დიდი ათი. ლიდერი ხარები? რატომაც არა!

საქართველოს ჩემპიონატში მე-6 ტურის წინ დაუმარცხებელი აღარავინ დარჩა. გამარჯვების სიხარული კი, ერთადერთ გუნდს, თბილისის "არმიას" არ განუცდია.

მე-6 ტურში ყველაზე საინტერესო ორი მატჩია. ქუთაისის "აია" შინ მიიღებს ლიდერ "ბათუმს". თბილისის "ლელო" ქვეყნის ჩემპიონს, თბილისის "ლოკომოტივს" უმასპინძლებს.

საქართველოს ჩემპიონის, თბილისის "ლოკომოტივის" "ლელოსთან" დაპირისპირებისადმი გაზრდილი ინტერესი იმითაცაა გამოწვეული, რომ მომდევნო უქმეებზე რკინიგზელებს "კონტინენტის ფარის" გათამაშებაში პირველი მატჩის გამართვა უწევთ იტალიურ "კალვიზანოსთან". "ლოკომოტივმა" წინა ტურში რუსთავის "ხარებთან" მიმდინარე სეზონში პირველად წააგო. სამწუხაროდ, ტრავმა მიიღო და გუნდს ვერაფრით დაეხმარება საუკეთესო მელელოვე, ვეტერანი გარემარბი გიორგი შკინინი.

"ლელო" ნელ-ნელა საკუთარ თამაშს პოულობს. გუნდი მართალია მე-5 ადგილზეა, მაგრამ ლიდერების, "ბათუმისა" და "ლოკომოტვის" მსგავსად, მხოლოდ ერთი მარცხი და ოთხი მოგება აქვს. პრობლემა ისაა, რომ ლელოელები საპრემიო ქულას ვერაფრით იღებენ. ამ მატჩში წინასწარ გამარჯვებულის გამოცნობა შეუძლებელია. თუმცა, მატჩი რომ შესანიშნავი იქნება, ამას დიდი მკითხაობა არ სჭირდება.

"ბათუმს" კიდევ ერთი გამოცდის ჩაბარება მოუწევს. გამომცდელი სერიოზულია. ქუთაისის "აიამ", მართალია ბოლო ტურებში თამაშის ხარისხს უკლო, მაგრამ საკუთარ მოედანზე მაინც ფავორიტია. თუ ბათუმელებმა სტუმრად, ქუთაისში გამარჯვება შეძლეს, წინ სერიოზულ ნაბიჯს გადადგამენ და ჩემპიონობის ერთ-ერთი უმთავრესი პრეტენდენტის სტატუსს დაიმკვიდრებენ. თუმცა, იმავდროულად, დროა. "აიამ" დაკარგული სიმძლავრე აღიდგინოს და დაამტკიცოს, რომ მისი საჩემპიონო ბრძოლაში ჩამოწერა ნაადრევია.

წლევანდელი სეზონის ყველაზე დიდი მოულოდნელობა, რუსთავის "ხარები" შინ მიიღებს აუტსაიდერ თბილისის "არმიას". ცხადია, დიდი დავა არ სჭირდება, ვინაა ამ წყვილის ფავორიტი. რუსთაველები შესანიშნავ რაგბის თამაშობენ და პირველ ტურში შინ "ლელოსთან" მარცხის შემდეგ ზედიზედ ოთხი შეხვედრა მოიგეს, თანაც გათამაშების ფავორიტებთან. "არმია" კი უმძიმეს მდგომარეობაშია. ხუთ თამაშში მხოლოდ ერთი ქულა, სულაც არ არის სახარბიელო მონაგარი.

გუნდს უაღრესად დიდი ძალისხმევა დასჭირდება, რათა შექმნილი რთული ვითარებიდან თავის დაღწევა შეძლოს. "ხარებს" კი, შანსი აქვთ, სულაც სატურნირო ცხრილს სათავეში მოექცეს.

მოწინავე სამეულში დამკვიდრების კარგი შანსი აქვს მარნეულის "არმაზს", რომელიც თბილისის "აკადემიასთან" მატჩში ნომინალური მასპინძელია. შეხვედრა "შევარდენის სანაკრებო ბაზაზე" გაიმართება. არმაზელები კარგი შედეგიანობით გამოირჩევან. გუნდში ბევრია ეროვნული და ასაკობრივი ნაკრებების მოთამაშეები, რაც არმაზელთა თამაშის გამორჩეული ხელწერის მიზეზია.

"აკადემიამ" წინა ტურში პირველი გამარჯვება მოიპოვა. საკმაოდ დამაჯერებლად ითამაშა და "არმაზთან" დაპირისპირებაში უშანსოდ სულაც არ არის.

გორის "ჯიქის" მეტოქე შინ უმაღლესი ლიგის დებიუტანტი, პატარძეულის "ვეფხვები" იქნება. ორივე გუნდს აქტივში თითო გამარჯვება აქვს. ერთი ეგაა "ჯიქის" გორში დამარცხება ძალიან რთული საქმეა და რამდენად გაართმევენ პატარძეულელები ამოცანას თავს ძნელი სათქმელია. "ვეფხვები", როგორც დებიუტანტს ზოგადად სჩვევია, არასტაბილური გუნდის შთაბეჭდილებას ტოვებს. ვერ თამაშობს ყველა მატჩს ერთნაირად მაღალ დონეზე. ვნახოთ, იქნებ ამჯერად შეძლოს.

თ მ ფ წ ბ ქ(ს)
1. ბათუმი 5 4 0 1 +74 19(3)
2. ლოკომოტივი 5 4 0 1 +69 19(3)
3. ხარები 5 4 0 1 +41 18(2)
4. არმაზი 5 3 0 2 +78 16(4)
5. ლელო 5 4 0 1 +5 16(0)
6. აია 5 3 0 2 +35 14(2)
7. ჯიქი 5 1 0 4 -38 7(3)
8. აკადემია 5 1 0 4 -78 6(2)
9. ვეფხვები 5 1 0 4 -89 5(1)
10. არმია 5 0 0 5 -97 1(1)

VI ტური

5 ოქტომბერი
ჯიქი-ვეფხვები 17:00

6 ოქტომბერი
ლელო-ლოკომოტივი 14:00
აია-ბათუმი 16:00

7 ოქტომბერი
ხარები-არმია 15:00
არმაზი-აკადემია 17:15

ყოველდღიური სპორტული გაზეთი "ლელო"
215
მკითხველის კომენტარები / 0 /
მსგავსი ამბები