დიდი ათი. მამაცი დებიუტანტი და სუპერლელო

საქართველოს ჩემპიონატის მეორე ტური პირველზე არანაკლებ საინტერესო გამოდგა. ლელოები ამჯერადაც ბევრი გავიდა - საშუალოდ მატჩში ხუთი ლელო. სტუმრებმა, პირველი ტურისგან განსხვავებით, მხოლოდ ერთ მატჩში მოიგეს. დაუმარცხებელი სამი გუნდი დარჩა. სატურნირო ცხრილში კი ორხელისუფლებიანობაა.

ლელო-ვეფხვები 28:25
ლელო: 4ლ - მამუკაშვილი, ჯინჯიხაძე (2), ახობაძე. 4გ - კვირკაშვილი (3), ყიასაშვილი
ვეფხვები: 3ლ - არველაძე, გიორგაძე, ბროძელი. 2გ, ს, ა - გურგენიძე.
სინბინი: გიორგაძე
მსაჯი: ონისე მოგელაშვილი

უმაღლესი ლიგის დებიუტანტმა გასვლით მატჩში მრისხანე მეტოქესთან შესანიშნავად ითამაშა და გამარჯვებასაც იმსახურებდა. "ლელოს" მაინც გამოცდილებამ და შინაურმა კედლებმა უშველა. არადა, მატჩის დასაწყისი სულ სხვაგვარი გამოდგა. ლელომ საწყისი 20 წუთი შეტევებში გაატარა და 14:0 დაწინაურდა. გაგრძელება არ შედგა. "ვეფხვებმა" მომდევნო ხუთი წუთის განმავლობაში ორი კონტრიერიში წამოიწყო და ორივე ლელოთი დაასრულა.

პატარძეულელების მესამე ლელო კი სულაც შედევრი იყო. გამოვყოფდით "ვეფხვების" 17 წლის ფულბეკს ლაშა გურგენიძეს, რომელმაც შესანიშნავი სათამაშო უნარ-ჩვევები გამოავლინა. კარგად ხედავს მოედანს, ბრწყინვალედ თამაშობს ფეხით. მის ანგარიშზე ორი გარდასახვა და თითო-თითო საჯარიმო და არეკნია.

"ლელომ" კი გამარჯვების მომტანი ლელო მატჩის დასრულებამდე ორი წუთით ადრე გაიტანა. "ვეფხვებმა" საპრემიო ქულა დაიმსახურეს და ამით პირველი ქულა მიითვალეს.

ბათუმი-ხარები 8:15
ბათუმი: ლ - შუბითიძე. ს - ნინიძე
სინბინი: შუბითიძე
ხარები: 3ლ - თაბუკაშვილი, გოგიაშვილი, ქვლივიძე.
სინბინი: ნატრიაშვილი
მსაჯი: სულხან ჩიხლაძე

ტურის სენსაცია ბათუმში გამოცხვა - რუსთავის "ხარებმა", რომელმაც პირველ ტურში შინ წააგო "ლელოსთან", გასვლით მატჩში "ბათუმის" დამარცხება შეძლო.

არადა, შავიზღვისპირული გუნდი ჩემპიონატის ერთ-ერთ უმთავრეს ფავორიტად მოიაზრება. აღსანიშნავია, რომ რუსთაველებმა მეტოქეს სამი გარდაუსახავი ლელოს წყალობით სძლიეს. მათ არც საჯარიმო ან თუნდაც არეკნი არ გაუტანიათ. ბათუმელებმა კი, რვა ქულაზე ნაკლებით წაგების გამო, ერთი საპრემიო ქულა მიითვალეს.

აია-არმაზი 31:27
აია: 4ლ - წიკლაური, ვარდანიძე, რატიაშვილი (2). 4გ, ს - აბჟანდაძე.
სინბინი: მანაგაძე
არმაზი: 3ლ - ჯინჭველაშვილი, ხუროშვილი, სვანიძე. 3გ, 2ს - ჯინჭველაშვილი
სინბინი: ხუროშვილი, გიგოლაშვილი
მსაჯი: შოთა თევზაძე

ამ გუნდების თამაში განსაკუთრებულ ინტერესს იწვევდა, რადგან ერთმანეთის პირისპირ ორი, საქართველოს ჩემპიონატისთვის თითქმის საუკეთესო უკანახაზი უნდა დამდგარიყო.

ბრძოლა, ანგარიშიდანაც კარგად ჩანს, უშეღავათო გამოდგა. არმაზელებს შორის ყველაზე მეტი, 17 ქულა, წარმოშობით ქუთაისელმა მგეზავმა რეზო ჯინჭველაშვილმა მოიპოვა (ერთი ლელო, სამი გარდასახვა და ორი საჯარიმო). სტუმრები ბოლო წუთამდე იგებდნენ 27:24. თუმცა, "აიას" მორკინალმა მიხეილ რატიაშვილმა მე-80 წუთზე გატანილი ლელოთი "აიას" გამარჯვება მოუტანა.

ჯიქი-აკადემია 21:6
ჯიქი: 3ლ - კლდიაშვილი, წიკლაური, მჭედლიშვილი. 3გ - ჭიჭინაძე.
აკადემია: 2ს - მოძღვრიშვილი
მსაჯი: სულხან ჩიხლაძე

გორის "ჯიქმა" პირველი გამარჯვება მოიპოვა. გორელებმა შინ თბილისის "აკადემიას" უმასპინძლეს. აღსანიშნავია, რომ "ჯიქი" პორველი ტაიმის შემდეგ 21:6-ს იგებდა. მეორე ნახევარში კი გუნდებმა საკუთარ მონაგარს ვერაფერი შესძინეს. "აკადემია" ჯერაც უქულოდაა და, როგორც ჩანს, ამ გუნდს დივიზიონში ადგილის შენარჩუნებისთვის მოუწევს ბრძოლა.

ლოკომოტივი-არმია 21:8
ლოკომოტივი: 3ლ - გასვიანი, მამუკაშვილი, ბეგაძე. 3გ - წიკლაური
სინბინი: ყველიაძე
არმია: ლ - გოგლიძე. ს - კობახიძე
სინბინი: ჩუმაშვილი, დევაძე
მსაჯი: გია ამირხანაშვილი

რკინიგზელებმა დაგეგმილი გამარჯვება მიითვალეს. თუმცა, საპრემიო ქულის მოპოვება ვერ შეძლეს. არმიელებმა ერთი ხანობა ანგარიშის ექვს ქულამდე შემცირებაც შეძლეს, მაგრამ "ლოკომოტივმა" დაწინაურების საშუალება არ მისცა. პირიქით, კიდევ ერთი ლელო გაუტანა და ახლა პირველ-მეორე ადგილებს ქუთაისის "აიასთან" იყოფს.

თ მ ფ წ ბ ქ(ს)
1. აია 2 2 0 0 +47 9(1)
2. ლოკომოტივი 2 2 0 0 +38 9(1)
3. ლელო 2 2 0 0 +6 8(0)
4. ბათუმი 2 1 0 1 +32 6(2)
5. არმაზი 2 1 0 1 +19 5(1)
6. ხარები 2 1 0 1 +4 5(1)
7. ჯიქი 2 1 0 1 -8 5(1)
8. ვეფხვები 2 0 0 2 -28 1(1)
9. აკადემია 2 0 0 2 -54 0(0)
10. არმია 2 0 0 2 -56 0(0)

III ტური . 14 სექტემბერი
ლელო-ბათუმი

15 სექტემბერი
არმია-ვეფხვები
ხარები-ჯიქი

16 სექტემბერი
აკადემია-აია
არმაზი-ლოკომოტივი

ყოველდღიური სპორტული გაზეთი "ლელო"
624
მკითხველის კომენტარები / 0 /
მსგავსი ამბები
რუბრიკის სხვა სიახლეები
;