დიდი ათი. პირველი ბრინჯაო არმაზის ისტორიაში 

ხარები-არმაზი 27:21

ხარები (15-9): ნარიმანიძე, თაბუკაშვილი (ბებიაშვილი 67), კოშაძე (ქანდაურიშვილი 20), ნათელაშვილი, მელიქიშვილი, ბასილაია, ბუჯიაშვილი; (1-8): ჩომახაშვილი (ცუხიშვილი 59), ნატრიაშვილი (კევლიშვილი 59), გოგოლაძე (აღაშვილი 54), ჯიმშიტაშვილი (ხაბაშვილი 71), აქუბარდია, ე.მაჭარაშვილი, გოგიაშვილი (ციცქიშვილი 69), ქვლივიძე
4ლ: გოგიაშვილი, ქანდაურიშვილი (2), ქვლივიძე. ს, 2გ: ბუჯიაშვილი

არმაზი (15-9): ჭედია (ბრეგვაძე 41, ცეცაძე 74, სოსელია 75), ლიპარტელიანი, წიკლაური, კვესელაძე, გიგაური, ჯინჭველაშვილი, დვალიშვილი; (1-8): ჯიბლაძე (ფხაკაძე 37, ჯიბლაძე 67), თაგაური, სანიკიძე, ლ.მაჭარაშვილი, ბარბაქაძე, დიდებულიძე (მოგელაძე 57), გიგოლაშვილი (მინაშვილი 69), ჯიმშელეიშვილი
3ლ: წიკლაური, ჯიმშელეიშვილი, ჯინჭველაშვილი. 3გ: ჯინჭველაშვილი

მსაჯი: შოთა თევზაძე 

საქართველოს ჩემპიონატის ბრინჯაოს მედლის მფლობელი მარნეულის „არმაზი“ გახდა. ეს ამ გუნდის ისტორიაში საუკეთესო მიღწევაა. თუმცა, თამამად შეიძლება ითქვას, რომ არმაზელებს მეტიც შეეძლოთ. წინასწარ ფინალში „არმაზმა“ სტუმრად ითამაშა რუსთავის „ხარებთან“ და დრამატულ ბრძოლაში 21:27 დამარცხდა. რუსთაველები ჩემპიონის ტიტულისთვის 12 მაისს „ბათუმს“ დიდ ფინალში დაუპირისპირდებიან. შეხვედრა ბათუმში გაიმართება. 

წინასწარი ფინალი კი „არმაზმა“ ძალზე აქტიურად დაიწყო. სტუმართა გუნდი სწრაფად და საკმაოდ ორგანიზებულად ირჯებოდა. რუსთაველებს საწყისი ათი წუთის განმავლობაში ძირითადად დაცვაში ყოფნამ მოუწიათ. კარგადაც იცავდნენ თავს, მაგრამ მე-8 წუთზე არმაზელებმა მეტოქის დაცვის ხაზის არევა მაინც შეძლეს. ჯერ გიორგი კვესელაძემ გადაიტანა ბურთი მეტოქის ნახევარზე. მერე, მგეზავმა რეზო ჯინჭველაშვილმა მარცხენა ფრთაზე მოსხეპით შეტევაში გარემარბი ნიკა გიგაური ჩართო, რომელმაც ათმეტრიან ხაზთან მიიღო ბურთი. ის მეტოქის მცველებს ხელიდან გაუსხლტა და მისი შეჩერება ლელოს ხაზთან ვერც რუსთაველთა მგეზავმა ლევან ნარიმანიძემ შეძლო. ჯინჭველაშვილმა გარდასახვა ზუსტად დაარტყა - 7:0. 
ლელოს გატანის შემდეგ „არმაზი“ თითქოს დამშვიდდა, დაწყნარდა. „ხარებმა“ დრო იხელთეს და ნელ-ნელა უპირატესობის მოპოვება შეძლეს. მათი

შერკინება ტაიმის მიწურულს მეტოქისას უკევ აშკარად ჩაგრავდა. 35-ე წუთზე მორიგი დერეფნის მოგების შემდეგ „ხარების“ მოლი ზედ ლელოს ხაზთან ჩაიქცა. წარმოქმნილი რაკიდან ბურთი მესამეხაზელმა ლაშა გოგიაშვილმა აიტაცა და ჩათვლის მოედანში გადადო. კობა ბუჯიაშვილმა გარდასახვა ზუსტად დაარტყა და ანგარიში გაათანაბრა. ტაიმის ბოლო წუთზე კი მანვე საჯარიმოთი „ხარები“ მატჩში პირველად დააწინაურა - 10:7. ასე დასრულდა პირველი ტაიმი. 

შესვენების შემდეგ „არმაზმა“ ისევ აქტიურად შეუტია. თუმცა, ამჯერად „ხარებმა“ საკუთარი ლელოს დაცვის ორგანიზება უკეთ შეძლეს და მეტიც, 49-ე წუთზე რუსთაველებმა მრავალფაზიანი, სწრაფი შეტევის აკინძვა მოახერხეს. მარჯვენა ფრთაზე შეცვლაზე შესულმა შუამარბმა გურამ ქანდაურიშვილმა იყოჩაღა, მან ხაზი გაჭრა და მეტოქე დაალელოვა. ბუჯიაშვილმა გარდასახა - 17:7. 

შვიდ წუთში ისევ ქანდაურიშვილის ჯერი დადგა. „ხარების“ სწრაფი შეტევა მარჯვენა ფრთაზე განვითარდა. იქ შუამარბმა გიორგი ნათელაშვილმა თანაგუნდელი „ჯვარზე“ შეიყვანა და ქანდაურიშვილის შემჩერებელი აღარავინ იყო. ბუჯიაშვილმა ვერ გარდასახა - 22:7. 

„არმაზი“ 15-ქულიან ჩამორჩენას თითქოს უნდა გაეტეხა, მაგრამ - არა. დასკვნითი ათი წუთი ნებისმიერი რანგის მატჩის მშვენება იქნებოდა. 70-ე წუთზე „არმაზმა“ მეტოქის ლელოდან ხუთ მეტრში საჯარიმო გაათამაშა. მორკინალების რამდენიმე მოკლე დარტყმის შემდეგ ბურთი მარცხენა, გრძელ ფრთაზე გაიტანეს, სადაც მესამეხაზელმა კობა ჯიმშელეიშვილმა მეტოქის ხაზი გაჭრა და ლელოში შეაღწია. ჯინჭველაშვილმა გარდასახა - 14:22. 

ოთხი წუთის შემდეგ კი „არმაზს“ მატჩის გადარჩენის რეალური შანსი გაუჩნდა. „ხარები“ ხელდახელ ბურთაობით მარცხენა ფრთიდან უტევდნენ, როცა ჯინჭველაშვილმა მათი კომბინაციის მსვლელობა ზუსტად წაიკითხა, გადაცემა ჩაჭრა და მოედნის საკუთარი ნახევრიდან ლელომდე მარტომ ირბინა. გარდასახვაც თვითონვე დაარტყა - 21:22. 

მატჩის დასრულებამდე ხუთი წუთი იყო დარჩენილი. „არმაზს“ შეეძლო ერთი საჯარიმოთი ან არეკნით თამაში მოეგო. ერთ-ერთი იერიშისას ჰქონდათ კიდეც არეკნის დარტყმის შესაძლებლობა, თუმცა არ გარისკეს. არადა, მოგვიანებით, იმავე შეტევაში რაკში თამაშისას დაჯარიმდნენ.

„ხარებმა“ საჯარიმო აუტში გადაიტანა. დერეფანი მოიგო და მორიგი იერიში წამოიწყო. რუსთაველები ლელოს მარჯვენა ფრთიდან მიუახლოვდნენ. აქ თავი ისევ ნათელაშვილმა გამოიჩინა. რაკიდან გამოსული ბურთი მან მაღალ სისწრაფეზე მიიღო. მეტოქის მცველებს შორის უპრობლემოდ გაიარა და ბოლო მომენტში უკეთეს პოზიციაში მყოფ მესამეხაზელ გიგა ქვლივიძეს გადააწოდა. ამ უკანასკნელის გატანილი ლელო ბუჯიაშვილმა ვერ გარდასახა და თამაშიც დასრულდა - 27:21. 

„არმაზი“ მატჩის დასრულებისთანავე რაგბის კავშირის ვიცე-პრეზიდენტმა გია გორგასლიძემ ბრინჯაოს მედლებით დააჯილდოვა. 

12 მაისი 
დიდი ფინალი
ბათუმი-ხარები 18:00 

ყოველდღიური სპორტული გაზეთი "ლელო"
425
მკითხველის კომენტარები / 0 /
მსგავსი ამბები
რუბრიკის სხვა სიახლეები
;