოლად, 33:5 სძლია.

არმიელებმა პირველი გამარჯვება მიმდინარე ჩემპიონატში მე-6 ტურში მოიპოვეს, თანაც, სტუმრად ერთ-ერთი ლიდერი, რუსთავის "ხარები" დაამარცხეს. ცხადია, მათგან ამჯერადაც მსგავს საოცრებას ველოდით, თუმცა მოლოდინი არ გაგვიმართლდა. "ლელომ" წინა ტურში შინ "ლოკომოტივთან" წააგო. ლელოელები კი, ზედიზედ ორჯერ არ აგებენ.

"არმიამ" მეტოქეს მედგარი წინააღმდეგობა პირველი ტაიმის 30-ე წუთამდე გაუწია. მეტიც, თამაში სრულიად თანაბარ ბრძოლაში მიმდინარეობდა და დერეფანში, ხანდახან კი, შერკინებაშიც, არმიელებს უპირატესობა ჰქონდათ. "ლელოს" მე-11 წუთზე მგეზავად მოთამაშე მერაბ კვირიკაშვილი დაუშავდა, რომელიც შესაცვლელი შეიქნა. ამან გუნდის შემადგენლობაში გარკვეული დისონანსი შეიტანა და სანამ დალაგდებოდნენ, "ლელოს" გარკვეული დრო დასჭირდა.

"მეკოს" მოედნიდან გასვლის შემდეგ ლიდერის ფუნქცია სოსო მათიაშვილმა იტვირთა. მან ანგარიში საჯარიმოდან მე-20 წუთზე გახსნა, ათ წუთში კი კიდევ ერთი საჯარიმოც მიითვალა და "ლელო" 6:0 დაწინაურდა.

პირველი ტაიმის დასკვნით სამ წუთში კი "ლელომ" ორი ლელო გაიტანა, რითაც, ფაქტობრივად, მატჩის ბედი გადაწყვიტა. 37-ე წუთზე "არმიამ" საკუთარ 22-მეტრიან ზონაში დერეფანში ბურთი უხეიროდ ააგდო. ის ლელოელების ნადავლი შეიქნა. მათ სწრაფად შეუტეს, ბურთი მარცხნივ, გრძელ ფრთაზე ბოლომდე ჩაათამაშეს და დემეტრე თაფლაძემ ლელოების ანგარიში გახსნა. მათიაშვილმა გარდასახვა ზუსტად დაარტყა - 13:0.

სამ წუთში "არმიას" ჩათვლის მოედნიდან ათ მეტრში აუტიდან ბურთი უკვე ლელოელებმა შემოიტანეს. მოლის შეკვრა სცადეს, მაგრამ, რომ არ გამოვიდა, ბურთი ისევ გრძელ ფრთაზე გაათამაშეს, სადაც ამჯერად შუამარბმა ბექა მამუკაშვილმა იყოჩაღა. მათიაშვილმა ესეც გარდასახა - 20:0. ასე დასრულდა პირველი ტაიმი.

შესვენების შემდეგ სამ წუთში მათიაშვილმა კიდევ უფრო დააწინაურა საჯარიმოდან თავისიანები - 23:0. "არმიას" დასაკარგავი აღარაფერი ჰქონდა და შეტევაში თამამად წავიდა. 54-ე წუთზე კი შეცვლაზე შესული მორაგბეების, გოდერძი ჭინჭარაულისა და შავლეგ მახარაშვილის აქტიური თამაშის წყალობით, "არმიამ" შედეგიანი იერიში განახორციელა. ლელო კიდესთან ახლოს შუამარბმა ალექსანდრე მერკვილიშვილმა გაიტანა. ბახვა კობახიძემ ვერ გარდასახა - 5:23.

მატჩის დასკვნითი 20 წუთი ისევ "ლელოსი" იყო - 61-ე წუთზე მეტოქის ლელოდან 10 მეტრში აგორებულ მოლს მეორეხაზელი გრიგორ ქერდიყოშვილი მოსწყდა და ბურთი ალამთან ახლოს დაამიწა. მათიაშვილმა არახელსაყრელი პოზიციიდან ვერ გაიტანა - 28:5.

მატჩის ბოლო წუთზე მარცხენა ფრთაზე არმიელებმა ბურთზე კონტროლი დაკარგეს. ის გარემარბის, აკაკი ტაბუცაძის ნადავლი გახდა, რომელმაც ლელომდე სამოცდაათი მეტრი ირბინა. მათიაშვილმა ესეც ვერ გარდასახა. თუმცა "ლელომ" ამ ლელოს წყალობით ერთი საპრემიო ქულა მაინც მიითვალა - 33:5.

ხარები-არმაზი 17:10
ხარები: 2ლ - ქანდაურაშვილი, ბასილაია. ს, 2გ - ბუჯიაშვილი.
სინბინი: ქავთარაძე, ქვლივიძე, კევლიშვილი
არმაზი: ლ - იაშაღაშვილი. ს, გ - ჯინჭველაშვილი.

სინბინი: გიგაური
მსაჯი: შოთა თევზაძე

VII ტური

22 ოქტომბერი
ბათუმი-ლოკომოტივი 15:00
ჯიქი-აია 17:30

27 ოქტომბერი
აკადემია-ვეფხვები 15:30

თ მ ფ წ ბ ქ(ს)

1. ბათუმი 6 5 0 1 +98 24(4)
4. ხარები 7 5 0 2 +46 23(3)
2. ლოკომოტივი 6 5 0 1 +70 23(3)
3. არმაზი 7 4 0 3 +95 22(5)
5. ლელო 7 5 0 2 +32 22(2)
6. აია 6 3 0 3 +11 14(2)
7. ჯიქი 6 2 0 4 -37 11(3)
8. ვეფხვები 6 1 0 5 -90 6(2)
9. აკადემია 6 1 0 5 -102 6(2)
10. არმია 7 1 0 6 -123 5(1)

ყოველდღიური სპორტული გაზეთი "ლელო"
191
მკითხველის კომენტარები / 0 /
მსგავსი ამბები
რუბრიკის სხვა სიახლეები