დიდი ათი. ტური ორი ცენტრალურით: 'ლელო' VS 'ბათუმი', 'არმაზი' VS 'ლოკომოტივი'

საქართველოს ჩემპიონატის მესამე ტურის წინ დაუმარცხებელი სამი გუნდია. ესენია: ქუთაისის "აია", თბილისის "ლოკომოტივი" და თბილისის "ლელო".

ასევე სამი გუნდია ისეთი, რომლებსაც გამარჯვების სიხარული არ განუცდიათ - პატარძეულის "ვეფხვები", თბილისის "აკადემია" და თბილისის "არმია". ეს თანაფარდობა შესაძლოა მესამე ტურში საგრძნობლად შეიცვალოს.

ტურის ცენტრალურ შეხვედრად, შესაძლოა, თბილისის "ლელოსა" და "ბათუმის" დაპირისპირება მივიჩნიოთ, რომელიც დღეს "ლელო არენაზე" გაიმართება.

ლელოელებმა განვლილი ორივე შეხვედრა სამი ქულის სხვაობით, თითქმის მატჩის მიწურულს მოიგეს. გუნდი გამოცდილი და ახალგაზრდა მორაგბეების ნაზავია, რაც თამაშის მსვლელობისას სტაბილურობას საგრძნობ დაღს ასვამს. ლელოელები ხშირად ვერ იყენებენ სალელოვე მომენტებს და დაცვაშიც ჯერჯერობით უჭირთ.

"ბათუმი", შარშანდელთან შედარებით, წლეულს საგრძნობლად გაძლიერდა, მაგრამ მეორე ტურში შინ რუსთავის "ხარებთან" მარცხმა, ეს რეალობა მითად აქცია. ძნელი სათქმელია, რა შეიძლება ამის მიზეზი იყოს. ალბათ, შეუთამაშებლობა.

ორივე გუნდს წამყვანი მოთამაშეები დაუბრუნდნენ. "ლელოს" ძირითად შემადგენლობაში იქნებიან ცხრა ნომერი თენგიზ პერანიძე და ფულბეკი სოსო მათიაშვილი. ნიკო აფციაური კი, სათადარიგოთა შორისაა, ეს მორაგბეები საქართველოს შვიდკაცა რაგბის ნაკრებში იყვნენ გამოძახებული და მეორე ტურის მატჩი "ვეფხვებთან" გამოტოვეს. "ბათუმის" ძირითად შემადგენლობაში დაბრუნდა მგეზავი ლაშა ხმალაძე. მამუკა ნინიძემ კი, ფულბეკის პოზიციაზე გადაინაცვლა.

არანაკლებ საინტერესო იქნება მარნეულის "არმაზისა" და თბილისის "ლოკომოტივის" დაპირისპირება, რომელიც კვირას "შევარდენის" სანაკრებო ბაზაზე გაიმართება. ტურის ცენტრალურ მატჩად ეს შეხვედრაც შეიძლება მივიჩნიოთ. არმაზელებმა წინა ტურში დიდი ბრძოლა გაუმართეს ქუთაისის "აიას" გასვლით მატჩში და მხოლოდ ოთხი ქულით დამარცხდნენ. არმაზელებს დაცვაში ცოტა მეტი ყურადღება მართებთ.

რკინიგზელებზე რა უნდა ვთქვათ. საქართველოს ყველაზე ტიტულოვანი გუნდი ნებისმიერ მეტოქესთან ფავორიტია. ალბათ, ამჯერადაც ასე იქნება. თუმცა, ასეც ხდება, რომ ფავორიტებიც ხანდახან აგებენ. "ლოკომოტივს", ისევე როგორც "ლელოს", შვიდკაცა რაგბის ნაკრებში მივლენილი მორაგბეები ზურაბ ძნელაძე და იოანე ხელაია დაუბრუნდნენ. დიდი ძალა "არმაზისთვის" ამავე ნაკრებიდან დაბრუნებული მესამეხაზელი ილია სპანდერაშვილია.

რუსთავის "ხარების" ავტორიტეტი გასვლით მატჩში "ბათუმის" დამარცხების შემდეგ მნიშვნელოვნად ამაღლდა. ამ გუნდთან იოლი გასეირნება არავის ექნება და მათ შორის არც გორის "ჯიქს". რუსთაველები ამბიციურ მეტოქეს, რომელსაც ფრანგი მწვრთნელი თავკაცობს, შინ მიიღებენ. ორივე გუნდს აქტივში თითო გამარჯვება აქვს და სატურნირო ცხრილში მეზობლები არიან.

ამ ორ გუნდს შორის გამარჯვებული, მიუხედავად იმისა, რომ თითქოს ჯერ ადრეა, თამამად შეიძლება ითქვას, ერთ ძალიან დიდ ნაბიჯს გადადგამს მოწინავე ექვსეულში მოხვედრისთვის ბრძოლის გზაზე. გორელთა გუნდს შვიდკაცა რაგბის ნაკრებში მივლენილი უკანახაზელი ირაკლი სვანიძე დაუბრუნდა.

თბილისის "არმიას" და პატარძეულის "ვეფხვებს", როგორც უკვე ვთქვით, მოგება არ აქვთ. თუმცა, უმაღლესი ლიგის დებიუტანტებმა ერთი საპრემიო ქულის მოპოვება მაინც შეძლეს. "ვეფხვებმა" შესანიშნავად ითამაშეს სტუმრად თბილისის "ლელოსთან" და გადაჭარბებული არ იქნება თუ ვიტყვით, რომ გამარჯვებასაც იმსახურებდნენ. არ გაუმართლათ. გამოუცდელობამაც თავისი ქნა.

ჯერჯერობით უქულოდაა თბილისის "აკადემიაც", რომელიც შინ მიიღებს გათამაშების ლიდერ ქუთაისის "აიას". ეს უკანასკნელი წლეულს, ისევე როგორც შარშან, ჩემპიონატის სტარტზე საკმაოდ მრისხანედ გამოიყურება და, ვფიქრობთ, მის წინაშე დასმული ნებისმიერი ამოცანის გადაჭრა ძალუძს.

III ტური

14 სექტემბერი
ლელო-ბათუმი

15 სექტემბერი
არმია-ვეფხვები
ხარები-ჯიქი

16 სექტემბერი
აკადემია-აია
არმაზი-ლოკომოტივი

თ მ ფ წ ბ ქ(ს)
1. აია 2 2 0 0 +47 9(1)
2. ლოკომოტივი 2 2 0 0 +38 9(1)
3. ლელო 2 2 0 0 +6 8(0)
4. ბათუმი 2 1 0 1 +32 6(2)
5. არმაზი 2 1 0 1 +19 5(1)
6. ხარები 2 1 0 1 +4 5(1)
7. ჯიქი 2 1 0 1 -8 5(1)
8. ვეფხვები 2 0 0 2 -28 1(1)
9. აკადემია 2 0 0 2 -54 0(0)
10. არმია 2 0 0 2 -56 0(0)

ყოველდღიური სპორტული გაზეთი "ლელო"
270
მკითხველის კომენტარები / 0 /
მსგავსი ამბები
რუბრიკის სხვა სიახლეები