დიდი ათი. ჩემპიონმა 'ლელოსთან' დათმო, ცხრილი სამად გაიყო

საქართველოს ჩემპიონატის რეგულარული გათამაშების დასრულებამდე სამი ტურიღა დარჩა. სატურნირო ცხრილი, თითქოს, სამ ნაწილადაა გაყოფლი. ლიდერებს, „ბათუმს“, „ლოკომოტივს“ და „ხარებს“ პლეი ოფი განაღდებული აქვთ. დარჩენილი სამი ადგილისთვის მომდევნო ოთხი გუნდი იბრძვის. უმაღლეს ლიგაში ადგილის დაკარგვის საფრთხე კი, მომდევნო სამს ემუქრება.

ბათუმი-აია 24:21
ბათუმი: 2ლ - ერისთავი, ტრაპაიძე. 4ს, გ - ნინიძე.
აია: 2ლ - კოხოძე, კობახიძე. 3ს. გ - თევდორაძე
მსაჯი: ტაჰლა ნჩაკაზა

„ბათუმი“ წლეულს შესანიშნავად ასპარეზობს. მიუხედავად იმისა, რომ ნაკრებში რამდენიმე მორაგბე ჰყავდა მივლინებული, ქუთაისის „აიას“ შინ მაინც აჯობა. ბათუმელები უახლოეს მდევარს, ქვეყნის მოქმედ ჩემპიონს, ახლა 9 ქულით უსწრებენ და, ფაქტობრივად, შესარჩევ ფინალში თამაში განაღდებული აქვთ. „აიას“ კი, ჯერ კიდევ წინ ელის ბრძოლა პლეი ოფში მოსახვედრად.

ლოკომოტივი-ლელო 8:9
ლოკომოტივი: ლ - მაისურაძე. ს - წიკლაური
სინბინი: კოპაძე
ლელო: 3ს - ყიასაშვილი
სინბინი: ლაზვიაშვილი, აფციაური
მსაჯი: სულხან ჩიხლაძე

ქვეყნის ჩემპიონმა „ლელოსთან“ მატჩი დაძაბულ ბრძოლაში დათმო. ცხადია, ამაზე ანგარიშიც თავისთავად მეტყველია. ლელოელები მე-60 წუთზე ირაკლი ყიასაშვილის საჯარიმო დარტყმით დაწინაურდნენ. დარჩენილ 20 წუთში რკინიგზელებს რეალურად შეეძლოთ მატჩის გადარჩენა, მაგრამ „ლელომ“ არ დაანება და მისთვის უმნიშვნელოვანესი გამარჯვება მოიპოვა.

ვეფხვები-ჯიქი 21:26
ვეფხვები: 2ლ - ლეგაშვილი, გაბროშვილი. 3ს, გ - ბეჟუაშვილი
ჯიქი: 4ლ - შენგელია (2), კლდიაშვილი, სუხაშვილი. 3გ - კალანდაძე (2), ფურცხვანიძე
სინბინი: კლდიაშვილი
მსაჯი: საბა აბულაშვილი

უმაღლესი ლიგის დებიუტანტები გამარჯვების შემთხვევაში საგრძნობლად გაიუმჯობესებდნენ სატურნირო მდგომარეობას. 25 წუთის განმავლობაში იგებდნენ კიდეც, მაგრამ მერე „ჯიქმა“ იმძლავრა და 72-ე წუთამდე 12 ქულის სხვაობით იგებდა - 26:14. მასპინძლები ბოლო ათ წუთში ისევ საგრძნობლად გააქტიურდნენ, მაგრამ მხოლოდ ანგარიშის ხუთ ქულამდე შემცირება შეძლეს.

აკადემია-არმაზი 15:23
აკადემია: 2ლ - მსტოიანი, საჯარიმო. ს - მოძღვრიშვილი
სინბინი: ქადარია, ბეგაძე
არმაზი: 3ლ - თაგაური (2), ლიპარტელიანი. 2ს,გ - ჯინჭველაშვილი.
სინბინი: დვალიშვილი, თაგაური
გაძევება: დვალიშვილი
მსაჯი: ნიკა ამაშუკელი

ზედიზედ ოთხი განცდილი მარცხის შემდეგ მარნეულის „არმაზმა“ მოგება შეძლო. არადა აკადემიელებმა აქამდე ლიდერთა ჯგუფის წარმომადგენლები ერთმანეთის მიყოლებით დაამარცხეს. თამაშის დასრულებამდე 20 წუთით ადრე არმაზელები 20:0 იგებდნენ. „აკადემიამ“ ოდნავ მოდუნებულ მეტოქეს 15 ქულა კი აართვა, მაგრამ მატჩის გადარჩენა ვეღარ შეძლო. ამ მოგებით „არმაზმა“ პლეი ოფში მოხვედრის რეალური შანსი მიიღო.

არმია-ხარები 13:18
არმია: ლ - პაპუნაშვილი, 2ს, გ - კობახიძე
სინბინი: გუგეშაშვილი, ნიკოლავა
ხარები: 2ლ - ქვლივიძე, მაჭარაშვილი. 2ს, გ - ბუჯიაშვილი
გაძევება: კოშაძე
მსაჯი: შოთა თევზაძე

ამ გუნდების დაპირისპირებაში „არმიამ“ მედგარი წინააღმდეგობის გაწევა მხოლოდ პირველ ტაიმში შეძლო, რომელიც „ხარებმა“ 6:3 მოიგეს. რუსთაველები ბოლო წუთამდე 18:6 იგებდნენ. არმიელებმა ლელო ბოლოსღა გაიტანეს და ერთი საპრემიო ქულა მიითვალეს.

თ მ ფ წ ბ ქ(ს)
1. ბათუმი 15 13 0 2 +171 58(6)
2. ლოკომოტივი 15 10 0 5 +130 49(9)
3. ხარები 15 10 1 4 +46 46(4)
4. ლელო 15 8 0 7 -5 36(4)
5. აია 15 7 1 7 +10 34(4)
6. ჯიქი 15 6 1 8 -1 34(8)
7. არმაზი 15 6 1 8 +23 33(7)
8. აკადემია 15 5 1 9 -134 24(2)
9. ვეფხვები 15 3 1 11 -107 22(8)
10. არმია 15 4 0 11 -132 20(4)

XVI ტური

22 მარტი
არმია-ლელო 16:00

23 მარტი
არმაზი-ხარები 14:00
აია-ჯიქი 16:00

24 მარტი
ვეფხვები-აკადემია 14:00
ლოკომოტივი-ბათუმი 16:00

ყოველდღიური სპორტული გაზეთი "ლელო"
617
მკითხველის კომენტარები / 0 /
მსგავსი ამბები
რუბრიკის სხვა სიახლეები
;