დიდი ათი. მერვე ტურის მატჩები: დაუჯერებელი ამბავი... დისციპლინის საკითხი კვლავ მწვავეა

საქართველოს ჩემპიონატის მერვე ტურის ხუთივე მატჩი დაძაბულ ბრძოლაში წარიმართა. კვლავ მწვავედ დგას დისციპლინის საკითხი.

უამრავ ყვითელ ბარათთან ერთად არბიტრებმა ორჯერ წითელიც ააფრიალეს. "ჯიქისა" და "ლოკომოტივის" დაპირისპირებაში კი მსაჯმა მოედანი ექვს პირველხაზელს ერთდროულად დაატოვებინა.

ჯიქი-ლოკომოტივი 16:19
ჯიქი: ლ - ხიდეშელი. 3ს.გ - ფურცხვანიძე
სინბინი: ორაგველიძე, სუთიძე, კაკაურიძე
გაძევება: კაკაურიძე
ლოკომოტივი: ლ - კოპაძე/ 4ს,გ - წიკლაური
სინბინი: ვ.ქვათაძე, ი.ქვათაძე, ქართველიშვილი
მსაჯი: საბა აბულაშვილი

ამ გუნდების დაპირისპირება მუდამ დაძაბულ და საინტერესო ბრძოლაში მიმდინარეობს. ასე იყო ამჟამადაც. "ლოკომოტივმა", რომელიც ქვეყნის მოქმედი ჩემპიონია, მასპინძლებზე ერთით მეტი საჯარიმოს გატანა, თანაც ბოლო წუთზე შეძლო და დამსახურებულად გაიმარჯვა.

ამ მატჩის პირველი ტაიმის მიწურულს მოხდა ფაქტი, რომელიც სამუდამოდ შევა მსოფლიოს რაგბის ისტორიაში. მატჩის არბიტრმა საბა აბულაშვილმა შერკინება დანიშნა. მისი მოწყობა კი საკმაოდ გაჭიანურდა. პირველხაზელები, როგორც ჩანს, არ ასრულებდნენ მსაჯის მითითებებს. მასაც მოთმინების ფიალა აევსო და ორივე გუნდის ყველა პირველხაზელი, სულ ექვსი მორაგბე სინბინში ერთად გაუშვა.

ვეფხვები-აია 22:27
ვეფხვები: 4ლ - მღებრიშვილი, უსტიაშვილი, შალიკაშვილი (2), გ - ბროძელი.
სინბინი: ჟღენტი
აია: 4ლ - ლომიძე, ერემეიშვილი, ნუცუბიძე, ძაგნიძე. 2გ,ს - ლომიძე.
სინბინი: რატიაშვილი, ბაბუნაშვილი, ძოიძე, თუთბერიძე
მსაჯი: ონისე მოგელაშვილი

პატარძეულის "ვეფხვებმა", რომელიც უმაღლესი ლიგის დებიუტანტია, მიმდინარე გათამაშებაში პირველად ითამაშა მშობლიურ სტადიონზე. გამომცდელი ახალბედებს სერიოზული ჰყავდა. ქუთაისის "აია" ტრადიციული, უძველესი გუნდია, რომელიც ამჟამად აღმავლობის გზაზეა. თამაში უხვლელოიანი გამოდგა. ორივე გუნდმა ოთხ-ოთხი ლელო გაიტანა. თუმცა, კარში დარტყმებისას უფრო ზუსტად ქუთათურები გაისარჯნენ და მოიგეს კიდეც მატჩი. "ვეფხვებმა" სანუგეში საპრემიო ქულა აიღეს.

არმია-ბათუმი 6:13
არმია: 2ს - კობახიძე
სინბინი: ბარბაქაძე
ბათუმი: 2ლ - თუთბერიძე, მიმინოშვილი. ს - ნინიძე.
სინბინი: ბუჯიაშვილი
მსაჯი: სულხან ჩიხლაძე

ჩემპიონატის ლიდერმა "ბათუმმა" აუტსაიდერთან, თბილისის "არმიასთან" მატჩში დაგეგმილ გამარჯვბას მიაღწია. ზღვისპირელებს ეროვნულ ნაკრებში მივლენილი რამდენიმე მორაგბე აკლდა, რაც არმიელთათვის კარგი შესაძლებლობა იყო წარმატებაზე ეფიქრა. დიდი მცდელობის მიუხედავად, "არმიამ" მხოლოდ ორი საჯარიმოს გატანა შეძლო. რაზეც ბათუმელებმა ორი ლელოთი უპასუხეს.

აკადემია-ხარები 22:15
აკადემია: 3ლ - საჯარიმო, ღამბაშიძე, სნ.ილურიძე. ს,გ - მოძღვრიშვილი
ხარები: 2ლ - ხაბაშვილი, გოგიაშვილი. ს,გ - ბუჯიაშვილი
სინბინი: გოგიაშვილი, აღაშვილი
გაძევება: გოგიაშვილი
მსაჯი: შოთა თევზაძე

თბილისის "აკადემიამ" ნეიტრალურ მოედანზე, გორში გათამაშების ერთ-ერთი ლიდერი, რუსთავის "ხარები" დაამარცხა და საგრძნობლად გამოიკეთა სატურნირო მდგომარეობა. მართალია, აკადემიელები ჯერ ისევ სახიფათო ზონაში არიან, მაგრამ იმავდროულად, საპლეიოფო ექვსეულს 10 ქულა აშორებს. ამ ჩამორჩენის აღმოფხვრა, მოვლენათა სასურველი სცენარით განვითარების შემთხვევაში, სულაც არ არის წარმოუდგენელი.

არმაზი-ლელო 15:6
არმაზი: 4ს,ა - ჯინჭველაშვილი
სინბინი: ბერაძე
ლელო: 2ს - პერანიძე
სინბინი: კვაჭაძე
მსაჯი: ნიკა ამაშუკელი

წამყვანი მოთამაშეების არყოფნა ორივე გუნდს საგრძნობლად დაეტყო. პირველი თბილისის "ლელომ" 6:3 მოიგო. შესვენების შემდეგ კი, ლელოელებმა მონაგარს ვეღარაფერი შემატეს. მარნეულის "არმაზის" მგეზავმა რეზო ჯინჭვალაშვილმა კი სამ საჯარიმოს ბოლო წუთზე არეკნიც მიაყოლა და მეტოქეს სანუგეშო საპრემიო ქულაც არ დაანება.

თ მ ფ წ ბ ქ(ს)
1. ბათუმი 8 7 0 1 +108 32(4)
2. ლოკომოტივი 8 6 0 2 +70 28(4)
3. არმაზი 8 5 0 3 +104 26(6)
4. ხარები 8 5 0 3 +39 24(4)
5. ლელო 8 5 0 3 +23 22(2)
6. აია 8 5 0 3 +18 22(2)
7. ჯიქი 8 2 0 6 -42 13(5)
8. აკადემია 8 2 1 5 -95 12(2)
9. ვეფხვები 8 1 1 6 -95 9(3)
10. არმია 8 1 0 7 -130 6(2)

IX ტური

30 ნოემბერი
ბათუმი-არმაზი

1 დეკემბერი
აია-ლოკომოტივი
ჯიქი-არმია

2 დეკემბერი
ხარები-ვეფხვები
ლელო-აკადემია

ყოველდღიური სპორტული გაზეთი "ლელო"
365
მკითხველის კომენტარები / 0 /
მსგავსი ამბები
რუბრიკის სხვა სიახლეები